Lauma Taudia be Daidia?

Europe dekenai, hahine burukana ta be dubu dekenai ia vareai, ena imana dekenai rosary ageva ia noho, bona mai hemataurai ida Maria ena laulau vairanai ia tui diho. Africa dekenai, ruma bese ta ese alkahol ta ladana gin be ia mase varavara tauna ena guria gabuna dekenai idia bubua. America dekenai, tau matamata ta be ia aniani lasi bona ia laloa dobu, badina ia laloa unai dala amo ena gimaia aneruna ia hereva henia diba. Asia dekenai, pris ta be sene taudia edia lauma dekenai pepa mai ena kala idauidau ia gabua.

TAUNIMANIMA haida be dahaka idia abia dae? Idia abia dae gabu ta dekenai lauma taudia idia noho, idia hereva henidia diba, bona idia ese taunimanima edia mauri idia biagua. Oibe, ita hoa lasi badina unai lalohadai be taunimanima ibounai ese idia abia dae. To hoa gauna be inai, edia lalohadai lauma taudia dekenai be idauidau.

Muslim taudia be Allah,a idia tomadiho henia. Kerisendom taudia idia gwau Dirava be Toi Tamona​—⁠Tamana be Dirava, Natuna be Dirava, bona Lauma Helaga be Dirava. Hindu taudia idia abia dae tatau bona hahine diravadia tausen momo idia noho. Haida idia gwau lauma taudia be animal, au, bona sinavai maragidia lalonai idia noho. Ma haida be buka, muvi, bona TV program idauidau amo aneru bona demoni, lauma dikadia, tau bona hahine diravadia edia laulau idia itaia, unai ese edia lalona ia veria.

Taunimanima edia lalohadai tatau bona hahine diravadia dekenai be idauidau, bona edia lalohadai unai diravadia hereva henia dalana dekenai be idauidau danu. To ita gwau diba idia ita hereva henia daladia ibounai be idia maoro lasi. Mani inai oi laloa: Telefon amo ta ita do rini henia lasi neganai, namona be ita diba daika ita rini henia, bona ita diba momokani unai tauna be ia noho, bona iseda hereva do ia kamonaia. Ia noho momokani lasi tauna ita hereva henia be anina lasi. Koikoi tauna ta ita hereva henia be dika momokani.

Vadaeni, lauma taudia be daidia? Baibel ese unai henanadai ia haerelaia sibona lasi, to daika ita hereva henia bona dahaka haere do ita abia ia hahedinaraia danu. Mani murina herevadia oi duahidia. Reana Baibel ese do ia gwauraia hedinarai gaudia dekenai do oi hoa.

[Footnote]