Momo ese Idia Abia Dae Hahediba Herevana

“Egu nihi lalodiai, lau be hel ena lahi dekenai idia negea bona lahi ese lau ia araia noho! Lau lolo badabada, bena mahuta amo lau noga. Unai dainai, lau ura lasi kara dika lau karaia.”​​—⁠Arline.

OI ABIA dae hel be kara dika taudia hahisia gabuna ta, a? Taunimanima momo be unai idia abia dae. Hegeregere, lagani 2005 ai, Scotland dekenai, University of St. Andrews ena diba bada tauna ta be tahua gaukarana ia karaia neganai, ia davaria Scotland ena pris taudia 33 pesen bamona idia gwau, Dirava idia tura henia lasi taudia be “hel dekenai do idia lao bona lalohisihisi idia davaria hanaihanai.” Taunimanima 20 pesen bamona idia gwau hel dekenai idia lao taudia be lahi ena hisihisi do idia mamia.

Tano momo ai, momo be hel hadibaia herevana idia abia dae. Hegeregere, United States ai, lagani 2007 lalonai tahua gaukara ta idia karaia bona idia davaria taunimanima 70 pesen be hel idia abidadama henia. Ena be tano haida ai taunimanima be dubu ta dekenai idia lao lasi, to idia danu be hel idia abidadama henia. Canada ai, lagani 2004 lalonai tahua gaukara idia karaia neganai, idia davaria taunimanima 42 pesen be hel idia abidadama henia. Bona Great Britain ai, taunimanima 32 pesen idia abia dae hel be gabu korikorina ta.

Dubu Gunalaia Taudia be Dahaka Idia Hadibaia?

Hari inai negai, pris taudia momo idia gwau hel be lahi gabuna ta lasi bona hisihisi gabuna ta lasi. To, idia ese lagani 1994 ai idia halasia buka ta (Catechism of the Catholic Church) ena hereva idia hadibaia. Unai buka ia gwau: “Hel dekenai idia lao taudia be Dirava amo do idia daudau hanaihanai.”

Herevana taunimanima dekenai unai bamona idia hadibaia, to momo idia do abia dae hel be lalohisihisi o lahi ena hisihisi abia gabuna. Unai hereva idia hadibaia taudia idia gwau unai be Baibel ena hahediba herevana ta. Albert Mohler, Southern Baptist Theological Seminary ena presiden ia gwau: “Unai be Baibel ena hereva momokani ta.”

Oi Abia Dae Gauna be Maoro, A?

Bema hel be hisihisi abia gabuna, vadaeni oi gari henia be namo. To, bema unai hahediba herevana be koikoi, vadaeni pris taudia ese unai gaudia idia hadibaia neganai, taunimanima be idia daradara bona idia gari. Danu, unai tomadiho gunalaia taudia ese Dirava ena ladana idia hadikaia.

Dirava ena Hereva, Baibel, ese hel be edena bamona ia gwauraia? Hiri Motu Buka Helaga ai gaukaralaia, inai henanadai toi ai haerelaia totona: (1) Ta ia mase neganai dahaka ia vara? (2) Iesu be hel ia herevalaia, a? (3) Oi davaria hel ena hahediba herevana be koikoi neganai, unai ese edena bamona oi ia durua?