Pioneer Taudia Ta Ta Iboudiai Durudia Bada
1 Elda edia orea taudia iboudiai, Kongregesen Hesiai Komiti taudia danu, be pioneer ta ta iboudiai idia durudia be namo. Henunai ai torea henanadai ese elda taudia idia durua, bena idia lalo-parara pioneer taudia be edena bamona do idia durudia diba: Pioneer taudia be hesiai gaukara ena kahana ibounai idia karaia namonamo, eiava lou-henia bona Baibel-stadi gaukara dekenai heduru idia abia be namo? Lauma helaga ena huahua idia hahedinaraia, bona maino bona lalo-tamona dekenai idia gaukara hebou, a? (Roma 14:19) Idia badinaia diba sediual karaia totona idia haida be heduru idia abia be namo, a? Sibodia edia stadi idia karaia hanaihanai, bona hebou dekenai idia haere, a? Bema elda taudia idia ura dikadika pioneer taudia idia durudia, pioneer taudia ese dahaka idia abia be namo bona edia noho be edena bamona do idia tahua namonamo, bona nega momo idia ida idia herevahereva hebou.
2 Elda taudia be mai edia lalokau danu pioneer taudia edia namo idia tahua dainai, pioneer taudia idia moale. Society dekenai idia siaia toretore lalodiai, nega momo pioneer taudia idia gwau idia moale badina elda edia orea taudia be mai edia lalokau danu edia namo idia tahua dainai. Nega haida, unai heduru idia davaria dainai haida be ful-taim hesiai gaukara lalonai idia do gaukara noho.
3 Namona be elda taudia danu be pioneer taudia edia taravatu idia badinaia, unai be haroro hora idia hagugurua danu. Momokani, bema pioneer tauna ta be nega sisina lalonai hekwakwanai ia davaria dainai, ena haroro horadia ia hagugurudia lasi, idia gima noho elda taudia ese karaharaga unai tauna do idia durua; namo lasi idia gwau bema ena kara ia hanamoa lasi, pioneer gaukara amo do idia kokia. Pioneer ese hekwakwanai ia davaria neganai, namo lasi elda taudia be hua haida idia ore murinai idia durua toho; badina unai bamona idia karaia neganai, reana unai pioneer tauna ena haroro horadia ia hagugurudia diba lasi, bena ia lalohisihisi bona ia gwau namona be pioneer gaukara do ia hadokoa.
4 Pioneer tauna ia davaria hekwakwanai be hua haida murinai do ia hanaia diba, a? Bema oibe, elda taudia be edena bamona idia durua diba? Ena be pioneer tauna ia davaria hekwakwanai be ia mo sibona ia hamaoromaoro diba gauna ta, to elda taudia ese idia hagoadaia diba, idia hanamoa diba bona ia badinaia diba sisibana idia henia danu be namo.
5 Namona be elda taudia idia naria namonamo, bema edia heduru idia tahua lasi, namo lasi pioneer tauna eiava ena ruma bese dekenai idia vara gaudia idia henanadailaia momo. To, bema hekwakwanai badana ta ia vara bona ia hedinarai goevagoeva pioneer tauna be ena haroro horadia be vaira hua momo lalodiai reana do ia hagugurua diba lasi, reana elda taudia do idia gwau namona be pioneer lisi amo do idia kokia ela bona unai hekwakwanai ia hamaoromaoroa diba.
6 Namo lasi pioneer taudia be Society dekenai revareva idia siaia, to namona be edia hekwakwanai be elda taudia danu do idia herevalaia. Bema heduru ma haida idia abia be namo, elda taudia ese Society do idia tore henia. Sekit naria tauna ena vadivadi negana lalonai, bema pioneer taudia be mai edia hekwakwanai dainai edia pioneer gaukara ia hadikaia diba, namona be idia gari lasi to sekit naria tauna dekenai idia lao bona idia hereva henia. Unai bamona kara badinaia dalana amo inai namo idia vara. Elda taudia be unai pioneer tauna idia diba namonamo. Iena kara bona lalohadai toana idia diba—ia be gaukara namonamo tauna eiava ia be sibona ena namo ia laloa, gau ibounai ia karaia namonamo eiava ia hegaegae momo lasi tauna. Elda taudia be iena ruma bese noho dalana idia diba, iena tauanina ena goada, iena moni gaukara sediual, bona iena pioneer gaukara ia hakererea diba gaudia ma haida idia diba. Ai laloa elda taudia be idia hegeregere momokani idia gwau diba, namona be ta be do ia pioneer noho eiava ena ful-taim hesiai gaukara amo do ia doko.
7 Elda taudia be pioneer tauna danu idia herevahereva hebou murinai, bema elda taudia idia laloa ena hekwakwanai be nega sisina sibona do ia noho bona hesiai lagani ia do ore lasi neganai, ia hegeregere ena haroro horadia do ia hagugurudia totona, vadaeni idia hagoadaia bona heduru hereva idia henia sibona. To bema pioneer tauna ia davaria hekwakwanai be bada bona ia be dala lasi hamaoromaoroa haraga totona, bena hesiai lagani ia do ore lasi neganai ena haroro horadia ia hagugurudia diba lasi, bema elda taudia idia laloa ia maoro, March 1978 Iseda Basileia Gaukara pepana [km-E Aust.], paragraf 18-20 ese ia kikilaia hegeregerena idia karaia diba. Bema elda taudia idia laloa namona be pioneer gaukara ia karaia noho, idia be Congregation Publisher Record kadi dekenai ena sivarai idia torea, bona idia hagoadaia unai negana amo ena haroro horadia do ia hagugurudia totona, bona guna ia davaria lasi horadia do ia laloa lasi. Bema elda taudia idia laloa ena hekwakwanai do ia hamaoromaoroa haraga diba lasi, bona unai hekwakwanai dainai ia pioneer lasi be namo, do idia hamaoroa pioneer gaukara amo do ia doko ela bona ia hegeregere ia karaia lou totona, namona be fom maorona dekenai elda taudia ese Society idia hadibaia. Elda taudia ese unai ataiai ai gwauraia Iseda Basileia Gaukara pepana ena hereva ta badinaia karana dekenai idia daradara neganai sibona, Kongregesen Hesiai Komiti taudia ese Society idia tore henia, hereva ma haida do idia diba totona. Unai idia karaia neganai pioneer ena hekwakwanai ibounai ena sivarai do idia torea hedinarai, hari hesiai lagani lalonai ena haroro horadia do idia torea danu.
8 Hesiai lagani ta ta iboudiai edia dokonai, Kongregesen Ena Ripoti pepana ena murina kahana dekenai, regular pioneer taudia bona edia haroro horadia be lisi dekenai idia torea neganai, bema pioneer ta ese ena haroro horadia ia hagugurua lasi, namona be revareva kwadogina amo Kongregesen Hesiai Komiti taudia ese unai ena badina do idia torea hedinarai. Hesiai lagani matamatana dekenai ena kara do ia hamaoromaoroa diba dalana idia torea danu. Society be nega ta ta sibona unai toretore idia haerelaia, unai be edia ura hegeregerena.
9 Ai ese sekit naria taudia ai hadibaia pioneer taudia edia namo idia tahua totona. Sekit naria tauna ena vadivadi kongregesen dekenai be ia kwadogi, unai dainai reana ia be nega bada lasi pioneer ta ta iboudiai ia hereva henidia totona. To, kongregesen ena faila ia sekea neganai, pioneer taudia danu ia hebou neganai, bona haroro gaukara dekenai idia danu ia gaukara hebou neganai, do ia lalo-parara ta ta be edena bamona ia durua bona hagoadaia be namo. Iena sediual hegeregerena, namona be haroro gaukara lalonai pioneer bona pablisa taudia idauidau momo ida do idia gaukara hebou be namo. Pioneer taudia be idia momo neganai, reana ena vadivadi ta dekenai idia haida ida do ia gaukara hebou, bona gabeai do ia vadivadi neganai ma haida ida do ia gaukara hebou diba. Bema ia laloa pioneer taudia haida be heduru idia abia be namo, elda taudia do ia hadibadia bona unai pioneer taudia be edena bamona idia durudia edia gaukara do idia hanamoa totona do ia hadibadia danu.
[Questions]
1. (a) Daidia be pioneer taudia edia namo idia laloa bada? (b) Pioneer taudia lalodia totona, elda taudia ese dahaka henanadai idia laloa be namo?
2. Elda taudia ese pioneer taudia idia durudia dainai idia moale, edena bamona unai ita diba?
3. Bema elda taudia idia itaia pioneer ta be ena haroro horadia ia hagugurudia lasi, dahaka do idia karaia be namo?
4. Ena be pioneer ena hekwakwanai be ia mo sibona ia hamaoromaoro diba gauna, to elda taudia be dahaka do idia karaia be namo?
5. Hekwakwanai badana ia vara neganai, reana elda taudia idia laloa dahaka do idia karaia be namo?
6. Dahaka dainai pioneer taudia ese edia kongregesen elda taudia dekenai edia hekwakwanai do idia herevalaia be namo?
7. (a) Bema pioneer tauna be nega sisina sibona lalonai ena haroro horadia ia hagugurudia lasi, elda taudia ese dahaka idia karaia be namo? (b) Bema pioneer tauna ese ena hekwakwanai ia hamaoromaoroa haraga diba lasi, elda taudia ese dahaka idia karaia be namo? (c) Edena negai sibona elda taudia be pioneer tauna ena hekwakwanai be Society dekenai do idia tore henia?
8. Lagani ta ta iboudiai, Kongregesen Ena Ripoti pepana ena murina kahana dekenai Hesiai Komiti be Society totona dahaka sivarai idia torea hedinarai?
9. Sekit naria tauna ese pioneer taudia be edena bamona ia durudia diba?
This article is unique to PNG.