Egu Mauri Lalonai Gau Namona ta Lau Davaria

Gaspar Martínez ese ia sivarailaia

Lau be ogogami hanua merona ta, to siti dekenai taga tauna ai lau lao. Inai sivarai amo do oi itaia lau be dala idauna ta ai taga tauna ai lau lao, guna unai bamona lau laloa lasi.

LAU be lagani 1930 lalodiai Spain ena not kahana ai ia noho hanua ta ladana Rioja, dekenai lau tubu daekau. Egu mauri lagani be 10 neganai sikuli lau rakatania, to unai nega ai lau be toretore bona duahiduahi lau diba vadaeni. Lau, egu kakadia rua, bona tadidia foa be mamoe ai naria bona uma gabu maragidia ai karaia.

Ai ogogami dainai ai laloa moni bona kohu momo ai abia be gau badana. Mai edia kohu momo taudia dekenai ai mama. To nega ta bisop ia gwau: “Iena teritori dekenai aiemai hanua taudia sibona be tomadiho karana idia laloa bada.” Madi, ia diba lasi gauna be, gabeai momo ese Katolik tomadihona do idia rakatania.

Mauri Namona Lau Tahua

Lau be egu hanua kekenina Mercedes lau adavaia. Bena daudau lasi murinai emai natuna ta ia vara. Lagani 1957 ai Logroño siti dekenai ai lao, bona gabeai egu ruma bese taudia danu be unuseniai idia lao. To lau itaia egu diba be bada lasi dainai, moni gaukara namona lau davaria be auka. Lau diba lasi edeseniai heduru do lau abia. Laiberi ai idia noho buka idauidau amo heduru lau tahua matamaia, to lau diba lasi dahaka lau tahua.

Gabeai, reidio program ta ai lau kamonai revareva amo Baibel stadi idia karaia diba. Unai kosi lau karaia bona lau haorea murinai, Protestan dubu taudia haida be lau idia rini henia. To edia dubu dekenai lau lao neganai, lau itaia dubu ena tau badadia be sibodia idia heiriheiri. Unai dainai gabeai unai dubu dekenai lau giroa lou lasi, bona lau laloa reana tomadiho ibounai be unai bamona kara idia karaia danu.

Lau Diba Dahaka be mai Anina Bada

Lagani 1964 ai, mero matamata ta ladana Eugenio be emai ruma dekenai ia vadivadi. Ia be Iehova ena Witnes merona ta, unai neganai unai tomadiho lau diba lasi. To lau ura bada ia ida Baibel lau herevalaia badina lau laloa Baibel lau diba namonamo. Revareva amo Baibel stadi karaia kosi amo lau dibaia siridia be ia ida lau herevalaia. Ena be Protestan dubu ena hadibaia herevadia lau herevalaia, to unai hahediba herevadia lau abia dae lasi.

Nega rua lau ia vadivadi henia bona ai herevahereva murinai, lau diba ia be Baibel ia diba namonamo. Lau hoa badina ia be Baibel ena siri momo ia diba bona ia gwauraia namonamo diba, ena be ia sikuli namonamo lasi. Eugenio ese Baibel amo ia hahedinaraia ita be nega dokonai ita noho, bona kahirakahira Dirava ena Basileia ese tanobada ai paradaiso do ia mailaia.​​—⁠Sal. 37:​11, 29; Isa. 9:​6, 7; Mat. 6:​9, 10.

Baibel stadi lau abia dae bona stadi lalonai gau matamatadia lau dibaia, bona unai ese egu kudouna ia hamarerea. Lau laloparara nega vairai gau namodia haida lau karaia diba egu mauri lau moalelaia totona. Lau tahua gauna lau davaria unai. Lau laloparara ladana bada bona moni gaukara namona tahua karana be anina lasi. Danu, lau diba gorere bona mase be do idia ore momokani.​​—⁠Isa. 33:24; 35:​5, 6; Apok. 21:⁠4.

Maoromaoro lau dibaia gaudia be egu varavara dekenai lau herevalaia matamaia. Idia lau hamaoroa Dirava ia gwauhamata tanobada ai paradaiso do ia mailaia, bona unuseniai be Ia idia abidadama henia taudia sibona do idia noho.

Egu Ruma Bese Taudia be Hereva Momokani Idia Abia Dae

Gabeai, ai ibounai 12 bamona be Sunday adorahi ibounai egu vavana ena ruma dekenai ai hebou, bona Baibel ena gwauhamata namodia ai herevalaia. Wiki ta ta ai hora rua o toi lalonai unai ai karaia. Eugenio ia itaia egu varavara taudia momo idia ura Baibel idia herevalaia dainai, dala ia karaia ruma bese ta ta ida stadi ia karaia totona.

Lauegu varavara haida be taoni ta ladana Durango ai idia noho, ai noho gabuna amo ena daudau be kilomita 120 bamona bona unuseniai Witnes taudia be lasi. Unai dainai hua toi murinai holide lau abia, bona idia lau vadivadi henia badina lau ura lau dibaia gaudia be idia ida lau herevalaia. Unai neganai ai ibounai ten bamona be hanuaboi ibounai ai hebou, bona ai herevahereva ela bona daba momokani. Idia ibounai be idia dibaia gaudia dainai idia moale. Lau giroa lou gwauraia neganai, idia dekenai Baibel bona Baibel buka bona magasin haida lau rakatania. Unai murinai, nega momo ai be revareva amo ai herevahereva.

Gabeai, Witnes taudia be Durango dekenai idia ginidae. Unai hanua dekenai guna idia haroro lasi. Unuseniai taunimanima 18 be idia naria noho idia ura Baibel stadi idia abia. Unai dainai Witnes taudia be mai moale ida dala idia karaia ruma bese ta ta be stadi idia abia totona.

To, Mercedes ia ura lasi hereva momokani ia dibaia badina taunimanima dekenai ia gari. Danu, Spain dekenai Iehova ena Witnes taudia edia gaukara idia koua dainai, Mercedes ia laloa gavamani taudia ese emai natudia ruaosi be sikuli amo do idia kokia, bona ai ibounai be emai hanua amo do idia lulua. To ia itaia ruma bese taudia ibounai be hereva momokani idia abia dae dainai, ia danu ia ura Baibel stadi ia abia.

Lagani rua lalonai, egu ruma bese taudia ibounai 40 be idia bapatiso bona Witnes taudia ai idia lao. Oibe, egu ruma bese taudia be lau abia hidi dalana idia badinaia. Lau mamia egu mauri lalonai gau namona ta lau davaria. Momokani, Dirava ese dala idauidau ai ai dekenai hahenamo momo ia henia.

Gau Namodia Ma Haida Lau Abia

Idia hanaia laganidia 20 lalonai, lau be emai natudia memero rua bona emai kongrigeisen taudia lau durua idia goada idia lao totona. Lau bona Mercedes be hanua ta ladana Logroño dekenai ai lao neganai, unuseniai idia noho taudia be 100,000 bamona, to Witnes taudia be 20 sibona. Gabeai lau be kongrigeisen lalonai maduna momo lau abia.

Egu mauri lagani be 56 neganai, egu gaukara gabuna ena faktori idia koua dainai, egu moni gaukara amo lau doko. Guna lau ura dikadika ful-taim hesiai gaukara lau karaia, unai dainai unai nega lau gaukaralaia lau painia totona. Gavamani amo lau abia heduru monina (pension) be hegeregere lasi dainai, mauri ia auka. To, Mercedes be gabu hagoevaia moni gaukara ia karaia. Unai dainai, ai dekenai idia noho gaudia be hegeregere. Lau be lau do painia noho, bona Mercedes be nega ta ta ai heduru painia ia karaia. Momokani, emai haroro gaukara ai moalelaia bada.

Lagani haida gunanai, Mercedes be nega momo kekeni matamata ta ladana, Merche dekenai iseda magasin ia abia lao. Merche be ia maragi neganai Baibel ia stadilaia. Merche ia ura iseda buka bona magasin ia duahia, bona Mercedes ia itaia Merche be Baibel ena hereva momokani ia laloa bada. Bena, Merche be Baibel stadi ia abia dae bona ia goada ia lao. To ena adavana, Vicente be inuinu kekero tauna bona unai kara dainai nega momo ena moni gaukara ia haboioa. Unai dainai ia be moni dalanai Merche ia durua lasi; ena kekero karana dainai kahirakahira edia headava ia dika.

Egu adavana ese Merche ia hamaoroa namona be Vicente ese lau ia hereva henia, bona gabeai Vicente be unai bamona ia karaia. Lau vadivadi henia loulou dainai ia ese Baibel stadi ia abia dae. Vicente be ena mauri ia haidaua matamaia, hegeregere dina haida lalonai ia inuinu lasi. Gabeai, ia be wiki ta o ma haida lalonai ia kekero lasi. Unai murinai, ia ese ena kekero karana ia hadokoa momokani. Bena ia bona ena ruma bese taudia be mai lalotamona ida idia noho. Hari, ia be ena adavana bona natuna kekeni ida Canary Islands dekenai idia noho, bona unuseniai kongrigeisen maragina ta idia durua.

Lauegu Mauri Namona Lau Laloa Lou

Ena be guna egu varavara taudia momo be Baibel ena hereva idia abia dae, bona idia haida be idia mase vadaeni, to Dirava ese lau, egu ruma bese taudia bona varavara ma haida ia hanamoa noho. (Aon. 10:22) Lau moale badina lau itaia lagani 40 gunanai Baibel idia stadilaia taudia momo​​—⁠edia natudia bona tubudia danu​​—⁠be mai abidadama ida Iehova idia hesiai henia noho!

Hari lauegu varavara korikori taudia haida be Witnes taudia, bona idia momo be elda taudia, hesiai taudia bona painia taudia. Egu natuna mero badana bona ena adavana be Spain ena brens opesi dekenai idia gaukara. Danu, Witnes tauna ai lau lao neganai, Spain ai idia noho Witnes taudia edia namba be 3,000 bamona. To, hari edia namba be 100,000 mai kahana. Egu hesiai gaukara lau moalelaia bada, bona unai ibounai dainai Iehova lau tanikiu henia. Ena be lau abia edukeisen be bada lasi, to nega ta ta ai lau be sekit naria tauna durua gaukarana lau karaia.

Lagani haida gunanai, lau kamonai guna lau tubu daekau hanuana dekenai idia noho taudia momo ese unai gabu idia rakatania. Unai hanua taudia be idia ogogami dainai, edia uma gabu bona ruma idia rakatania mauri namona idia tahua totona. To moale gauna be egu hanua taudia haida​​—⁠lau danu​​—⁠be hereva momokani ai diba. Ai diba mauri be mai ena anina bona Iehova hesiai henia karana ese moale bada ia mailaia, bona gau ta ida ita hahegeregerea diba lasi.

[Picture on page 32]

Tadikaka Martínez ena ruma bese taudia momo be hereva momokani lalonai