Kamonai Taudia Oi Lou Henidia
1 Ita momo be magasin bona buklet hariharilaia gaukarana dekenai ita kwalimu. Kamonai tauna ena lalona ita veria noho totona ita lou henia be gau badana. Unai lou-henia gaukara dekenai do ita kwalimu totona, ita do lou henia lasi neganai ita hegaegae guna be gau badana.
2 Laloaboio lasi, memero kekeni bona tatau bona hahine ese idia lalohisihisilaia gaudia momo be idia hegeregere. Noga! magasin momo lalodiai, memero kekeni ese hari inai negai idia davaria hekwakwanai idia kikilaia. Unai sivarai ese memero kekeni, edia tama sina danu, aonega idia henia, bona idia durudia, bena idia lalo-parara edia mauri lalonai dahaka be gau badana.
3 Bema January-March “Noga!” magasin oi hariharilaia vadaeni, namona be gabeai April-June gauna do oi henia toho. Reana inai bamona do oi hereva diba:
◼ “Guna oi dekenai lau rakatania Noga! magasin ena sivarai haida be hari inai nega ai taunimanima idia kamonai henia miusik ena dika ia gwauraia, bona ia hahedinaraia unai miusik ese memero kekeni ia hasiahua idia badu bona idia gwau-edeede totona. To memero kekeni haida idia laloa namonamo diba bona kara namodia idia badinaia. Inai Noga! magasin matamatana lalonai, ia hahedinaraia bogana lalonai natuna hamasea karana be ia vara momo, lalohekwarahi bada gauna unai; to memero kekeni momo ese Baibel ena taravatu idia matauraia bona idia badinaia bona mauri idia laloa bada. Lau laloa inai sivarai do oi moalelaia.”
4 Buklet ta do oi hariharilaia totona reana oi laloa dala namona be inai bamona do oi hereva:
◼ “Guna lau mai neganai lau moale badina dina vairai inai tanobada dekenai dahaka do ia vara ita kikilaia sisina. Namona be inai oi laloa, Dirava ese kara dika bona hisihisi do ia haorea neganai, tanobada ena mauri be edena bamona? [Mauri Ena Anina be Dahaka—Edena Bamona Oi Davaria Diba? buklet ena rau 31 laulauna oi hahedinaraia.] Rau 29 bona 30 dekenai idia torea Baibel siridia oi itaia, idia iboudiai be Dirava ena Basileia do ia havaraia hahenamo idia gwauraidia. [Siri ta oi abia hidi, bona buklet amo oi duahia.] Lau ura inai buklet oi dekenai lau rakatania.”
5 Lou-henia oi karaia neganai, reana ruma tauna do ia gwau ena tomadiho amo duahiduahi gaudia ia abia dainai ia laloa unai sibona ia hegeregere. Reana inai bamona do oi hereva diba:
◼ “Ena be iseda tomadiho be idauidau, to ita ibounai ita davaria hekwakwanai momo be idia idau lasi, hegeregere raskol karadia, gorere dikadia, ranu, hodahoda bona tano idia dika—unai dainai ita lalohisihisi, unai be momokani, ani? [Naria do ia haere totona.] Oi laloa unai hekwakwanai hanaia dalana ia noho, a? [Petero Iharuana 3:13 oi duahia.] Magasin idia karaia ena badina be Gima Kohorona ena rau 2 dekenai idia torea hedinarai. [Hereva haida oi abia hidi bona oi duahia.] Taunimanima momo be Iehova ena Witness taudia lasi, to aiemai magasin bona buka idia ura duahia badina idia lalodiai Baibel ia gwauraia sivarai mai edia helaro idia toredia.” Bema ruma tauna toana be ia ura kamonai noho, Baibel stadi dalana oi gwauraia hedinarai.
6 Reana inai bamona do oi hereva diba:
◼ “Guna lau mai neganai, iseda tanobada dekenai dahaka do ia vara ita kikilaia. Inai sivarai dekenai dahaka oi laloa? [Nius dekenai ia vara lalohisihisi gauna ta oi gwauraia hedinarai.] Taunimanima be unai bamona sivarai idia kamonai neganai, idia daradara, idia gwau dahaka do ia vara tanobada dekenai? Ai laloa, hari ita be ‘nega dokonai’ ita noho, Baibel ese 2 Timoteo 3:1-5 lalonai ia perovetalaia negana unai.” Unai siri ena hereva badadia oi duahia murinai, oi nanadaia unai kara idia karaia taudia ia itadia eiava lasi. Umui kiki noho totona, Buka Helaga Herevalaia buka ena rau 83-8 amo sinado maragidia amo ta oi abia hidi.
7 Bema ita hegaegae namonamo guna bona ita hahedinaraia ita ura taunimanima ita durudia, vadaeni ita diba kudou-maoro taudia do idia kamonai.—Ioane 10:27, 28.
[Questions]
1. Lou-henia ta ita karaia neganai, ita kwalimu totona dahaka do ita karaia guna?
2. Noga! magasin be edena bamona memero kekeni idia durudia diba?
5. Bema tau ta ia gwau sibona ena tomadiho orea dekena amo duahiduahi gaudia ia abia bona ia laloa unai sibona be hegeregere, edena bamona do ita haere henia diba?
6. Ita haroro neganai, nius dekenai idia gwauraia sivaraina be edena bamona ita gaukaralaia diba?