Lauma Helaga Ena Hakaua Dalanai Raka Bona Gwauhamata Hagugurua
“Lauma ena hakaua hegeregerena umui raka noho bena tauanina ena ura dikana ta do umui karaia lasi.”—GAL. 5:16, NW.
1. Pentekoste dinana ai, edena bapatiso karadia idia vara?
PENTEKOSTE 33 C.E. ai, Iesu ena murinai idia raka taudia be lauma helaga amo idia bapatiso murinai, gado idauidau ai idia hereva diba. Unai be lauma helaga ena harihari gauna. (1 Kor. 12:4-10) Unai harihari gauna bona Petero ese ia henia haroro herevana dainai, kamonai taudia edia hemami be edena bamona? Momo idia mamia “unai hereva ese edia kudouna ia gwadaia,” (NW ). Petero ena hereva dainai, idia helalo-kerehai bona bapatiso idia abia. Baibel ia gwau: “Iena hereva idia abia dae taudia be bapatiso idia abia, bona unai dina tamona lalonai, taunimanima 3000 bamona be edia orea lalonai idia vareai.” (Kara 2:22, 36-41) Iesu ena oda hegeregerena, idia be ranu amo Tamana, Natuna bona lauma helaga ladanai bapatiso idia abia.—Mat. 28:19.
2, 3. (a) Lauma helaga amo bapatiso karana bona lauma helaga ladanai bapatiso karana edia idau mani oi gwauraia. (b) Dahaka dainai hari inai negai Keristani taudia ibounai ese ranu bapatiso idia abia be namo?
2 To, lauma helaga amo bapatiso karana bona lauma helaga ladanai bapatiso karana be mai edia idau, a? Oibe, idia be idau. Lauma helaga amo idia bapatiso taudia be lauma helaga ese ia horoa bona Dirava ena natudia ai idia lao. (Ioa. 3:3) Dirava ese ia horodia iena guba Basileia lalonai Iesu ida pavapava bona hahelaga gaukara do idia karaia; lauma dalanai idia be Keriso ena tauanina ena kahana ai idia lao. (1 Kor. 12:13; Gal. 3:27; Apok. 20:6) Pentekoste dinana ai bona gabeai lagani lalodiai danu, Iehova ese lauma helaga amo bapatiso karana ia gaukaralaia Keriso ida do idia lohia hebou taudia ia abidia hidi totona. (Roma 8:15-17) To, Iehova ena taunimanima ese hebouhebou badadia bona maragidia ai, lauma helaga ladanai ranu dekenai idia karaia bapatiso karana be edena bamona?
3 Keristani taudia momokanidia be ranu bapatiso idia abia neganai, idia hahedinaraia edia mauri be Iehova Dirava dekenai idia gwauhamatalaia. Guba dekenai do idia lao taudia be unai bapatiso idia abia danu. To, ranu dekenai bapatiso abia karana be mai anina bada hari inai negai idia noho tatau bona hahine milioni momo dekenai. Edia helaro be tanobada ai mauri hanaihanai do idia abia. Herevana ta ena helaro be guba ai eiava tanobada ai, to Iehova ena lalonamo ia abia totona, gau badana be Tamana, Natuna, bona lauma helaga ladanai do ia bapatiso. Danu, bapatiso idia abia vadaeni Keristani taudia ibounai edia mauri lalonai ‘lauma helaga ena hakaua hegeregerena ai idia raka noho’ be namo. (Galatia 5:16 duahia.a) Oi be lauma helaga ena hakaua hegeregerena oi raka bona emu gwauhamata oi hagugurua noho, a?
Lauma Helaga Ena Hakaua Dalanai Ita Raka Ena Anina be Dahaka?
4. ‘Lauma helaga ena hakaua hegeregerena ita raka noho’ anina be dahaka?
4 ‘Lauma helaga ena hakaua hegeregerena oi raka noho,’ anina be lauma helaga ena siahu be emu mauri lalonai do oi abia dae bona ena hakaua dalana oi badinaia. Ita gwau diba, anina be dina ta ta ai oi karaia gaudia ibounai lalonai lauma helaga ese oi ia biagua be namo. Galatia karoa 5 be lauma helaga ese ita ia hakaua bona tauanina ena ura ese ita ia biagua edia idau ia hahedinaraia.—Galatia 5:17, 18 duahia.
5. Lauma helaga ena hakaua hegeregerena ita raka anina be edena kara do ita dadaraidia?
5 Bema oi be lauma helaga ena hakaua dalana oi badinaia, tauanina ena ura karadia oi dadaraia. Unai kara be “heudahanai, kara mirodia, matabodaga, kaivakuku tomadiho henia kara, meamea, heai, mama, badu, sibona ena ura tahua kara, hepapahuahu, orea hapararaia kara, laloa dikadia, kekero, lebulebu.” (Gal. 5:19-21) Unai be hegeregere, oi ese “lauma dekena amo tauanina ena kara [oi] hamasea.” (Roma 8:5, 13) Unai be oi do ia durua lauma helaga ese ia karaia gaudia bona ena hakaua dalana sibona oi laloa bada totona, unai amo tauanina ena ura gaudia ese oi do idia biagua lasi.
6. Edena dala ai lauma helaga ena huahua oi hahedinaraia diba? Haheitalai gwauraia.
6 Lauma helaga be emu mauri ia hakaua neganai, Dirava ese ia ura henia karadia, lauma helaga ena huahua unai do oi hahedinaraia. (Gal. 5:22, 23) To, oi diba, unai ia vara totona oi gaukara goadagoada be namo. Mani inai haheitalai ita laloa: Biru tauna be uma ta ia karaia. Oibe, dina ena siahu bona ranu be mai anina bada; bema tubutubu gaudia be unai gaudia idia abia lasi, huahua do idia havaraia lasi. Ita gwau diba lauma helaga be dina ena siahu bamona. Huahua namodia ita havaraia totona, lauma helaga ita abia be gau badana. To, bema biru tauna ia gaukara goada lasi, ena uma gabu be huahua do ia havaraia lasi, ani? (Aon. 10:4) Oibe, bema emu kudouna oi hadibaia namonamo neganai, lauma helaga ena huahua namodia momo do oi hahedinaraia diba. Unai dainai, sibona oi nanadaia, ‘Lau be lauma helaga ena hakaua hegeregerena lau raka bona ena huahua lau hahedinaraia, a?’
7. Bema oi ura lauma helaga ena huahua oi hahedinaraia, dahaka dainai oi stadi bona laloa dobu be mai anina bada?
7 Uma ena aniani momo ia gogoa totona, biru tauna ese tubutubu gaudia dekenai ranu ia henia be namo. Oi danu be lauma helaga ena huahua oi havaraia totona, namona be Baibel amo ia aru mai hereva momokani ranuna be Keristani kongrigeisen amo oi abia. (Isa. 55:1) Reana, oi be kamonai taudia momo oi hadibaia vadaeni, Baibel be lauma helaga ena siahu amo idia torea. (2 Tim. 3:16) Hesiai tauna mai ena kamonai bona mai ena kara maoromaoro ese ita idia durua danu, Baibel amo ia aru mai hereva momokani ena ranu goevana ita lalopararalaia totona. (Mat. 24:45-47) Oibe, ita diba vadaeni dahaka ita karaia be namo. Iseda mauri lalonai lauma helaga ena siahu ia gaukara totona, Dirava ena Hereva do ita duahia bona laloa dobu be gau badana. Bema unai oi karaia, oi be peroveta taudia oi tohotohoa, badina idia be idia abia hereva idia ‘tahua goadagoada bona idia henanadai momo.’ Aneru taudia danu be idia ura gwauhamata garana bona horoa Keristani kongrigeisen edia hereva momokani idia diba.—1 Petero 1:10-12 duahia.
Edena Dala ai Lauma Helaga ese Ita Ia Hakaua?
8. Dahaka dainai Iehova amo lauma helaga totona ita guriguri be gau badana?
8 Baibel ita stadilaia bona laloa dobu sibona be hegeregere lasi. Gau badana be hanaihanai Iehova oi noia oi ia durua bona hakaua totona. “Dirava ese ita noia eiava lalohadailaia gaudia idia hereaia momokani gaudia, ia karaia diba.” (Efe. 3:20; Luka 11:13) Edena dala ai do oi haere bema ta ia henanadai, “Dirava ‘be egu ura gaudia ia diba vadaeni’ dainai, badina dahaka lau guriguri be namo?” (Mat. 6:8) Namona be inai oi laloa, lauma helaga totona oi guriguri neganai, oi hahedinaraia oi be Iehova oi abidadama henia. Hegeregere, bema ta be oi dekenai heduru totona ia noia, ia do oi durua badina oi laloparara ia be oi dekenai ia tabekau. (Aonega Herevadia 3:27 hahegeregerea.) Unai hegeregerena, Iehova ia moale bema lauma helaga totona ia oi guriguri henia, bona oi dekenai do ia henia.—Aon. 15:8.
9. Keristani heboudia ita lao henia karana ese edena dala ai ita idia durua Dirava ena lauma helaga ena siahu ita abia totona?
9 Oi diba danu kongrigeisen hebou bona hebouhebou badadia bona maragidia amo ita be lauma helaga ena siahu ita abia diba. Unai hebou idauidau ai ita noho bona hereva ita kamonai namonamo be gau badana. Unai kara ese ita do ia durua “Dirava ena laloa dobu gaudia” ita lalopararalaia totona. (1 Kor. 2:10) Danu, hebou dekenai haere ita henia karana ese ita ia durua diba. Wiki hani idia hanaia lalonai hebou oi lao henia karana mani oi laloa lou. Nega hida emu imana oi abia isi bona emu haere amo emu abidadama oi hahedinaraia? Emu haere karana do oi hanamoa be namo, a? Bema oi hanamoa be namo, vadaeni vaira wiki lalodiai dahaka do oi karaia oi laloa be namo. Iehova do ia itaia oi ura emu haere karana oi hanamoa bona lauma helaga amo oi do ia durua, hebou amo gau momo oi dibaia totona.
10. Lauma helaga ena hakaua hegeregerena ai ita raka anina ma ta be dahaka?
10 Lauma helaga ena hakaua hegeregerena ita raka anina ma ta be Apokalupo 22:17 dekenai ia noho boiboi herevana do ita badinaia. Unai siri ia gwau: “Lauma Helaga bona Headava Matamata Hahine idia gwau, ‘Oi mai.’ Bona inai hereva idia kamonai taudia danu, namona be idia gwau, ‘Oi mai.’ Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.” Lauma helaga be horoa headava matamata kekeni oreana taudia amo mauri ranuna ena boiboi herevana ia halasia noho. Bema oi be inai boiboi herevana “Oi mai” oi abia dae, oi ura ma haida dekenai do oi gwau, “Oi mai,” a? Unai hahemauri gaukarana ita karaia be hahenamo badana ta!
11, 12. Edena dala ai lauma helaga be haroro gaukara ia hakaua noho?
11 Unai mai anina bada gaukarana be hari inai negai lauma helaga ena hakaua henunai ita karaia noho. Aposetolo taudia edia sivarai amo ita itaia, lauma helaga ese dala ia kehoa misinari taudia be teritori matamatadia dekenai idia lao totona. Aposetolo Paulo bona iena turadia be “Lauma Helaga ese edia dala ia koua, ia gwau, ‘Asia tano dekenai Sivarai Namona umui harorolaia lasi.’ ” Danu idia ia koua Bitunia dekenai do idia lao lasi. Ita diba lasi edena dala ai lauma helaga ese edia dala ia koua, to ia hedinarai goevagoeva lauma helaga be Europe tanodia dekenai Paulo ia hakaua lao. Matahanai ta amo Paulo ia itaia Makedonia tauna ta ese ia boiria idia ia durua totona.—Kara 16:6-10.
12 Hari inai negai, Iehova ena lauma helaga be tanobada hegegemadai haroro gaukarana ia hakaua noho. Ia be matahanai ia gaukaralaia lasi, to lauma helaga amo horoa taudia ia hakaua noho. Bona lauma helaga ese tadikaka bona taihu ia hagoadaia haroro bona hadibaia gaukara idia karaia totona. Ai diba oi be unai mai anina bada gaukarana oi karaia danu. To, inai gaukara dekenai emu moale oi habadaia diba, a?
13. Edena dala ai lauma helaga ena hakaua hegeregerena oi raka diba? Haheitalai gwauraia.
13 Bema Dirava ena taunimanima durua totona idia henia hakaua herevadia oi badinaia, oi be lauma helaga ena hakaua hegeregerena oi raka. Mani Japan amo taihu matamata Mihoko ena haheitalai oi laloa. Ia be painia matamata dainai, ia mamia ia hegeregere lasi lou henia ia karaia namonamo bona ruma tauna ena lalona ia veria totona. Unai nega ai, Iseda Basileia Gaukara lalonai lou henia karaia totona heduru herevadia idia atoa. Bena buklet matamatana A Satisfying Life—How to Attain It idia halasia. Japan dekenai haroro gaukara ai unai buklet be tulu namona ta. Mihoko ese lou henia karaia totona, unai buklet gaukaralaia dalana ia tohoa. Daudau lasi murinai, ia ese guna Baibel stadi idia ura lasi taudia ida stadi ia hamatamaia. Ia gwau: “Egu stadi be momo herea, nega ta stadi ibounai be 12, bona idia haida lau hamaoroa do idia naria sisina!” Oibe, Iehova ena hesiai taudia dekenai lauma helaga ena hakaua dalana oi badinaia neganai, hahenamo momo oi davaria diba.
Dirava Ena Lauma Helaga Dekenai Oi Tabekau
14, 15. (a) Edena dala ai goevadae lasi taudia be edia gwauhamata idia hagugurua diba? (b) Edena dala ai tura namodia oi davaria diba?
14 Oi be Dirava ese ia abia hidi haroro tauna dainai, oi be mai emu maduna haroro gaukara oi karaia totona. (Roma 10:14) Reana, oi mamia oi be hegeregere lasi unai maduna do oi huaia. To, Dirava be horoa taudia dekenai ia karaia bamona, oi dekenai aonega do ia henia, vadaeni oi hegeregere unai gaukara oi karaia totona. (2 Korinto 3:5 duahia.) Emu gwauhamata Dirava dekenai oi hagugurua diba, bema oi gaukara goadagoada bona Dirava ena lauma helaga dekenai oi tabekau.
15 Momokani, ita goevadae lasi taudia be goevadae Diravana, Iehova dekenai iseda gwauhamata ita hamomokania be auka. Do oi davaria hekwakwanai ta be guna oi bamoa taudia ese oiemu mauri dala matamatana do idia itaia bona idia daradara dainai, oi do idia “hereva dika henia.” (1 Pet. 4:4) To, namona be oi laloaboio lasi, idia oi rakatania neganai oi be tura matamatadia oi davaria—tura namodia momokani be Iehova Dirava bona Iesu Keriso. (Iamesi 2:21-23 duahia.) Emu kongrigeisen lalonai idia noho tadikaka bona taihu oi diba namonamo be gau badana, idia be tanobada hegegemadai idia noho Keristani tadikaka oreana ena kahana ta. (1 Pet. 2:17; Aon. 17:17) Iehova ese iena lauma helaga amo oi do ia durua, unai amo tura namodia do oi davaria bona idia ese oi do idia hagoadaia noho.
16. Paulo hegeregerena, dahaka dainai manoka negadia oi “moalelaia” diba?
16 Ena be kongrigeisen lalonai oi idia durua tura namodia idia noho, to dina ta ta ai hahetoho aukadia oi davaria diba. Nega haida oi davaria hekwakwanai dainai do oi lalomanoka, badina hekwakwanai ta murinai ma ta ia vara. Unai bamona negadia ai, Iehova ena lauma helaga totona do oi guriguri. Aposetolo Paulo ia gwau: “Lau manoka neganai, unai be Dirava ena goada lau abia.” (2 Korinto 4:7-10; 12:10 duahia.) Paulo ia diba, herevana dahaka hekwakwanai dainai taunimanima edia goada ia ore, to Dirava ena lauma helaga ese idia dekenai goada do ia henia. Unai dainai, oi lalomanoka bona oi ura ta ese oi ia durua negana ai, Dirava ena lauma helaga be oi ia hagoadaia diba. Paulo ia gwau, ia manoka o dahaka hekwakwanai ia davaria neganai, ‘do ia moalelaia.’ Badina ia mamia ia manoka negadiai, lauma helaga ena siahu ese ia hagoadaia. Oi danu be unai bamona oi mamia diba!—Roma 15:13.
17. Edena dala ai lauma helaga ese oi ia odaia lao emu ura gabuna ai oi ginidae totona?
17 Dirava ena lauma helaga ita abia be gau badana, unai amo iseda gwauhamata ita hagugurua diba. Oiemu tahua gauna be oi ura Iehova do oi hesiai henia ela bona hanaihanai. Mani oi laloa oi be lagatoi oi taria tauna ta. Lauma helaga be lai bamona, bona oi ura emu palai oi atoa daekau, bena unai lai ese lagatoi do ia odaia lao ela bona emu ura gabuna ai oi ginidae, bona dika ta oi davaria lasi. Oi ura lasi Satani ena tanobada dikana ena lauma ese oi ia odaia lao odaia mai. (1 Kor. 2:12) Namona be oi ese lai maorona, lauma helaga, oi abia hidi. Dirava ena Hereva bona iena lauma helaga ese ia hakaua oreana ena heduru amo, lauma helaga ese gabu maorona ai oi ia odaia lao diba.
18. Emu lalona oi hadaia dahaka do oi karaia, bona dahaka dainai?
18 Bema oi be Iehova ena Witnes taudia ida oi stadi noho, bona edia hebamo karana oi moalelaia, to emu mauri oi do gwauhamatalaia lasi bona bapatiso oi do abia lasi, namona be sibona oi nanadaia, ‘Dahaka dainai lau do gwauhamata bona bapatiso lasi?’ Bema oi laloparara hari inai negai, Iehova be ena ura ia karaia totona lauma helaga ia gaukaralaia, bona lauma helaga ena hakaua dalana oi abia dae, vadaeni oi dibaia gaudia oi badinaia be namo. Iehova ese oi do ia hanamoa bada. Ia ese oi dekenai ena lauma helaga do ia henia. Bema oi be lagani momo lalodiai oi bapatiso, oi ese lauma helaga ena siahu oi mamia vadaeni. Oi itaia bona oi mamia vadaeni edena dala ai Dirava ese iena lauma helaga amo oi ia hagoadaia diba. Unai hahenamo be do oi abia noho—oibe, ela bona hanaihanai. Unai dainai, emu lalona oi hadaia lauma helaga ena hakaua hegeregerena oi raka noho be namo.
[Footnote]
a Galatia 5:16 (NW ) ia gwau: “Lauma ena hakaua hegeregerena umui raka noho bena tauanina ena ura dikana ta do umui karaia lasi.”
Oi Laloatao, A?
• “Lauma helaga ena hakaua hegeregerena oi raka” anina be dahaka?
• Dahaka ese oi ia durua diba “lauma helaga ena hakaua hegeregerena oi raka noho” totona?
• Edena dala ai emu gwauhamata oi hagugurua diba?
[Picture on page 15]
Emu kudouna oi hadibaia namonamo totona, oi gaukara goada be namo
[Pictures on page 16,17]
Lauma helaga ese oi ia biagua, a?