Haroro School amo Hahenamo Momo Abia Dalana
1 Haroro School be ita ia durua bada “hadibaia dalana” ita diba totona, bena Baibel ena hereva momokani be taunimanima dekenai ita harorolaia namonamo diba. (2 Tim. 4:2, NW) Pura ta ta iboudiai mai anina bada Baibel hereva idauidau edia anina ita lalo-pararalaidia. Unai haroro school amo mai anina bada herevadia amo hahenamo momo do ita abia totona, dahaka do ita karaia?
2 Haroro School naria tauna ena hamatamaia herevadia ita kamonai henia namonamo, badina ia ese unai hebou lalonai do ita kamonai hereva namodia haida do ia gwauraia hedinarai. Bema henanadai haida ia gwauraia, ita laloa haroro gaukara dekenai edena bamona unai henanadai do ita haerelaia diba.
3 Hereva Namba 1 karaia dalana be idia torea pepana ia riviulaia sibona lasi. Unai hereva oi badinaia diba bona oi ia durua diba dalana ia hahedinaraia. Bema oi hegaegae guna, unai hereva badadia do oi laloa namonamo diba, bona henanadai ia gwauraia neganai haere oi henia diba.
4 Pura ta ta iboudiai Baibel duahiduahi oi duahia hegaegae neganai, unai ese emu moale Dirava ena Hereva dekenai do ia habadaia. Stadi karana amo hereva matamata idauidau momo do oi diba, bona unai ese hereva momokani dekenai emu lalo-parara do ia habadaia. Baibel ena karoa edia hereva badadia ia gwauraia tauna be Baibel siri ena hereva ia gwauraidia sibona lasi. Unai siri edia sivarai do ia kikilaia sisina murinai, hereva henia tauna be idia henia siridia edia hereva badadia do ia gwauraia hedinarai bona edia anina iseda mauri bona tomadiho dekenai do ia hahedinaraia. Kamonai namonamo bena diba do oi abia bona Baibel ena sisiba do oi badinaia namonamo dalana do oi diba.—Sal. 119:105.
5 Bema stiuden tok ta oi idia henia, namona be guna oi idia henia sisiba herevana oi laloa. Haroro School ena Buka dekenai ia noho heduru herevana oi duahia emu manoka gabuna hanamoa totona, bona unai hereva oi badinaia toho. Oiemu tok hegaegaelaia totona sivarai haida oi abia hidi neganai, namona be haroro gaukara lalonai ita gaukaralaia diba herevadia oi tahudia.—sg-MO rau 22-24.
6 Bema oi be taihu ta bona Hereva Namba 3 eiava Hereva Namba 4 oi idia henia, namona be karaia dalana be taunimanima dekenai ia vara diba gauna amo oi haheitalaia. Ruma tauna be oiemu hereva haida ia ura eiava ia ura lasi be oi ura karaia dalana hegeregerena; namona be oi durua Baibel ia gwauraia dala maorona do ia laloa namonamo totona. (sg-E rau 153-8) Unai ese helai taudia ia durudia badina haroro gaukara dekenai bema ta ia gwau ia ura lasi, idia hanaia dalana idia diba. Emu tok oi hegaegaelaia namonamo guna, bona idia gwauraia ruma tauna ida umui karaia toho totona, nega oi gwauraia. Namo lasi hebou ia heau noho lalonai unai tok umui karaia toho.
7 Namona be hereva idia henia gwauraia taudia be platfom kahirakahira dekenai do idia helai. Unai ese nega do ia haorea kava lasi bona school naria tauna be sisiba ia henidia neganai, ia vaira henidia diba. School naria tauna ese Haroro School ena Buka amo mai hebogahisi ida sisiba ia henia neganai, helai taudia iboudiai ese namo idia davaria diba. Sisiba ia henia neganai, reana Haroro Sisiba pepana ena namba idia torea bamona do ia karaia lasi; hereva ia henia tauna dekenai sisiba ia henia neganai, ena manoka gabudia do ia laloa guna; unai ese ia durua ia namo ia lao totona.
8 Unai be badina namodia pura ta ta iboudiai Haroro School totona ita hegaegae bona ita lao henia totona. Unuseniai ita idia hadibaia herevadia ese ita idia durua mai aonega danu haroro gaukara do ita karaia namonamo totona.—Her. 1:5.
[Questions]
1. Haroro School ese ita edena bamona ia hadibaia?
2. Dahaka hereva do ita kamonai henia namonamo?
3. Hereva Namba 1 amo namo do oi davaria totona, hegaegae guna karana be edena bamona oi ia durua diba?
4. Pura ta ta iboudiai Baibel duahiduahi oi duahia hegaegae ena namo be dahaka?
5. Stiuden tok oi idia henia neganai, dahaka do oi karaia?
6. (a) Taihu ese Hereva Namba 3 bona 4 idia karaia diba dalana be dahaka? (b) Unai ese helai taudia be edena bamona ia durudia diba?
7. (a) Dahaka dainai hereva idia henia gwauraia taudia be platfom kahirakahira dekenai idia helai be namo? (b) School naria tauna ese hereva idia henia taudia ta ta dekenai sisiba ia henidia ena badina be dahaka?
8. Haroro School ese ita edena bamona ia durua haroro gaukara ita karaia namonamo totona?
This article is repeated in km 1/96 entitled “Haroro Sikuli amo Hahenamo Abia Daladia.”