Karaharaga Kamonai Taudia Lou Henia
1 “Hari oi karaia diba gaudia be kerukeru totona oi rakatania lasi.” Momo ese unai hereva idia diba, ita ia hagoadaia mai anina gaudia be karaharaga do ita karaia. Iseda haroro gaukara lalonai unai hakaua herevana ita badinaia diba be inai ekspiriens ese ia hahedinaraia.
2 Taihu ta ese tau ta dekenai buka ia hariharilaia bona ia gwauhamata do ia giroa lou. Hora tamona murinai, taihu ma ta be ia diba lasi dainai unai ruma dekenai ia lao. Unai tau be iduara dekenai ia mai, unai buka ia dogoatao noho, bona taihu ia hamaoroa: “Oi gwau do oi giroa mai neganai, lau laloa lasi karaharaga momokani do oi mai, to mani oi vareai, lau hegeregere egu stadi ita karaia totona.”
3 Ena be lou henia be unai bamona ita karaia haraga lasi, to unai ekspiriens ese ia hahedinaraia iseda haroro gaukara lalonai ita davaria kamonai taudia be karaharaga ita lou henia be namo, ita naria daudau lasi. August lalonai buklet idauidau do ita hariharilaia.
4 Taunimanima Ita Durua be Namo: Taunimanima ese eda buklet lalonai ia noho diba idia lalo-pararalaia totona bona edia mauri bona vaira negana dekenai unai diba be mai anina bada idia laloa totona, lou henia ita karaia, dina haida sibona murinai ita karaia be namo. Edena bamona unai do ita karaia? Reana ruma tauna oi hadibaia do oi giroa lou neganai ena kamonai karana ena bada oi dibaia.
5 Lou Henia Totona Dala Oi Karaia: Hari inai tanobada ai, ita gwauraia negana dekenai ruma tauna do ita davaria totona ia amo gwauhamata ita abia be auka, bona reana unai nega do ia laloatao lasi. To, bema unai bamona lou henia ena nega oi gwauraia namonamo bona unai lou henia do oi karaia—bema mai dalana dina haida sibona lalonai—unai nega badinaia karana dekenai sibona emu maduna oi huaia namonamo. Bema ruma tauna ia noho lasi, oi hekwarahi noho ia oi davaria totona. Reana emu vadivadi ia laloa bada bema ia itaia ia oi davaria totona oi gaukara goadagoada.
6 Nega ginigunana ta ita vadivadi henia neganai ita diba momokani lasi ia be kamonai tauna eiava lasi, unai dainai ena be ia kamonai sisina sibona to oi lou henia be namo. Namona be karaharaga unai bamona taudia oi lou henia. Reana unai tauna ena lalona oi veria iseda buklet ta ia ura henia totona, bona lou henia oi karaia neganai reana oi hoa badina oi ia abia dae mai moale ida. Unai dainai, namona be karaharaga kamonai taudia oi lou henia!