Oi Hegeregere Regular Pioneer Gaukara Oi Karaia Totona, A?
1 Ta ese regular pioneer gaukara do ia karaia diba totona, gau badana be hua 6 ia bapatiso vadaeni bona hua ta ta iboudiai ia haroro. Namona be ia hegeregere lagani ta ta iboudiai lalonai hora 1,000 haroro hesiai gaukarana do ia karaia diba totona. Danu, namona be kara miro ta ia noho lasi bona ia be Keristen haheitalai namona ai ia lao vadaeni. (om-MO rau 113-14) Unai ena anina be dahaka ia karaia danu? Ta ese pioneer gaukara ia ura karaia neganai, iena kara dekenai elda taudia ese dahaka idia tahua be namo?
2 Kara namona ena anina be tauanina dalanai bona lauma dalanai ia goeva. Ta ese pioneer gaukara do ia karaia totona gwaumaoro idia henia neganai, unai ena anina be kongregesen taudia bona Witness lasi taudia idia diba ia be Keristen ena kara ia badinaia. Mai ena lalona ibounai ida ia be Iehova ia abidadama henia tauna. Ena mauri lalonai lauma huahua do ia hahedinaraia be gau badana. Pioneer tauna be Basileia ena haroro gaukara bona hahediba gaukara do ia lalodia guna. Namona be ruma-ta-ruma-ta gaukara dekenai Baibel gaukaralaia dalana ia diba namonamo, kamonai taudia ia lou henidia, bona Baibel stadi hamatamaia bona karaia noho dalana ia diba. Pioneer taudia be elda edia orea taudia edia ura haroro gaukara bona haroro totona idia hebou dalana idia badinaia be gau badana.
3 Bema hahemaoro komiti ese tau ta idia sisiba henia, eiava guna orea murimurinai idia atoa to hari ia vareai lou, heduru eiava regular pioneer gaukara do ia karaia diba lasi ela bona lagani tamona ia hanaia vadaeni. Ma danu, bema hahemaoro komiti be tau ta dekenai taravatu haida idia atoa, unai tau be pioneer gaukara ia karaia diba lasi ela bona unai taravatu iboudiai idia kokia.
4 Idia gwau hua haida lalodiai heduru pioneer gaukara oi karaia guna, bena emu ladana idia siaia regular pioneer gaukara oi hamatamaia diba totona, a? Lasi. To, bema heduru pioneer gaukara oi karaia guna, regular pioneer gaukara ena sediual oi badinaia be ia auka momokani lasi. Elda taudia idia ura diba guna, ta ia hegeregere eiava lasi hua ta ta iboudiai hora 90 ia davaria totona, bona hesiai lagani ta ta iboudiai dokonai hora 1,000 ia davaria totona. Society ese ia gwauraia lasi taravatudia be idia dekenai do idia atoa lasi.
5 Kongregesen ena memba tauna ta be Regular Pioneer Gaukara Aplikesen pepana ta ia torea bona kongregesen gunalaia tauna dekenai ia henia neganai, namona be Kongregesen Hesiai Komiti taudia be karaharaga idia laloa. Namo lasi pioneer tauna ia naria daudau badina komiti ena elda tauna ta be pura tamona eiava rua ia noho lasi dainai. Namona be elda tauna ma ta be iena gabu ia abia ela bona ia giroa mai. Bema Kongregesen Hesiai Komiti taudia ese unai aplikesen pepana idia hamomokania, unai pepa idia do siaia lasi neganai, elda edia orea taudia idia hadibaia, bena unai elda ma haida edia hereva idia kamonai diba.
6 Regular Pioneer Gaukara Aplikesen pepana dekenai elda taudia be aplikesen torea tauna ena ripoti hanaia hua 6 lalodiai ia torea hedinarai. Elda taudia idia ura diba aplikesen torea tauna be hua ta ta iboudiai haroro hora ia hagugurua diba eiava lasi. Hua 6 lalodiai pablisa ta ena haroro gaukara be reana hua momo lalodiai do ia karaia diba gaukarana ia hahedinaraia lasi. Reana hua tamona eiava rua lalodiai ena haroro hora idia daekau badina unai hua lalodiai ia hekwarahi bada, to hua ma haida dekenai ia hekwarahi momo lasi, namona be unai idia laloa. Unai dainai, namona be pioneer gaukara ia ura karaia tauna ena haroro gaukara hua 6 lalodiai idia itaia. Reana ia haroro ena hora ena averes be bada, to bema haroro gaukara amo huahua ia davaria momo lasi, reana elda taudia do idia hamaoroa namona be hesiai gaukara dekenai iena manoka gabudia do ia hanamoa guna, bena gabeai pioneer gaukara do ia karaia. Aplikesen idia davaria neganai, bema elda taudia idia hamomokania lasi, namona be aplikesen torea tauna idia hadibaia ena fom idia siaia lasi, bona dahaka dainai idia siaia lasi idia hadibaia. Gabeai do ia hegeregere totona, namona be elda taudia idia hadibaia edena bamona iena manoka gabudia do ia hanamoa diba. Bema gabeai elda taudia idia laloa ia hegeregere bona ena aplikesen gunana idia hamomokania, namona be pioneer gaukara do ia hamatamaia huana do idia haidaua.
[Questions]
1. Bema ta ia ura regular pioneer gaukara ia karaia, namona be edena daladia ai idia hegeregere be namo?
2. Ia hegeregere regular pioneer gaukara karaia totona tauna ena mauri lalonai dahaka kara ia hahedinaraia?
3. (a) Hahemaoro komiti taudia ese ta idia sisiba henia eiava orea dekenai ia vareai lou, hua hida do idia hanaia murinai gwaumaoro do idia henia diba regular eiava heduru pioneer gaukara do ia karaia diba totona? (b) Ta dekenai taravatu idia atoa neganai gwaumaoro idia henia diba pioneer gaukara ia karaia totona, a?
4. (a) Idia gwau ta ese heduru pioneer gaukara ia karaia guna, bena gabeai regular pioneer ia karaia diba, a? (b) Regular pioneer gaukara karaia totona ta ena ladana idia do siaia lasi neganai, elda taudia be dahaka idia diba guna be gau badana?
5. Regular Pioneer Gaukara Aplikesen pepana idia davaria neganai, Kongregesen Hesiai Komiti taudia ese dahaka idia karaia be namo?
6. (a) Dahaka dainai Kongregesen Hesiai Komiti taudia be regular pioneer gaukara ia ura karaia tauna ena haroro gaukara hanaia hua 6 lalodiai do idia laloa? (b) Bema elda taudia idia laloa ia do hegeregere lasi, dahaka do idia karaia be namo?
This article is unique to PNG.