Iehova Ena Hereva be Ia Mauri Noho

Apokalupo Bukana Ena Hereva Badadia​—⁠II

VAIRA nega ai Iehova Dirava idia tomadiho henia taudia bona idia tomadiho henia lasi taudia dekenai dahaka do ia vara? Vaira nega ai Satani bona iena demoni dekenai dahaka do ia vara? Keriso ena Lagani 1,000 Lohia Negana ai Iehova idia badinaia taudia ese dahaka hahenamo do idia abia? Unai henanadai bona mai anina bada henanadai ma haida edia haere be Apokalupo 13:1–​22:21 ese ia hahedinaraia.a Unai karoa be Ioane ese lagani 100 C.E. dokonai ia itaia matahanai oredia 9 idia herevalaia.

Ioane ia gwau: “Inai buka ia duahia tauna be do ia moale. Ma danu, inai buka ena peroveta hereva idia kamonai henia, bona iena hadibaia hereva idia badinaia taudia be do idia moale.” (Apok. 1:3; 22:⁠7) Apokalupo bukana ita duahia bona ita badinaia neganai, unai ese ita ia durua (1) Dirava ita hesiai henia, (2) iseda abidadama Dirava bona iena natuna, Iesu Keriso dekenai ia hagoadaia, bona (3) vaira negana totona helaro namona ia henia.b​​—⁠Heb. 4:​12.

DIRAVA ENA BADU DISI SEVEN IDIA BUBUA

(Apok. 13:1–​16:⁠21)

Apokalupo 11:18 ia gwau: “Dirava diba lasi taudia idia badu dikadika, badina be oiemu badu ena nega ia ginidae vadaeni. . . . Tanobada idia hadikaia vadaeni taudia do oi alaia ore.” Dirava ena badu ena badina ia hahedinaraia totona, matahanai namba 8 ese “dagedage gauna . . . iena doana be 10, bona iena kwarana be 7” ena gaukara be Ioane dekenai ia hahedinaraia.​​—⁠Apok. 13:⁠1.

Matahanai namba 9 ai Ioane ia itaia, “Mamoe ena Natuna be Siona Ororo dekenai ia gini” bona “ia danu be taunimanima 144,000.” Idia be “taunimanima ibounai edia huanai dekena amo Dirava ese idia ia hoia vadaeni.” (Apok. 14:​1, 4) Gabeai, aneru ese Iehova ena badu idia gwauraia hedinarai. Matahanai ma ta lalonai, Ioane ia itaia, “aneru 7 ese hisihisi havaraia gaudia ibounai 7 idia dogoatao.” Iehova sibona ese unai aneru ia oda henidia, Satani ena tanobada ena kahana ta ta dekenai ‘unai disi 7, Dirava ena badu toana, do idia bubua diho.’ Unai disi be Iehova ena badu bona iena hahemaoro herevadia amo idia honu. (Apok. 15:1; 16:⁠1) Unai matahanai ruaosi ese Basileia ena hahemaoro herevadia ma haida, hegeregere aneru namba 7 ena kibi ia hiriria negana bona dika ihatoina ia vara negana idia hahedinaraia.​​—⁠Apok. 11:​14, 15.

Baibel Henanadaidia Edia Haere:

13:8​​—⁠‘Mamoe ena Natuna ena mauri bukana’ be dahaka? Laulau dalana ai, unai buka lalonai Iesu ida guba Basileia ai do idia lohia hebou taudia sibona edia ladana ia noho. Tanobada ai idia do noho horoa orena taudia danu edia ladana be unai buka lalonai idia torea.

13:​11-​13​​—⁠Edena dala ai dagedage gauna mai ena doana rua be huala bamona ai ia lao bona lahi be guba amo ia hadihoa? Dagedage gauna mai ena doana rua​​—⁠Anglo-America Basileia Badana unai​​—⁠be huala bamona ia kara anina be ia ese taunimanima ia doridia, ia hagaridia, bona ia dagedage henidia ena lohia dalana idia abia dae totona. Lahi be guba amo ia hadihoa karana ese ia hahedinaraia ia be peroveta tauna bamona ia kara bona tanobada ibounai tuarina ginigunana bona iharuana lalonai kara dika ia hadokoa bona Komiunis gavamanidia ia halusidia vaitani.

16:17​​—⁠Disi namba 7 be guba ena “hodahoda” dekenai ia bubua anina be dahaka? “Hodahoda” be Satani amo ia mai lalohadaina ia hahedinaraia, bona unai be “kamonai lasi taudia edia lalona dekenai ia gaukara” noho. Unai hodahoda dikana be hari inai nega ena gwau-edeede taudia ese idia hahodia vareai.​​—⁠Efe. 2:​2, NW.

Ita Dibaia Gaudia:

13:​1-4, 18. Tanobada ena politikol gavamanidia ia laulaulaia “dagedage gauna” be “davara dekena amo ia daekau.” Unai davara ese heiriheiri taunimanima hutuma ia laulaulaia. (Isa. 17:​12, 13; Dan. 7:​2-8, 17) Satani ese ia havaraia bona siahu ia henia dagedage gauna be inai namba 666 ia abia bona unai ena anina be ia goevadae lasi momokani. Unai dagedage gauna ita lalopararalaia namonamo dainai, tanobada taudia ese dagedage gauna idia hoalaia bona ia murinai idia raka bamona ita karaia lasi.​​—⁠Ioa. 12:31; 15:⁠19.

13:​16, 17. Ena be dina ta ta ai ita karaia gaudia, hegeregere gau ta ita hoia eiava ita hoihoilaia neganai hekwakwanai ita davaria, to namo lasi unai dagedage gauna ese iseda mauri ia biagua. ‘Maka be eda imana o eda baguna dekenai do idia atoa’ anina be dagedage gauna ese iseda kara o lalohadai ia biagua.

14:​6, 7. Aneru ena hereva ese ita ia hadibaia mai karaharaga lalohadaina ida Dirava ena Basileia ena sivarai namona ita harorolaia be namo. Namona be eda Baibel stiuden taudia ita durua mai hemataurai ida Dirava idia gari henia bona Iehova idia hanamoa totona.

14:​14-​20. “Anina utua negana”​​—⁠roho mauri taudia gogoa gaukarana unai​​—⁠ia ore murinai, aneru ese “tanobada ena vain huahua” do idia utua bona Dirava ena badu ena “moia gabuna badana” dekenai do idia negea. Unai “tanobada ena vain” eiava Satani ese ia biagua tanobada gavamani dikadia mai edia “huahua” o kara dika be do idia ore momokani. Namona be eda lalona ita hadaia tanobada ena vain ese ita ia hakaua kerere lasi totona.

16:​13-​16. “Lauma edia amo idia mai hereva mirodia” be laloani herevadia Satani ese ia siaia tanobada ena “king” taudia ia veridia totona. Unai dala amo idia be Dirava ena badu disi seven edia hereva idia kamonai lasi to Satani ena kahana dekenai idia gini goada bona Iehova idia gwau-edeede henia.​​—⁠Mat. 24:​42, 44.

16:21. Tanobada ena dokona negana ia kahirakahira lalonai, Iehova ese Satani bona ena tanobada dikana dekenai hahemaoro hereva aukadia, aisi bamona, do ia gwauraia. To, taunimanima momo ese Dirava do idia gwau-edeede henia noho.

TUARI AI IA KWALIMU KING IA LOHIA

(Apok. 17:1–​22:⁠21)

“Babulonia badana” tomadiho koikoi ibounai unai, be Satani ena tanobada dikana ena kahana ta. Matahanai namba 11 lalonai Babulonia Badana be “ariara hahine badana” ta bamona, “dagedage gauna kakakakana ta ena latanai ia helai.” Bona unai dagedage gauna ena ‘doana 10’ ese do idia hadikaia ore momokani. (Apok. 17:​1, 3, 5, 16) Unai matahanai ese ariara hahine be “hanua bada herea” ta bamona ia hahedinaraia, ena moru ia gwauraia, bona Dirava ena taunimanima ia hadibaia ‘ia dekena amo do idia raka siri.’ Unai hanua badana ia moru dainai taunimanima momo idia taitai. To, “Mamoe ena Natuna ena headava” dainai, guba dekenai moale bada ia vara. (Apok. 18:​4, 9, 10, 15-​19; 19:⁠7) Matahanai namba 13 lalonai, “hosi kurokurona” ai ia guia tauna be tanobada ena king taudia ida ia tuari. Ia ese Satani ena tanobada dikana ia haorea vaitani.​​—⁠Apok. 19:​11-​16.

To, “idaunegai gaigaina, ma iena ladana be ‘Diabolo’ bona ‘Satani’ ” be edena bamona? Edena nega ai Dirava ese Satani be ‘lahi bona salipa gohuna lalonai do ia negea diho’? Unai be matahanai namba 14 ese ia hahedinaraia gauna ta. (Apok. 20:​2, 10) Matahanai oredia rua ese Lagani 1,000 Lohia Negana ai do idia vara gaudia idia hahedinaraia. Apokalupo ena matahanai dokona lalonai, Ioane ia itaia, “mauri ranuna ena sinavai, . . . be Dirava bona Mamoe ena Natuna edia helai gabuna badana dekena amo ia heau lao,” bona “ranu mase taudia” boiria herevana ia kamonai danu.​​—⁠Apok. 1:1; 22:​1, 2, 17.

Baibel Henanadaidia Edia Haere:

17:16; 18:​9, 10​​—⁠Dahaka dainai “tanobada ena king taudia” ese Babulonia badana idia hadikaia to ma ia dainai idia taitai? Idia taitai ena badina be sibona edia namo idia laloa. Babulonia Badana idia haorea murinai, tanobada ena king taudia do idia diba ia ese ia durudia bada. Ia ese edia kara dika ia hanamoa bona durua. Danu, Babulonia Badana ese memero ia doridia tuari lalonai idia vareai totona. Unai sibona lasi, to ia ese taunimanima ia biagudia.

19:12​​—⁠Dahaka dainai Iesu sibona be ena ladana ia diba? Unai ladana ese Lohiabada ena dina lalonai Iesu ese ia abia siahuna bona dagi ia laulaulaia, hegeregere Isaia 9:6 dekenai ia gwauraia dagi idauidau bamona. Tau ta be unai ladana ia diba lasi, to Iesu sibona ese unai dagi ena gaukara idauidau ia lalopararalaia diba. To, Iesu ese unai dagi ena gaukara haida be iena headava matamata kekeni oreana dekenai ia henia, badina idia dekenai ‘iena ladana be unai kwalimu tauna ena latanai’ do ia torea.​​—⁠Apok. 3:​12.

19:14​​—⁠Aramagedono ai daidia be Iesu do idia bamoa? “Guba ena tuari oreadia” be aneru bona guba dekenai idia daekau vadaeni horoa taudia. Bona idia be Iesu ida Dirava ena tuari lalonai do idia tuari.​​—⁠Mat. 25:​31, 32; Apok. 2:​26, 27.

20:​11-​15​​—⁠Daidia edia ladana be “mauri bukana” lalonai idia torea? Unai buka lalonai mauri hanaihanai do idia abia taudia edia ladana ia noho. Idia be horoa Keristani taudia, hutuma bada taudia, bona ‘kara maoromaoro toreisi lou’ taudia. (Kara 24:15; Apok. 2:​10; 7:⁠9) Kara maoromaoro lasi toreisi lou taudia edia ladana be “mauri bukana” lalonai do idia noho bema idia be Lagani 1,000 Lohia Negana ai “mauri bukana” lalonai idia noho herevadia idia badinaia. To, idia torea ladadia be idia kokia diba. Horoa taudia edia ladana be buka lalonai do ia noho hanaihanai bema idia gini goada ela bona idia mase. (Apok. 3:⁠5) Tanobada ai mauri hanaihanai do idia abia taudia edia ladana be mauri bukana lalonai do idia noho hanaihanai diba, bema idia be lagani 1,000 dokonai hahetoho ginigabena idia hanaia.​​—⁠Apok. 20:​7, 8.

Ita Dibaia Gaudia:

17:​3, 5, 7, 16. Dirava dekena amo ia mai aonega ese ita ia durua “inai hahine ena sivarai, hunia gauna, bona ia latanai hahine ia helai dagedage gauna [kakakakana]” ita lalopararalaia namonamo totona. (Iam. 3:​17) Unai dagedage gauna be guna League of Nations bona gabeai idia gwauraia United Nations. Unai ita lalopararalaia namonamo dainai, ita ia durua Dirava ena Basileia ena sivarai namona do ita harorolaia goadagoada bona ma haida dekenai Iehova ena hahemaoro herevadia ita hahedinaraia totona.

21:​1-6. Ita diba momokani Basileia ena lohia henunai, guna idia perovetalaidia gwauhamata ibounai do idia guguru. Dahaka dainai unai bamona ita hereva? Badina Iehova ia gwau: “Egu gaukara ibounai be do lau karaia haorea.”

22:​1, 17. “Mauri ranuna ena sinavai” be Iehova ese taunimanima be kara dika bona mase amo ia ruhaia dalana ia laulaulaia. Hari inai negai unai mauri ranuna sisina ia noho. Namona be mai moale ida davana lasi ‘mauri ranuna do ita abia dae,’ bona ma haida dekenai ita henia danu!

[Footnotes]

[Picture on page 5]

Dirava ena Basileia henunai, Iehova idia badinaia taudia be hahenamo momo do idia abia!