Lauma Taudia Ita Itaia Diba, A?

ENA be nega daudau lalonai guba oi itaia, to lauma tauna ta do oi itaia lasi. Oi kamonai, to ta do ia hereva lasi. To, oi diba momokani lauma taudia idia noho. Edia diba bona siahu be bada, idia be mai edia ladadia bona edia kara be idauidau. Idia haida idia ura ita idia durua bona ma haida idia ura ita idia hadikaia. Idia ibounai ese ita idia laloa.

Dirava momokanina be Lauma. (Ioane 4:24) Ia be mai ena ladana, bona dirava koikoidia momo amo ia be idau momokani. Iena ladana be Iehova. (Salamo 83:18) Salamo torea tauna ia gwau: “Lohiabada be mai ena ladana badana, inai ladana badana do ita abia isi noho be namo. Ita ese taunimanima edia dirava idauidau do ita gari henia lasi. Lohiabada sibona do ita gari henia bona matauraia. Badina be tanobada bese idauidau edia dirava, be dirava koikoi gaudia sibona. To Lohiabada ese guba bona guba noho gaudia ia karaia vadaeni. Lohiabada be mai ena hairaina, bona mai King Badana ena siahu danu. Iena Dubu Helaga lalonai, iena siahu bona hairaina idia hedinarai noho.”​—⁠Salamo 96:​4-6.

Dirava Momokanina Ita Itaia Diba, A?

Baibel ia gwau: “Matamaia neganai ia mai bona harihari tau ta ese Dirava ia itaia lasi.” (Ioane 1:18) Iena toana bona iena siahu bada ita lalopararalaia diba lasi, matakepulu tauna ese kala idauidau ia lalopararalaia diba lasi hegeregerena. To, tisa namona ese ena stiuden dekenai ia auka gaudia be auka lasi dalanai ia hahedinaraia hegeregerena, Dirava ese Baibel amo, ita itaia diba lasi gaudia be ita itaia diba gaudia amo ia hahedinaraia. Idaunegai, Iehova ese ena kamonai hesiai taudia dekenai matahanai ia henia, unai dala amo ita ia durua guba gaudia be iseda lalona ena matana amo ita itaia, bona iseda hetura karana unuseniai idia noho lauma taudia ida ita lalopararalaia totona.

Hegeregere, peroveta tauna Esekiela ese ia abia matahanaina lalonai, ia itaia Iehova ena hairai be lahi, diari, sapairo nadina, bona kevau bamona. Matahanai ma ta lalonai, aposetolo Ioane ia itaia Iehova be ena terona dekenai ia helai, bona ia gwau Dirava “ena toana be iasipa bona sadio nadi edia diaridiari toana bamona. Bona kevau ese helai gabuna badana ia hagegea, lau itaia iena toana be samaragi nadi bamona.” Unai gaudia ese ia hahedinaraia Iehova ena noho gabuna be hairai momokani.​—⁠Apokalupo 4:​2, 3; Esekiela 1:​26-28.

Peroveta tauna Daniela ena matahanai ta lalonai danu, Iehova ia itaia, ia gwau, “[aneru] momo herea ese unai Tau ena hesiai gaukara idia karaia, bona milioni momo ese [Iehova] vairana dekenai idia gini.” (Daniela 7:10) Unai be hoa gauna momokani! Matahanai ta lalonai, aneru ta ita itaia be hoa gauna, to aneru goevadaedia momo herea mani oi laloa!

Baibel lalonai, inai hereva aneru be kahirakahira nega 400 ia hedinarai bona edia dagi ladadia be hegeregere, serapi bona kerubi. Baibel lalonai Grik bona Heberu gado herevadia idia hahanaia “aneru” ena anina be “hereva gwauraia tauna.” Unai dainai, aneru be ta ta ida idia herevahereva diba bona guna idia be taunimanima ida idia herevahereva. Aneru be guna tanobada ai idia noho taudia lasi. Iehova ese taunimanima ia do karaia lasi neganai, unai lauma taudia ia havaraia guna.​—⁠Iobu 38:​4-7.

Daniela ena matahanai lalonai, aneru momo herea be mai anina bada gauna ta itaia totona idia hebou. Bena Daniela ia itaia “Tau ta . . . iena toana be taunimanima edia toana bamona,” ia be Iehova ena terona kahirakahira ia lao bona Iehova ese “siahu bona mataurai bona dagi bada be unai Tau dekenai ia henia, bese ibounai bona iduhu ibounai bona gado ibounai taudia ese iena hesiai gaukara do idia karaia.” (Daniela 7:​13, 14) “Taunimanima edia toana” ia abia tauna be aneru ibounai edia biaguna, ia be Iesu Keriso, mase amo ia toreisi lou tauna, Dirava ese ia dekenai siahu ia henia tanobada ibounai ia lohiaia totona. Ena lohia dalana ese taunimanima edia gavamani edia gabu do ia abia bona gorere, taitai, dagedage, hitolo, bona mase danu do ia haorea.​—⁠Daniela 2:⁠44.

Iesu ia lohia neganai, kamonai anerudia be idia moale bada, idia be taunimanima edia namo idia laloa bada. To madi, lauma taudia ibounai be unai bamona idia laloa lasi.

Dirava Bona Taunimanima Edia Inai Taudia

Adamu ena negai, aneru ta ia ura bada taunimanima ese ia do idia tomadiho henia, unai dainai Iehova ia dadaraia bona sibona Satani ai ia halaoa, ena anina be “Gwau-edeede Tauna.” Kara dika tauna badana Satani, be lalokau bada Diravana Iehova ia gwau-edeede henia. Aneru ma haida be Satani ena gwau-edeede karana idia durua. Baibel ese ia gwauraidia demoni. Satani bamona, unai demoni be taunimanima edia inai taudia dikadia ai idia lao. Unai dainai hari tanobada ai hisihisi momo idia vara, hegeregere kara dika, gorere, hitolo, bona tuari.

Hari Kerisendom tomadiho momo ese Satani ena kara idia herevalaia momo lasi, to Iobu bukana ese unai gwau-edeede aneruna ena kara bona ura ia herevalaia. Ia gwau: “Dina ta, Dirava ena aneru be Lohiabada ena vairanai idia hedinarai, bona Satani danu ia mai, idia edia huana dekenai.” Edia herevahereva lalonai, Satani ia gwau Iobu be Dirava ia hesiai henia badina Dirava ese ia dekenai gau momo ia henia. Iena hereva ia hamomokania totona, Satani ese Iobu dekenai hisihisi bada ia havaraia, ena animal bona ena natudia 10 ia hamasea. Unai murinai, ia ese toto dikana amo Iobu ena tauanina ibounai ia hahisia. To Satani ese Iobu dekenai ia karaia karadia ese ena hereva idia hamomokania lasi.​—⁠Iobu 1:​6-19; 2:⁠7.

Badina namodia haida dainai Iehova ese Satani ena kara be nega daudau lalonai ia haheaukalaia, to do ia haheauka ela bona hanaihanai lasi. Kahirakahira Diabolo do Ia haorea momokani. Ia karaia vadaeni gaudia be Apokalupo bukana ese ia herevalaia. Ia gwau: “Guba dekenai tuari ia vara. Mikaela [Iesu Keriso, mase amo ia toreisi lou tauna] mai ena aneru momo danu ese huala [Satani] idia tuari henia. Huala mai ena aneru momo danu ese Mikaela idia tuari henia. To huala ena goada hegeregere lasi dainai ia kwalimu lasi. Unai dainai huala mai ena aneru be dala lasi guba dekenai do idia noho. Vadaeni unai huala badana, be Dirava ena aneru ese idia negea diho. Ia be unai idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna. Oibe, ia, mai ena aneru ibounai danu, be idia ese tanobada dekenai idia negea diho.”​—⁠Apokalupo 12:​7-9.

Unai siri ia gwau Satani be “tanobada taudia ibounai ia koia noho.” Ia ese tomadiho koikoi ia gaukaralaia taunimanima ia hakaua kerere totona, unai amo idia ese Iehova bona iena Hereva idia dadaraia. Unai bamona koikoi herevana ta be, ta ia mase neganai, ia be lauma tauna ai ia lao. Taunimanima edia lalohadai unai gauna dekenai be idauidau. Hegeregere, Africa bona Asia dekenai, taunimanima momo idia abia dae ta ia mase neganai, ia be ena sene taudia ese idia noholaia gabuna ta dekenai ia lao. Pegatori bona hel ena hahediba herevadia ese ia hahedinaraia, ta ia mase neganai, ena laumana be ia mauri noho.

Mase Taudia be Guba Do Idia Lao, A?

Tanobada hegegemadai, taunimanima milioni momo idia abia dae kara namo taudia be guba dekenai do idia lao, unai lalohadai be edena bamona? Momokani, kara namo taudia haida be guba dekenai do idia lao, to idia mase vadaeni taudia bilioni momo amo edia namba be maragi. Baibel ese ia hahedinaraia taunimanima 144,000 be “Dirava ese . . . tanobada dekena amo ia hamauria” bona idia be “hahelagaia taudia” bona “tanobada do idia gunalaia.” (Apokalupo 5:​9, 10; 14:​1, 3) Idia be taunimanima ena Natuna, Iesu Keriso, ida guba gavamanina, Dirava ena Basileia, dekenai do idia lohia. Unai gavamani ese Satani bona ena demoni do ia haorea bona tanobada be paradaiso ai do ia halaoa. Nega vairai, idia mase taudia momo be do idia toreisi lou, bona tanobada Paradaiso lalonai do idia noho hanaihanai.​—⁠Luka 23:⁠43.

Vadaeni, unai ibounai ese ia hahedinaraia, lauma taudia momo be guba dekenai idia noho. Idia ibounai huanai Iehova Dirava, mauri ia Havaraia Diravana be hereadae. Aneru momo herea be mai kamonai ida ia idia hesiai henia. To aneru ma haida be Satani ese ia hakaudia, idia ese Iehova idia dadaraia bona taunimanima idia hakaua kerere. Danu, taunimanima haida sibona be Dirava ese tanobada amo ia “hamauria,” eiava ia abia hidi, guba dekenai idia lohia totona. Unai gaudia ita laloa noho lalonai, mani ita itaia, edena lauma taudia ita hereva henia diba, bona edena bamona idia do ita hereva henia.