Oi Laloatao, A?

Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

• Arona be golo boromakau ia karaia neganai, dahaka dainai Iehova ese ia panisia lasi?

Arona be Dirava ena taravatu, kaivakuku tomadiho henia karana dekenai ia makohia. (Eso. 20:​3-5) To, Mose be Arona dainai ia guriguri bona iena guriguri be “mai ena siahu.” (Iam. 5:16) Arona be lagani momo lalonai Iehova ia abidadama henia. Danu, Arona be taunimanima ese idia doria dainai kaivakuku ta ia karaia. To, gabeai iena kara amo ia hahedinaraia ia be mai ena kudouna ibounai ida unai kaivakuku tomadiho henia taudia ia durua lasi. Mose ese unai taudia do idia hamasea karana ia gwauraia neganai, Levi taudia ibounai​—⁠Arona danu​—⁠be Iehova ena kahanai idia gini. (Eso. 32:​25-29)​—⁠5/15, rau 21.

• Dahaka dainai Iesu ia gwau, “tau ta ese uaina matamata be kopina gunana dekenai do ia udaia lasi”?

Baibel negadiai, animal edia kopina amo idia karaia puse idia gaukaralaia uaina idia udaia totona. (Ios. 9:13) Gabeai, uaina puse matamatana be ia auka. Unai dainai uaina puse gunana dekenai uaina matamatana idia udaia lasi. Uaina pusena gunana lalonai uaina matamata idia udaia neganai, unai puse gunana ena kopina do ia makohi. To, puse matamatana lalonai uaina matamatana idia udaia diba.​—⁠7/1, rau 21.

• Iosua bamona dahaka ita karaia diba eda mauri lalonai ita kwalimu totona?

Iosua be Iehova ena sisiba Baibel lalonai ia badinaia. Dina ta ta ai Iehova ena Hereva ia duahia, laloa dobu bona ia dibaia gaudia ia badinaia. Bema Dirava ena Hereva be hanaihanai ita duahia bona ita dibaia gaudia be iseda mauri lalonai ita badinaia, Iosua bamona, ‘iseda raka do ia namo.’ (Ios. 1:⁠8)​—⁠1/1, rau 9.

• Dahaka ese Keristani tauna o hahinena ia durua diba, bema ena adavana ia heudahanai?

Namona be Baibel ena Hereva ia badinaia tau o hahine ia gwau lasi iena kerere dainai ena adavana ia heudahanai. Namona be oi laloatao: Iehova ia diba oi ese heduru bona lalogoada oi abia be namo. Ia ese Keristani tadikaka o taihu ta ia gaukaralaia diba oi ia durua totona.​—⁠6/15, rau 30.

• Dahaka dainai Kongrigeisen lalonai ma haida edia amo heduru ita abia be namo?

Hari “metau dikadia momo” idia vara dainai, kongrigeisen tadikaka o taihu ese oi idia durua be namo, bona idia ura oi be idia oi durua. (2 Tim. 3:⁠1) Hekwakwanai negadiai, nega momo Keristani taudia idia daradara dahaka do idia karaia, to Iehova ia diba. Ia be kongrigeisen taudia​—⁠oi danu​—⁠ia gaukaralaia diba ma haida umui durua dala maorona idia badinaia totona. (Isa. 30:​20, 21; 32:​1, 2)​—⁠6/15, rau 14.

• Edena dala ai emu natuna oi durua diba duahiduahi ia laloa bada totona?

Emu lalokau bona haheitalai namona ese emu natudia ia durua duahiduahi karana idia laloa bada totona. Danu, idia totona buka haida oi abia be namo. Idia dekenai buka oi duahia badabada. Idia umui hagoadaia idia duahiduahi, bona umui duahia gaudia umui herevalaia. Emu natuna oi hamaoroa oi dekenai buka do ia duahia badabada, bona oi hagoadaia henanadai ia henia totona.​—⁠7/15, rau 25

• Edena dala ai Iesu ese ariara hahinena ta ena dika ia gwauatao?

Adamu bona Heva idia gwau-edeede murinai Iehova be peroveta herevana ginigunana amo ia hahedinaraia garana ta eiava Mesia do ia hedinarai. Gau ta ese Iehova ena ura do ia hagugurua dalana ia koua diba lasi. Unai dainai, Genese 3:15 ena peroveta herevana ia gwauraia neganai, unai be hegeregere Iesu ese boubou gauna ia henia bona kara dika ena davana ia karaia vadaeni. Unai nega ai, ena be Iesu ese ena mauri ia do bouboulaia lasi, to unai ariara hahinena be Iesu ena boubou gauna amo ena dika ia gwauatao vadaeni.​—⁠8/15, rau 6.

• Dahaka dainai taunimanima edia lalohadai ita laloa bada lasi be namo?

Tanobada taudia be Iehova ena lalohadai dahaka be maoro bona dahaka be dika idia laloa lasi. Ita Keristani taudia be iseda Gunalaia Tauna, Iesu Keriso ita tohotohoa. Ia be au dekenai idia kokoa kau ena hemarai ia laloa bada lasi, to ena Tamana ena ladana ia hanamoa. (Heb. 12:⁠2)​—⁠8/15, rau 3.