Lauma Taudia ida Ita Herevahereva Diba, A?
SIAHU IBOUNAI DIRAVANA ese lauma taudia haida dekenai maduna idauidau ia henia. Hegeregere, Ia ese Iesu Keriso ia abia hidi tanobada do ia lohiaia, bona kamonai anerudia ia abia hidi sivarai namona harorolaia gaukarana idia durua totona. (Apokalupo 14:6) To, guriguri karana be idau. Ia ese idia dekenai guriguri kamonai henia karana ena maduna ia henia lasi. Iseda guriguri be Dirava sibona ese ia kamonai henia.
Iehova be ‘guriguri ia kamonai’ henia Diravana. (Salamo 65:2) Ia ese iseda guriguri ia kamonai henia bona ia haerelaidia. Guriguri karana dekenai, aposetolo Ioane ese Iehova ena hesiai taudia ia tore henia, ia gwau: “Bema gau ta iena ura hegeregerena ita noia neganai, [Dirava] ese ita dekenai do ia kamonai. Bona ita diba iseda noinoi ibounai ia kamonai dainai, ita diba danu ita noia gaudia do ita abia.”—1 Ioane 5:14, 15.
Kamonai anerudia idia ura lasi idia dekenai ita guriguri. Dirava ese guriguri karana dekenai ia abia hidi dalana idia lalopararalaia bona idia durua, bona nega haida Dirava ese idia ia gaukaralaia danu. Edena dala ai? Hegeregere, Ierusalema idia hadikaia neganai, peroveta tauna Daniela be Iehova ia guriguri henia, bona Iehova ese ena guriguri ia haerelaia totona, aneru Gabriela ia siaia ia do ia hagoadaia.—Daniela 9:3, 20-22.
Mase Taudia be Ita Idia Hereva Henia Diba, A?
Idia mase vadaeni taudia ita hereva henia be namo, a? Sivarai momo ese idia hahedinaraia taunimanima be mase taudia edia lauma ida idia herevahereva. Hegeregere, babalau hahinena ta ese Ireland ai ia noho hahinena ia hamaoroa, ia be hanuaboi ai, Fred, unai hahine ena adavana ida ia herevahereva. To, Fred be wiki haida gunanai ia mase vadaeni. Unai babalau hahinena be Fred ese ia gwauraia herevadia ia gwauraia, reana unai gaudia be ena adavana sibona ia diba. Unai dainai ia auka lasi ena adavana ia abia dae, Fred be lauma taudia edia gabu dekenai ia noho bona babalau hahinena amo ena adavana ia hereva henia. Unai bamona herevadia be Baibel ese mase taudia totona ia gwauraia herevadia ia hakoikoia.—Henunai ia noho maua itaia.
Unai bamona sivaraidia be edena bamona ita gwauraia hedinarai diba? Demoni ese taunimanima idia koia dalana ta be mase taudia edia kara idia tohotohoa, Fred dekenai ia vara karana bamona. Dahaka dainai unai bamona idia karaia? Unai dala amo idia ese taunimanima edia abidadama bona Dirava badinaia karana idia hamanokaia, bena Baibel ena hakaua herevadia idia dadaraia. Oibe, Satani bona ena demoni ese “siahu karadia, hoa bona toa kara koikoidia, bona kara maoromaoro lasi daladia ibounai” idia gaukaralaia taunimanima idia hakaua kerere totona.—2 Tesalonika 2:9, 10.
Babalau hahinedia bona idia ida idia gaukara hebou taudia idia abia dae momokani idia be mase taudia ida idia herevahereva. To momokani, bema idia be mase tauna ta ida idia herevahereva, unai be Iehova idia inai henia laumadia ida idia herevahereva noho. Unai hegeregerena, haida idia laloa idia be Dirava idia tomadiho henia, to unai be lalohadai kererena. Lauma helaga ese aposetolo Paulo ia hasiahua inai hadibaia hereva ia torea totona: “Idau bese taudia ese idia bouboulaia gaudia be demoni dekenai idia bouboulaia, to Dirava dekenai idia bouboulaia lasi.”—1 Korinto 10:20, 21.
Ita diba ita ese Atai Momokani Diravana ita guriguri henia diba, ia ese ita ia lalokau henia bona ita ia laloa bada, vadaeni dahaka dainai ma ta ita guriguri henia? Ma danu, Baibel be inai hagoadaia herevana ia henia: “Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.”—2 Sivarai 16:9.
[Blurb on page 9]
Ita diba ita ese Atai Momokani Diravana ita guriguri henia diba, ia ese ita ia lalokau henia bona ita ia laloa bada, vadaeni dahaka dainai ma ta ita guriguri henia?
[Box/Picture on page 8, 9]
Momokani Bona Koikoi
MOMOKANI: SATANI BE LAUMA TAUNA KORIKORINA
“Satani sibona ese iena kara ia senisia diba, bona ia ese diari aneruna ena kopina ia atoa diba.”—2 Korinto 11:14.
“Do umui laloa maoromaoro, bona naria namonamo. Umui dekenai ia tuari henia tauna, Satani, be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.”—1 Petero 5:8.
“Satani ese hamatamaia nega dekena amo ia kara dika, unai dainai kara dika ia karaia noho tauna be Satani ena tauna.”—1 Ioane 3:8.
“Unai dainai Dirava ena ura do umui karaia. Satani do umui tuari henia, vadaeni umui dekena amo do ia heau boio.”—Iamesi 4:7.
“Satani . . . be alaia tauna, bona hereva momokani be ia badinaia lasi, badina iena lalona dekenai hereva momokani be lasi. Ia be hereva koikoi ia gwauraia, iena kara momokani be unai, badina ia be koikoi tauna, bona ia be koikoi ibounai edia tamana.”—Ioane 8:44.
KOIKOI: MASE TAUDIA BE LAUMA TAUDIA AI IDIA LAO
“Do oi varahu, bona do oi gaukara auka, tano ena anina abia totona, ia lao bona tano dekenai do oi giroa lou, badina be tano dekena amo oi mai. Oi be tano dekena amo karaia gauna, bona tano dekenai do oi giroa lou.”—Genese 3:19.
“Mauri taudia idia diba do idia mase, to mase taudia be gau ta idia diba lasi.”—Hadibaia Tauna 9:5.
“Oiemu imana ese ia davaria gaukara ibounai, be do oi karaia mai oiemu goada ibounai danu. Badina be mase taudia edia gabu, oi lao gabuna, dekenai be kara ta lasi, laloa ta lasi, diba bona aonega ta lasi.”—Hadibaia Tauna 9:10.
“Idia mase neganai tano ena kahu dekenai idia giroa lou. Edia mase dina dekenai, idia ura do idia karaia gaudia be do idia doko.”—Salamo 146:4.
MOMOKANI: KAMONAI ANERUDIA BE ITA IDIA LALOA BADA
“Lohiabada ena aneru ese, Dirava dekenai idia gari taudia ia naridia noho, bona dika dekena amo ia hamauridia noho.”—Salamo 34:7; 91:11.
“Aneru ibounai be Dirava ena hesiai gaukara laumadia, ani? Dirava ese idia ia siaia lao, mauri do idia abia taudia durua totona.”—Heberu 1:14.
“Aneru ma ta lau itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia. Ia boiboi goadagoada, ia gwau, ‘Dirava do umui gari henia, ia do umui hanamoa bada.’ ”—Apokalupo 14:6, 7.
KOIKOI: IESU BE DIRAVA IDA IA HEGEREGERE
“Lau ura umui diba, tatau ibounai edia kwarana be Keriso, hahine edia kwarana be edia tau, bona Keriso ena kwarana be Dirava.”—1 Korinto 11:3.
“Dirava ese gau ibounai Keriso henunai ia atoa murinai, Natuna ese sibona Dirava ena henunai do ia atoa, Oibe, Dirava, gau ibounai Keriso henunai ia atoa Diravana, be unai neganai gau ibounai edia biaguna momokani do ia lao.”—1 Korinto 15:28.
“Momokani, momokani umui lau hamaoroa, Natuna be sibona kara ta ia karaia diba lasi, to ia ese iena Tamana ena kara ia itaia noho, vadaeni unai kara sibona ia karaia.”—Ioane 5:19.