Kara Namodia Dibaia Bena Hahediba Taudia Halaoa Gaukarana Karaia
“Do umui lao, bese ibounai be diba tahua taudia do umui halaoa.”—MATAIO 28:19.
1. Dirava ena hesiai taudia haida ese edena kara namodia idia dibaia be namo?
NAMONA be Iehova ena hesiai taudia ese nega haida edia diba idia habadaia bona kara namodia idia dibaia, unai ese idia do ia durua Iehova ena ura idia karaia totona. Hegeregere, Dirava ena hahegani dainai Aberahamo bona Sara be hanua namona Uru idia rakatania, to palai ruma ai do idia noho dainai, palai ruma karaia daladia bona kara namodia idia dibaia be namo. (Heberu 11:8, 9, 15) Iosua ese Israela taudia be Gwauhamata Tanona dekenai ia hakaua lao totona, ia boga auka, Iehova ia abidadama henia, bona Iehova ena Taravatu ia diba be namo. (Iosua 1:7-9) Dirava ena lauma helaga ese Besalele bona Oholiba edia diba ia habadaia be namo, unai amo dubu helaga haginia gaukarana bona ma gaukara haida idia karaia bona naria namonamo totona.—Esodo 31:1-11.
2. Edena henanadai do ita herevalaia?
2 Lagani handred momo murinai, Iesu Keriso ese ena hahediba taudia dekenai inai gaukara ia henia: “Do umui lao, bese ibounai be diba tahua taudia do umui halaoa, bona . . . idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:19, 20) Unai be gaukara badana bona idau hereana. To, edena kara namodia ese ita do ia durua unai gaukara badana ita karaia totona? Edena dala ai unai kara namodia ita dibaia diba?
Dirava Lalokau Henia Bada
3. Iesu ese ia henia gaukarana dainai, dahaka ita karaia be namo?
3 Iehova ita lalokau henia be namo, unai amo taunimanima ita haroro henia bona edia lalona ita veria Dirava korikorina idia tomadiho henia totona. Israela taudia be mai edia kudouna ibounai ida Iehova ena taravatu idia badinaia, gau namodia idia bouboulaia, bona ane amo Ia idia hanamoa neganai, idia hahedinaraia idia be Iehova idia lalokau henia. (Deuteronomi 10:12, 13; 30:19, 20; Salamo 21:13; 96:1, 2; 138:5) Ita be hahediba taudia dainai, namona be Dirava ena taravatu ita badinaia sibona lasi, to danu, Iehova bona ena ura be ma haida dekenai ita harorolaia, unai amo ita hahedinaraia ita be Iehova ita lalokau henia. Namona be mai lalogoada danu ita hereva bona iseda hereva amo ita hahedinaraia Dirava ese ita dekenai ia gwauhamatalaia gau namodia be ita abia dae momokani.—1 Tesalonika 1:5; 1 Petero 3:15.
4. Dahaka dainai Iesu ia ura dikadika Iehova ena sivarai be taunimanima dekenai ia hadibaia?
4 Iesu be Iehova ia lalokau henia bada dainai, ia ura dikadika Dirava ena ura, Basileia, bona tomadiho momokanina ia herevalaia. (Luka 8:1; Ioane 4:23, 24, 31) Iesu ia gwau, “Egu aniani be inai: Lau ia siaia Diravana ena ura do lau karaia, iena gaukara do lau karaia haorea momokani.” (Ioane 4:34) Salamo torea tauna ena hereva be Iesu dekenai ia guguru: “ ‘Lauegu Dirava e, lau ura dikadika oiemu ura do lau karaia. Oiemu taravatu be lauegu kudouna lalonai ia noho.’ Lohiabada e, lau ese oiemu taudia momo edia vairanai, hamauria sivaraina lau gwauraia hedinarai. Lohiabada e, oi diba vadaeni, lau ese inai Sivarai Namona, be nega ibounai do lau gwauraia. Lauegu udu bibina do lau koua lasi.”—Salamo 40:8, 9; Heberu 10:7-10.
5, 6. Hahediba taudia halaoa gaukarana lalonai, dahaka kara be kara badana?
5 Baibel ena hereva momokani idia dibaia kamonai taudia be Dirava idia lalokau henia dainai, nega haida idia be mai edia lalogoada ida Iehova bona Basileia idia harorolaia namonamo bona haida idia hagoadaia Baibel idia tahua totona. (Ioane 1:41) Hahediba taudia halaoa gaukarana lalonai, Dirava lalokau henia karana be kara badana. Bona unai lalokau ia boio lasi totona, hanaihanai Baibel ita duahia bona laloa dobu be gau badana.—1 Timoteo 4:6, 15; Apokalupo 2:4.
6 Ita diba Iesu Keriso be Iehova ia lalokau henia dainai, ia ese ma haida ia hadibaia namonamo. To, Iesu ese Basileia ia harorolaia namonamo ena badina ma haida idia noho danu. Iesu be hahediba taudia halaoa gaukarana ia karaia namonamo, dahaka kara ma haida ia hahedinaraia?
Taunimanima Edia Namo Laloa Bada
7, 8. Iesu ese taunimanima be edena bamona ia lalodia?
7 Iesu be taunimanima edia namo ia laloa bada bona ia ura henidia. Guba ai ia noho neganai, ia be Dirava ena gaukara ia karaia bona taunimanima dekenai ia moale bada. (Aonega Herevadia 8:30, 31) Tanobada dekenai ia noho neganai danu, Iesu be taunimanima ia hebogahisi henia bona durua. (Mataio 11:28-30) Iesu be Iehova ena lalokau bona hebogahisi ia hahedinaraia dainai, taunimanima be idia ura Dirava momokani tamona idia tomadiho henia. Iesu ese taunimanima edia namo bona noho dalana ia laloa bada dainai, idia ese iena hereva idia kamonai henia.—Luka 7:36-50; 18:15-17; 19:1-10.
8 Tau ta be Iesu ia nanadaia dahaka ia karaia mauri hanaihanai ia abia totona neganai, Iesu be unai tau “ia itaia mai moale danu” bona “ia ura henia.” (Mareko 10:17-21) Betania ai, Iesu ese ia hadibaia taudia be Baibel ese inai bamona ia gwauraia: “Iesu ese Mareta mai ena tadina Maria danu, bona Lasaro danu, ia lalokau henia.” (Ioane 11:1, 5) Iesu be taunimanima edia namo ia laloa bada dainai, ia laga-ani lasi to ia hadibadia. (Mareko 6:30-34) Oibe, Iesu be taunimanima ia lalokau henia dainai, momo be tomadiho momokani lalonai idia vareai.
9. Aposetolo Paulo be dahaka kara ia hahedinaraia?
9 Aposetolo Paulo danu be ia haroro henia taudia ia ura henia. Hegeregere, ia ese Tesalonika ai Keristani taudia ai idia lao taudia ia hamaoroa: “Umui ai lalokau henia bada dainai, ai ese Sivarai Namona umui dekenai ai henia. Bona inai sibona lasi, to ai be ai noho hegaegae, aiemai mauri umui dainai do ai atoa diho, badina be umui ai lalokau henia bada noho.” Paulo ena lalokau karana dainai, Tesalonika taudia haida be kaivakuku idia rakatania, bona mauri Diravana ena hesiai taudia ai idia lao. (1 Tesalonika 1:9; 2:8) Iesu bona Paulo bamona, bema ita danu be taunimanima ita ura henia, vadaeni do ita moale badina ita itaia “mauri hanaihanai abia totona taudia ibounai” be mai edia kudouna ibounai ida sivarai namona idia abia dae.—Kara 13:48.
Ita Sibona Eda Ura Ita Dadaraia
10, 11. Dahaka dainai hahediba taudia ese sibona edia ura idia dadaraia be gau badana?
10 Hahediba taudia namodia be sibona edia ura idia dadaraia. Idia itaia kohu bona moni be gau badana lasi. Iesu ese ena hahediba taudia ia hamaoroa: “Kohu momo taudia Dirava ena Basileia idia vareai dala be mai hekwarahi bada!” Hahediba taudia be unai hereva dainai idia hoa, to Iesu ma ia gwau: “Lauegu natudia e, Dirava ena Basileia vareai dala be auka! Kamelo ese nila matuna dekenai ia vareai lao be haraga, to kohu momo tauna ese Dirava ena Basileia dekenai ia vareai dala be auka.” (Mareko 10:23-25) Iesu ia gwau, namona be ena hahediba taudia be kohu o moni idia laloa momo lasi, unai amo hahediba taudia halaoa gaukarana do idia karaia namonamo. (Mataio 6:22-24, 33) Dahaka dainai sibona eda ura dadaraia karana ese ita ia durua hahediba taudia halaoa gaukarana ita karaia namonamo totona?
11 Iesu ena hereva ibounai ita hadibaia karana be gaukara badana. Keristani tauna be ia ura hahediba taudia halaoa gaukarana ia karaia namonamo dainai, wiki ta ta ai Baibel amo kamonai tauna ia stadi henia. Ma haida be ful-taim moni gaukara idia rakatania bona pat-taim moni gaukara idia abia, unai amo kudou-maoro taudia idia tahua diba. Tausen momo be gado ma ta idia dibaia, unai amo edia teritori ai idia noho idau bese taudia idia haroro henia diba. Ma haida be edia noho gabudia idia rakatania bona idau tanodia dekenai haroro gaukara idia karaia. (Mataio 9:37, 38) Idia ibounai be sibona edia ura idia dadaraia. To, hahediba taudia ese kara namodia ma haida idia dibaia be namo.
Mai Haheauka ida Nega Gaukaralaia Namonamo
12, 13. Dahaka dainai hahediba taudia halaoa gaukarana lalonai ita haheauka be gau badana?
12 Haheauka karana ese danu ita do ia durua hahediba taudia halaoa gaukarana ita karaia namonamo totona. Sivarai namona ita harorolaia haraga be mai anina bada, to taunimanima ita hadibaia totona nega bada ita gaukaralaia bona ita haheauka be namo. (1 Korinto 7:29) Iesu ia haheauka, herevana ena tadina Iamesi be hahediba tauna ai ia lao haraga lasi. Iamesi be Iesu ena haroro gaukara daladia ia diba namonamo, to badina haida dainai Iamesi be hahediba tauna ai ia lao haraga lasi. (Ioane 7:5) To Keriso ena mase bona Pentekoste 33 C.E. edia huanai, Iamesi be hahediba tauna ai ia lao, badina Baibel ia gwau Iamesi be ena sinana, kakana o tadina bona aposetolo taudia danu ia haboua bona idia guriguri hebou. (Kara 1:13, 14) Iamesi be hahediba tauna namona ai ia lao, bona gabeai Keristani kongrigeisen ena maduna badadia ia huaia.—Kara 15:13; 1 Korinto 15:7.
13 Biru taudia ese idia hadoa gaudia haida be metairametaira idia tubu hegeregerena, Keristani taudia ese idia hadibaia taudia haida be metairametaira Dirava ena Hereva do idia lalopararalaia, Iehova do idia lalokau henia bona Keriso ena kara do idia tohotohoa. Unai dainai, hadibaia tauna ia haheauka be gau badana. Iamesi ia gwau: “Lauegu varavara taudia e, do umui haheauka noho ela bona Lohiabada do ia giroa mai. Umui laloa: Biru tauna ese iena uma anina ia naria, mai ena haheauka danu. Oibe, ia naria ela bona medu ginigunana bona medu dokona danu idia diho vadaeni. Umui danu do umui haheauka. Bona mai abidadama ena laloa goada danu, Lohiabada do umui naria noho, badina iena mai be kahirakahira.” (Iamesi 5:7, 8) Iamesi be ena tadikaka ia hamaoroa: “Do umui haheauka noho ela bona Lohiabada do ia giroa mai.” Hahediba taudia be gau ta idia lalopararalaia lasi neganai, Iesu be mai haheauka ida unai gau ia herevalaia eiava ia haheitalaia. (Mataio 13:10-23; Luka 19:11; 21:7; Kara 1: 6-8) Hari Iesu be ia noho dainai, mai haheauka ida hahediba taudia halaoa gaukarana ita karaia be namo. Danu, mai haheauka ida Iesu murinai idia raka kamonai taudia ita hadibaia.—Ioane 14:9.
14. Herevana ita haheauka, to edena dala ai eda nega ita gaukaralaia namonamo diba?
14 Ena be mai haheauka ida Baibel amo taunimanima ita stadi henia, to idia momo be bapatiso idia abia haraga lasi. (Mataio 13:18-23) Unai dainai, reana idia ita durua sisina bena ita rakatanidia, bona Baibel ena hereva momokani idia ura henia taudia ma haida ita tahua. (Hadibaia Tauna 3:1, 6) To, Baibel ena hereva momokani idia ura henia taudia danu ese heduru namona idia abia be namo, unai amo edia lalohadai, kara, bona abia hidi gaudia idia haidaua diba. Unai dainai, Iesu bamona ita haheauka be namo—ena hahediba taudia haida be kara maorona idia karaia haraga lasi neganai, Iesu be ia haheauka.—Mareko 9:33-37; 10:35-45.
Hadibaia Karana Hanamoa
15, 16. Hahediba taudia halaoa gaukarana lalonai, dahaka dainai ita hegaegae namonamo bona taunimanima idia laloparara dalanai ita hereva be gau badana?
15 Dirava ita lalokau henia, taunimanima ita ura henia, sibona eda ura ita dadaraia, bona ita haheauka neganai, hahediba taudia halaoa gaukarana do ita karaia namonamo. To eda hadibaia karana ita hanamoa danu be namo, unai amo ita hadibaia gaudia ita hahedinaraia goevagoeva bona taunimanima do idia laloparara. Hegeregere, momo idia gwau Hadibaia Tauna Badana, Iesu Keriso, ena hadibaia dalana be namo herea, badina taunimanima be Iesu ena hereva idia lalopararalaia goevagoeva. Reana Iesu ena hereva haida oi laloatao, hegeregere: “Umui emui kohu be guba dekenai do umui haboua.” “Helaga gaudia sisia dekenai do umui henia lasi.” “Dirava ena gaukara badadia ese iena aonega idia hamomokania noho.” “Kaisara ena gau, Kaisara dekenai umui henia, to Dirava ena gau be Dirava dekenai umui henia.” (Mataio 6:20; 7:6; 11:19; 22:21) Iesu be hereva kwadogidia sibona ia gwauraia lasi. To, ia hadibaia gaudia edia anina be nega maorona ai ia hahedinaraia goevagoeva. Edena dala ai Iesu ena hadibaia dalana oi tohotohoa diba?
16 Ita hadibaia gaudia ibounai be taunimanima ese idia lalopararalaia dalana ai ita herevalaia goevagoeva totona, ita hegaegae be gau badana. Ia hegaegae lasi pablisa be stadi lalonai ia hereva momo. Reana ia diba gaudia momo ia herevalaia dainai, stadi ena point badana do ia hedinarai lasi. To, ia hegaegae namonamo pablisa be ena stiuden ia laloa bada, do idia stadilaia kahana ia lalohadailaia, bona point badadia ia hahedinaraia namonamo. (Aonega Herevadia 15:28; 1 Korinto 2:1, 2) Pablisa ia laloa gaudia haida be inai: Stiuden be dahaka gaudia ia diba vadaeni? Bona stadi lalonai dahaka point badadia ia hahedinaraia be namo? Ena be pablisa be gau namodia momo ia diba, to ia ura stiuden tauna be point badana ia lalopararalaia namonamo dainai, gau momo ia herevalaia lasi.
17. Edena dala ai taunimanima ita durua Baibel ena anina idia herevalaia totona?
17 Danu, Iesu sibona ia hereva lasi to ia ese taunimanima ia noia edia lalohadai idia herevalaia totona. Hegeregere nega ta ai, Iesu ia henanadai: “Simona e, oi be edena bamona oi laloa? Tanobada edia king ese takisi moni edia taunimanima korikori dekena amo do idia abia, o idau taudia dekena amo?” (Mataio 17:25) Baibel amo stiuden ita stadi henia neganai, namona be ita boga auka, namo lasi ita sibona be mai moale ida Baibel ena anina ita kikilaia, to nega ita henia stiuden tauna ia hereva eiava gau haida edia anina ia herevalaia totona. Ita ura lasi henanadai momo ita gaukaralaia. To, mai aonega ida haheitalai namodia ita gaukaralaia, bona henanadai namodia ita henia neganai, stiuden ita durua diba ita stadilaia bukana ai idia torea Baibel ena hereva badadia idia lalopararalaia totona.
18. Ta ita “hadibaia” ena badina be dahaka?
18 Baibel be “hadibaia” karana ia herevalaia danu. (2 Timoteo 4:2; Tito 1:9) Ta ita hadibaia neganai, ita ura ia be hereva haida ia laloatao sibona lasi. To, namona be ita durua ia diba dahaka be momokani, dahaka be koikoi, dahaka be namo, dahaka be dika, dahaka be aonega karana bona dahaka be kavakava karana. Unai sibona lasi to bema stiuden ita durua mai kudouna ibounai ida Iehova ia lalokau henia totona, vadaeni stiuden do ia itaia dahaka dainai Iehova ia badinaia be namo.
Hahediba Taudia Halaoa Gaukarana Goadalaia
19. Edena dala ai Keristani taudia ibounai be hahediba taudia halaoa gaukarana idia karaia?
19 Keristani kongrigeisen taudia be hahediba taudia halaoa gaukarana idia karaia momo. Kamonai tauna ta be pablisa matamata ta ai ia lao neganai, hadibaia tauna—Iehova ena Witnes tauna unai—sibona ia moale lasi. Haheitalai be inai: Natuna ta ia boio neganai, taunimanima be grup ta do idia karaia unai natuna idia tahua totona, to tau tamona sibona be unai natuna do ia davaria. Unai natuna be tama bona sina dekenai idia abia lao neganai, taunimanima ibounai do idia moale. (Luka 15:6, 7) Unai hegeregerena, kongrigeisen taudia ibounai be hahediba taudia halaoa gaukarana idia karaia hebou. Ibounai be Iesu ena hahediba taudia idia tahua. Bona kamonai tauna ta be Kingdom Hall heboudia dekenai ia mai matamaia neganai, kongrigeisen taudia ibounai be unai kamonai tauna idia durua tomadiho momokani ia moalelaia totona. (1 Korinto 14:24, 25) Unai dainai, Keristani taudia ibounai idia moale diba, badina lagani ta ta ai kamonai taudia tausen momo be hahediba taudia ai idia lao.
20. Bema oi ura Baibel ena hereva momokani be ma haida dekenai oi hadibaia, dahaka oi karaia be namo?
20 Kamonai Keristani taudia momo be idia ura dikadika ma haida dekenai Iehova bona tomadiho momokani ena dala idia hadibaia. Ena be idia hekwarahi unai bamona idia karaia totona, to reana idia kwalimu lasi. Unai dainai, namona be Iehova oi lalokau henia noho, taunimanima oi ura henidia, sibona emu ura oi dadaraia, oi haheauka, bona dala oi tahua emu hadibaia karana oi hanamoa totona. Danu, namona be Iehova oi guriguri henia, badina oi ura hereva momokani oi hadibaia namonamo. (Hadibaia Tauna 11:1) Namona be oi moale badina oi diba Iehova ena hesiai gaukara lalonai oi karaia gaudia ibounai ese oi idia durua hadibaia taudia halaoa gaukarana oi karaia namonamo bona Dirava oi hanamoa totona.
Anina Oi Gwauraia Diba, A?
• Dahaka dainai hahediba taudia halaoa gaukarana be Dirava lalokau henia karana?
• Hahediba taudia halaoa gaukarana idia karaia taudia ese dahaka kara namodia idia hahedinaraia be namo?
• Ta ita “hadibaia” ena badina be dahaka?
[Picture on page 23]
Keristani taudia be hahediba taudia halaoa gaukarana amo idia hahedinaraia idia be Dirava idia lalokau henia bada
[Picture on page 24]
Dahaka dainai hahediba taudia halaoa gaukarana idia karaia taudia be ma haida edia namo idia laloa bada?
[Picture on page 25]
Hahediba taudia ese dahaka kara namodia ma haida idia hahedinaraia be namo?
[Picture on page 26]
Keristani taudia be hahediba taudia halaoa gaukarana ena namo idia itaia neganai, idia moale