Ita Davaria Kamonai Taudia Ibounai Laloa Bada
1 Tanobada hegegemadai idia karaia Basileia harorolaia gaukarana be kahirakahira do ia ore, bena ‘Dirava idia ura lasi taudia’ ese dika do idia davaria. (2 Tes. 1:7-9) Taunimanima edia mauri idia laloa bada karana ese Iehova ena taunimanima ia veria iboudiai dekenai Basileia sivaraina idia gwauraia totona.—Sep. 2:3.
2 Hua ibounai, hora milioni momo idia atoa “kwalimu bona hamauria herevana” idia ura kamonai taudia tahua totona. (Isa. 52:7) Hari iseda henia gauna idia abia dae dainai, taunimanima haida ese Gima Kohorona sabskripsen eiava Dirava Ia Ura Dahaka Ita Karaia? buklet idia abia. Namona be unai taudia ita laloa bada dainai, kamonai taudia ibounai ita lou henidia.—Aon. 3:27.
3 Rekodi Namodia Ita Karaia: Gaukara namona do ita karaia bema kamonai taudia bona ita rakatania bukadia edia rekodi ita torea namonamo. Ita diba gaudia, hegeregere ruma tauna ena ladana bona adres, edena dina bona nega ia oi davaria, oi hariharilaia buka eiava magasin, bona umui herevalaia gauna ese oi do idia durua lou henia namona oi karaia totona. Danu, bema emu herevahereva negana lalonai ruma tauna ia gwauraia gaudia oi torea, lou henia oi karaia neganai unai gaudia oi gwauraia diba hereva oi hamatamaia lalonai.
4 Lou Henia Karaia Haraga: April hua lalonai magasin eiava buka idia abia taudia hida oi lou henidia? Pura haida idia lao vadaeni bona oi lou henia lasi, a? Edia noho namo ela bona hanaihanai ita laloa bada karana ese ita ia veria idia ita lou henia haraga, hegeregere dina rua eiava toi murinai be namo, unai amo ita herevalaia gauna be do idia laloa noho. Bema karaharaga ita lou henidia edia ura habadaia totona, reana Satani ena hedibagani oi koua diba bona ita “hadoa hereva gauna ia abia lao” lasi.—Mar. 4:15.
5 Hegaegae be mai Anina Bada: Lou henia namona do oi karaia bema oi hegaegae namonamo neganai. Lou henia oi do karaia lasi neganai, oi palani namonamo edena bamona ia do oi hereva henia. April 1997 ena Iseda Basileia Gaukara pepana ena murina kahana dekenai hamatamaia herevadia ia hahedinaraia bona edena bamona mai kwalimu ida ita gaukaralaia diba magasin eiava Dahaka Ita Karaia? buklet ita hariharilaia neganai. Bena, do oi giroa lou neganai dahaka do oi herevalaia oi laloa. Dahaka oi gwau diba kamonai taudia oi lou henia neganai? Edena bamona Baibel stadi oi hamatamaia diba?
6 Bema guna tanobada do ia goeva bona noho gabuna namona ai do ia lao dalana oi kikilaia neganai, sedira inai bamona do oi hereva:
◼ “Guna oi lau vadivadi henia neganai, ita gwau namona be gau badadia haida idia karaia guna, bena tanobada be paradaiso gabuna namona ai do ia lao. Oi laloa taunimanima be mai edia diba unai karaia totona? [Haere naria.] Mani oi itaia dahaka dainai Dirava ese taunimanima totona kara haida ia karaia be mai anina.” Salamo 37:38 duahia. Bena Dahaka Ita Karaia? buklet ena kahana 5 oi kehoa, bona paragraf 4-5 amo kahana haida oi abia hidi bona oi hahedinaraia edena bamona Dirava be unai gwauhamata do ia hagugurua. Unai murinai buklet oi gaukaralaia bona oi hahedinaraia edena bamona Baibel stadi umui karaia diba.
7 Bema guna Dirava ena Basileia oi herevalaia bona “Dahaka Ita Karaia?” buklet oi henia, vadaeni lou henia oi karaia neganai, reana inai bamona do oi gwau:
◼ “Guna ita kiki neganai, ita gwau Dirava ena Basileia be gavamani korikorina tanobada ibounai do ia lohiaia. Baibel ese ia hahedinaraia Iesu Keriso be unai gavamani ena pavapava. Unai bamona gavamani bona pavapava amo ita abia hahenamo haida oi laloa diba, a?” Haere oi naria. Dahaka Ita Karaia? buklet oi kehoa kahana 6 dekenai. Oi abia hidi hereva paragraf 6 bona 7 amo bona rau 13 dekenai ia noho laulau amo oi hahedinaraia dina vaira dekenai Dirava ena Basileia be dahaka do ia karaia taunimanima totona. Daniela 2:44 duahia, bona bema ia hegeregere, Diba bukana oi hariharilaia, ena davana be K1.50, bona iseda Baibel stadi program oi herevalaia danu.
8 Bema tau ta oi davaria, ia gwau taunimanima edia hekwakwanai be tanobada tomadiho ese idia havaraia, sedira inai bamona oi henanadai diba lou henia oi karaia neganai:
◼ “Nega haida oi laloa edena bamona ita diba edena tomadiho be Dirava ese ia abia dae? [Haere naria.] Dirava Ia Ura Dahaka Ita Karaia? buklet ese tomadiho momokani ena toana ia hahedinaraia.” Kahana 13 oi kehoa, bona dala idauna dekenai idia torea hereva ima paragraf 3-7 dekenai oi herevalaia. Inai danu oi herevalaia diba: “Tomadiho momokani ita tahua noho lalonai, namona be ita tahua Dirava ena ura ita ta ta totona be dahaka.” Ioane 4:23, 24 duahia. Oi hahedinaraia oi ura unai do umui kikilaia lou. Buklet oi henia ruma tauna dekenai, kahana 1 oi kehoa, bona stadi karaia dalana oi hahedinaraia. Ruma tauna oi hamaoroa unai buklet ia abia diba, ena davana be 40 toea, bona nega oi hegaegaelaia oi lou henia bona buklet ena hereva ma haida do umui itaia totona.
9 Bema ta oi lou henia bona guna ruma bese ena moale umui herevalaia, reana inai bamona oi hereva diba:
◼ “Guna oi lau davaria neganai, ruma bese lalonai moale korikori davaria dalana ita herevalaia, unai dala be Dirava ena Hereva, Baibel, lalonai ita davaria diba sisibana ita badinaia. Bema hari idia noho ruma bese edia ura gaudia ita herevalaia neganai, oi laloa Baibel ese ita ia durua diba eiava ita ia durua diba lasi?” Haere naria. Diba bukana ta oi henia ia dekenai. Karoa 2 oi kehoa, bona paragraf 13 lalonai ia noho tisa ta ena hereva oi duahia. Paragraf 3 dekenai idia noho hereva oi gaukaralaia, ruma bese Baibel stadi hamatamaia totona. Oi hahedinaraia stadi be davana lasi bona buka davana be K1.50 toea. Bema rekodi namodia ita karaia, ita hegaegae namonamo, bona edia ura habadaia totona ita lou henia haraga neganai, ita hahedinaraia diba iseda dekena taudia ita lalokau henidia bona unai ese idia do ia veria mauri dalana do idia abia hidi.—Mat. 22:39; Gal. 6:10.