Dogoatao

Haroro Gaukara Totona Idia Gwauraia Kiki Herevadia

Inai Udaia Pepana Gaukaralaia Dalana

Henunai idia noho kiki herevadia momo be Iseda Basileia Gaukara pepa gunadia lalonai idia hedinarai. Namona be emu haroro negadia lalonai idia momo oi gaukaralaia, bona oi itaia unai amo dahaka anina oi davaria. Inai udaia pepana oi dogoatao, bona haroro gaukara totona oi hegaegae neganai, oi itaia diba.

Tau ta ena ura Dirava ena Hereva dekenai oi habadaia diba bema sivarai kwadogina oi gwauraia. Henanadai ta oi henia, bena Baibel ena haere kwadogina oi duahia. Inai heduru herevadia oi tohoa diba:

“Vaira negana oi laloa neganai, oi moale eiava oi daradara? [Haere naria.] Baibel ese hari ita itaia kara dikadia bona gabeai do idia vara gaudia ia perovetalaia.”​​—2 Tim. 3:​1, 2, 5; Aon. 2:​21, 22.

“Hari inai negai, taunimanima momo be gorere dainai idia lalo-hekwarahi. Oi diba, Dirava ia gwauhamata ia ese gorere idauidau do ia haorea momokani, a?”​​—Isa. 33:24; Apok. 21:​3, 4.

“Oi diba, Baibel ia peroveta kahirakahira gavamani tamona sibona ese tanobada ibounai do ia lohiaia, a?”​​—Dan. 2:​44; Mat. 6:​9, 10.

“Dahaka oi laloa, bema Iesu Keriso ese tanobada ia lohiaia, mauri be do edena bamona?”​​—Sal. 72:​7, 8.

“Taunimanima momo be ma haida idia dadaraia kava, badina idia be tau eiava hahine dainai, edia tomadiho dainai, eiava edia kopina ena kala dainai. Dahaka oi laloa, Dirava ena hemami unai bamona inai henia kava karana dekenai be dahaka?”​​—Kara 10:​34, 35.

“Ita diba Iesu Keriso ese iena negai hoa karadia momo ia karaia. Bema ia oi noia diba hoa karana ta do ia karaia totona, edena kara do oi gwauraia?”​​—Sal. 72:​12-​14, 16.

“Taunimanima momo be hekwakwanai idauidau edia sivarai idia kamonai loulou dainai idia hesiku vadaeni. Idia ura hekwakwanai kokia daladia edia sivarai idia kamonai. To iseda hekwakwanai idia haorea momokani daladia be edeseniai ita davaria diba?”​​—2 Tim. 3:​16, 17.

“Lohiabada ena (eiava, Aiemai Tamana) gurigurina lalonai, oi gurigurilaia Basileiana oi diba, a?”​​—Apok. 11:15.

Herevahereva Hamatamaia Daladia

Henunai idia noho henanadai be Herevalaia bukana amo idia abia, buka ena rau ena namba idia hahedinaraia, unuseniai haere oi davaria diba.

Dahaka dainai ita buruka ita lao bona ita mase? (274)

Mase taudia be edena bamona? (276)

Dirava ia mauri noho herevana ita abia dae be mai ena badina, a? (100)

Taunimanima dekenai idia vara gaudia be Dirava ese ia laloa, a ? (101)

Dirava be siahu ta sibona, a? (102)

Kara maoromaoro taudia ibounai be guba dekenai idia lao, a? (146)

Nega vairai ta do ia moale momokani dalana tamona be, guba dekenai do ia lao, a? (147)

Dahaka dainai Dirava ena ladana ita diba bona ita herevalaia be gau badana? (196)

Iesu Keriso be Dirava, a? (211)

Dirava ena Basileia ese dahaka do ia karaia? (69)

Taunimanima be dahaka totona idia mauri? (285)

Dahaka ese headava ia hanamoa diba? (176)

Dirava ese tomadiho idauidau iboudiai ia abia dae, eiava? (408)

Ta ese tomadiho ta ta edena bamona ia tohodia diba tomadiho maorona davaria totona? (414)

Hari inai nega lalonai Satani be mai ena siahu bada, a? (356)

Dahaka dainai Dirava ese hisihisi ia koua lasi? (188)

Dahaka dainai gwau-edeede kara dikana ia bada? (157)

Daika ese tanobada ia lohiaia​​—Dirava eiava Satani? (380)

Dahaka Ita Karaia? Buklet Hariharilaia Daladia

“Lau diba oi abia dae taunimanima momo ese Dirava idia abidadama henia. Dirava idia abidadama henia taudia ibounai idia lalo-tamona Dirava be ita amo gau ta ia ura. To taunimanima idia lalo-tamona lasi gauna be inai, Dirava ia ura dahaka ita karaia?” Bena Dahaka Ita Karaia? buklet oi hahedinaraia, kahana 1 oi kehoa, bona oi herevalaia.

“Hari ruma bese lalonai hekwakwanai momo idia vara dainai, nega haida oi laloa, ruma bese lalonai moale korikori davaria dalana be dahaka?” Haere totona oi naria, bena oi hahedinaraia Baibel lalonai, Dirava ese ruma bese hamoalea dalana ia herevalaia. Isaia 48:17 oi duahia. Bena Dahaka Ita Karaia? buklet ena kahana 8 oi kehoa, bona unuseniai idia gwauraia ruma bese taudia ta ta idia durua Baibel siridia oi hahedinaraia. Unai kahana matamanai idia noho henanadai oi duahidia. Ruma tauna oi henanadai bema ia ura haere do ia duahia.

“Inai buklet be stadi kosi namona ta, Baibel ena hadibaia hereva badadia ia diba totona. Ena rau ta ta ai, lagani handred momo lalonai taunimanima ese idia lalo-hekwarahilaia henanadai edia haere oi davaria diba. Hegeregere, Dirava ena palani tanobada totona be dahaka?” Kahana 5 oi kehoa, bona hamatamaia kahana ai idia noho henanadai oi duahia. Ruma tauna oi nanadaia edena henanadai ena haere ia ura ia diba, bona haere ia hahedinaraia paragraf tamona (eiava haida) oi duahia, siri oi itaia danu. Oi hahedinaraia henanadai ma haida edia haere maorodia ia davaria haraga diba danu. Oi hamaoroa do oi giroa lou, henanadai ma ta bona ena haere umui herevalaia totona.

“Dahaka oi laloa, hari sikuli momo dekenai idia vara dagedage karadia ibounai edia badina be dahaka? Unai ia vara badina tama sina ese idia matahakani henidia lasi, a? Eiava gau ma ta, hegeregere Diabolo ena siahu dainai idia vara, a?” Oi naria ia haere totona. Bema ruma tauna ia gwau Diabolo ena siahu dainai unai ia vara, Apokalupo 12:​9, 12 duahia. Diabolo ena gaukara, tanobada lalonai heiriheiri badana ia havaraia karana, oi herevalaia. Dahaka Ita Karaia? buklet ena kahana 4 oi kehoa, bona ruma tauna oi nanadaia, nega ta ia laloa Diabolo be edeseni amo ia mai. Namona be paragraf ginigunadia rua oi duahia bona oi herevalaia. Bema ruma tauna ia laloa “tama sina ese idia matahakani henidia lasi” dainai sikuli dekenai dagedage be momo, 2 Timoteo 3:​1-3 oi duahia bona inai hekwakwanai idia havaraia karadia oi herevalaia. Bena Dahaka Ita Karaia? buklet ena kahana 8 oi kehoa, paragraf 5 oi duahia, bona umui herevahereva noho.

“Oi laloa ita ia Havaraia Tauna ese ita dekenai diba ia henia be namo, ruma bese namona ita haginia totona, a?” Haere totona oi naria, bena Dahaka Ita Karaia? buklet oi hahedinaraia. Kahana 8 dekenai oi kehoa, bona oi hamaoroa ruma bese taudia ta ta totona Baibel ena hadibaia herevadia be ia lalonai idia noho. Buklet be Baibel ida ia gaukaralaia diba dalana namona do oi hahedinaraia.

“Hari iseda nega lalonai ita idia tohoa gaudia be momo, oi laloa guriguri ese ita ia durua diba, a? [Haere naria.] Taunimanima momo idia gwau guriguri ese idia dekenai goada ia henia. [Filipi 4:​6, 7 duahia.] To, reana nega haida ta ia laloa Dirava ese ena guriguri ia haerelaia lasi. [Dahaka Ita Karaia? buklet ena kahana 7 oi kehoa.] Inai buklet ese ia hahedinaraia, edena bamona guriguri ese ita ia durua bada diba.”

“Emai dekena taudia ida ai hereva, dahaka dainai tanobada lalonai tomadiho idauidau be momo herea. To, Baibel be tamona sibona. Emu lalohadai be dahaka, dahaka dainai tomadiho idauidau momo idia noho? [Haere naria. Dahaka Ita Karaia? buklet ena kahana 13 oi kehoa, bona hamatamaia kahana dekenai idia noho henanadai oi duahidia.] Inai kahana oi duahia neganai, unai henanadai dekenai haere namodia do oi davaria.”

Ta dekenai Gima Kohorona bona Awake! oi henia murinai, ia oi nanadaia bema paragraf kwadogina ta oi duahia diba. Bema ruma tauna ia ura, Dahaka Ita Karaia? buklet ena kahana 5 oi kehoa. Unai kahana ena matamanai idia noho henanadai oi hahedinaraia, bona ia oi noia paragraf ginigunana oi duahia neganai, henanadai ginigunana ena haere do ia kamonai. Paragraf oi duahia murinai, henanadai oi henia bona ena haere oi kamonai. Buklet oi hariharilaia bona bema ia abia dae, dala oi karaia oi giroa lou bona idia noho henanadai rua edia haere ia davaria totona.

Diba Bukana Hariharilaia Daladia

Baibel be emu imana dekenai oi dogoatao, bona oi gwau: “Hari emu dala dekenai idia noho taudia ibounai ida Baibel ena siri ta ai herevalaia. Ia gwau . . . ” Ioane 17:3 oi duahia, bena oi nanadaia: “Oi itaia dahaka ia gwauhamatalaia bema ita be mai eda diba maorona? [Haere naria.] Ta ese unai bamona diba be edeseniai ia davaria diba?” Ia haere murinai, Diba bukana oi hahedinaraia, bona oi gwau: “Inai buka ese mauri hanaihanai dekenai ita ia hakaua lao dibana ia hahedinaraia. Taunimanima momo ese Baibel dekenai idia nanadaia henanadaia momo ia haerelaia.” Karoa idauidau edia lista oi hahedinaraia, bona unai tauna oi nanadaia bema guna unai buka lalonai idia noho hereva ta ia daradaralaia.

“Oi laloa Dirava be ma haida dekenai eiava ita dekenai idia vara kara gageva bona hisihisi ia laloa, a? [Haere naria.] Baibel ese ita ia hadibaia Dirava ese ita ia lalokau henia bona nega dikadia lalonai ita do ia durua.” Salamo 72:​12-​17 ena siri haida duahia. Diba bukana ena karoa 8 oi kehoa, bona taunimanima milioni momo ese idia henia henanadai, Dahaka dainai Dirava ese hisihisi ia koua lasi?, dekenai haere namona oi henia. Bema hegeregere, Baibel ena lalohadai paragraf 3 ia lao 5 dekenai oi herevalaia, eiava lou henia lalonai unai oi karaia diba.

“Ita momo ese mase dekenai iseda lalokau taudia ita haboioa. Nega haida oi laloa idia do ita itaia lou, eiava? [Haere naria.] Iesu ese ia hamomokania iseda lalokau mase taudia be do idia mauri lou diba. [Ioane 11:​11, 25, 44 duahia.] Ena be lagani handred momo gunanai unai ia vara, to Dirava ese ita totona ia gwauhamatalaia gaudia ia hahedinaraia.” Diba bukana ena rau 85 ai ia noho laulau oi hahedinaraia, bona ena hereva oi duahia. Unai murinai, rau 86 dekenai ia noho laulauna oi hahedinaraia, bona oi herevalaia. Gabeai lou henia ena dala oi kehoa totona inai henanadai oi henia: “Oi ura diba dahaka dainai taunimanima idia buruka bona idia mase, a?” Do oi giroa lou karoa 6 umui herevalaia totona.

“Nega haida oi laloa dahaka dainai taunimanima idia ura dikadika idia mauri daudau?” Ia haere murinai, Diba bukana ena karoa 6 oi kehoa, bona paragraf 3 oi duahia. Idia gwauraia siridia oi herevalaia. Ruma tauna oi noia bema paragraf ena dokona ai idia noho henanadai rua edia haere ia ura itaia. Bema ia ura, murina paragraf haida umui herevalaia.

“Taunimanima ai henanadai henidia bema inai idia abia dae . . . ” Genese 1:1 oi duahia, bena oi henanadai: “Unai hereva oi abia dae, a?” Bema ia abia dae, oi gwau: “Lau danu. To, bema Dirava ese gau ibounai ia havaraia, oi laloa idia vara kara dikadia danu be ia dainai idia vara, a?” Unai tauna ena haere oi dibaia murinai, Hadibaia Tauna 7:29 oi duahia. Diba bukana ena karoa 8 oi kehoa, bona paragraf 2 oi duahia. Bema ruma tauna be Genese 1:1 ena hereva ia abia dae lasi, oi hagoadaia Havaraia Tauna ia noho idia hamomokania gaudia do ia tahua.​​—Herevalaia bukana rau 125-7 itaia.

“Oi laloa hari inai nega ai, kara maoromaoro taravatudia idia idau idia lao haraga dainai, iseda mauri ia hakaua totona gau ta ita abia be maoro, a? [Haere naria.] Ena be Baibel be idaunegai bukana, to ia be hari mauri bona ruma bese maurina namona totona sisiba namona ia henia.” Unai murinai, Diba buka ena karoa 2 oi kehoa, bona paragraf 10 bona paragraf 11 ena sentens ginigunana oi duahia, bona 2 Timoteo 3:​16, 17 danu.

“Oi ura oi diba vaira negana ai dahaka do ia vara ita dekenai bona tanobada dekenai, a? [Haere naria.] Hereva tamona amo Baibel ese vaira negana ia gwauraia​​—Paradaiso! Dirava ese taunimanima ginigunadia ruaosi ia havaraia neganai unuseniai ia atodia. Unai gabu ena toana be inai hereva ese ia gwauraia, mani oi itaia.” Diba buka ena rau 8 oi kehoa, bona hereva kwarana maragina “Mauri, Paradaiso Lalonai” ena henunai paragraf 9 oi duahia. Bena paragraf 10 dekenai idia noho herevadia umui kikilaia, bona idia gwauraia siri, Isaia 55:10, 11, oi duahia. Oi hamaoroa oi ura Paradaiso matamatana dekenai mauri be edena bamona do umui kikilaia noho, bona paragraf 11-16 do umui herevalaia hebou.

Guna idia dekenai Gima Kohorona bona Awake! magasin oi henia taudia oi lou henia neganai, reana oi gwau:

“Vanegai lau mai neganai, lau moale badina oi dekenai Gima Kohorona magasin ta lau rakatania diba. Reana oi itaia inai magasin ena sinado be Gima Kohorona​—Iehova ena Basileia Ia Harorolaia. Hari lau ura oi dekenai lau hahedinaraia unai Basileia be dahaka bona oi bona emu ruma bese totona dahaka do ia havaraia diba.” Bena Dahaka Ita Karaia? buklet ena kahana 6 oi kehoa, bona unai tauna dekenai ia noho nega ena bada hegeregerena oi duahia bona herevalaia.

“Vanegai sibona oi lau vadivadi henia bona Gima Kohorona bona Awake! magasin haida lau rakatania. Unai magasin ese Baibel bona ena kara maoromaoro taravatudia matauraia karana idia habadaia. Lau laloa taunimanima ibounai ese Dirava ena Hereva idia lalo-pararalaia be gau badana dainai, oi dekenai lau giroa mai bona heduru gauna ta lau mailaia.” Dahaka Ita Karaia? buklet eiava Diba bukana hahedinaraia, bona Baibel stadi oi herevalaia.

Rau 192 buka gunadia oi hariharilaia neganai, reana inai kiki herevana oi gaukaralaia:

“Hari inai negai, taunimanima ese edukeisen namona idia abia be namo idia herevalaia badabada. Dahaka oi laloa, ta ese edena bamona edukeisen do ia abia be namo moale bada ia abia bona mauri dekenai ia kwalimu totona? [Haere naria. Bena Aonega Herevadia 9:​10, 11 duahia.] Inai buka maragina [oi hariharilaia buka ena ladana gwauraia] ese Baibel ia herevalaia. Ia ese mauri hanaihanai dekenai ita ia hakaua diba ena badina tamona ia hahedinaraia.” Buka lalonai unai ia herevalaia herevana ta hahedinaraia, bona unai tauna oi hagoadaia ia duahia totona.

Buka Ma Haida

Buka bona buklet ma haida totona idia gwauraia kiki herevadia be Watchtower Tower Publications Index ai inai sinado henunai oi davaria diba:

Presentations

List by Publication

Maoromaoro Stadi Hamatamaia Dalana

Baibel stadi hamatamaia totona, inai maoromaoro stadi hamatamaia daladia ta oi gaukaralaia:

“Oi diba miniti haida sibona lalonai, Baibel ena mai anina bada henanadai ta ena haere oi davaria diba, a? Haheitalai ta be, . . . ” Bena, Dahaka Ita Karaia? buklet ena kahana ta ai, oi laloa ruma tauna ena lalona do ia veria henanadai ta oi abia hidi.

“Oi dekenai lau mai emai davana lasi Baibel stadi program lau hahedinaraia totona. Miniti 5 sibona lalonai do lau hahedinaraia. Oi dekenai miniti 5 idia noho, a?” Bema ruma tauna ena haere be oibe, Dahaka Ita Karaia? buklet ena kahana 1 oi gaukaralaia stadi dalana hahedinaraia totona, oi abia hidi siri tamona eiava rua sibona oi duahia. Bena oi nanadaia: “Edena nega be namo oi dekenai, miniti 15 lalonai kahana 2 ita karaia totona?”

“Taunimanima momo be mai edia Baibel, to idia diba lasi iseda vaira negana ena mai anina bada henanadai ia haerelaia diba. Pura ibounai hora tamona bamona inai buka [Dahaka Ita Karaia? buklet eiava Diba bukana] oi gaukaralaia neganai, hua haida lalonai Baibel ena hereva badadia do oi lalo-pararalaia diba. Lau moale bada bema unai program ia heau dalana be oi dekenai lau hahedinaraia diba.”

“Oi dekenai lau mai Baibel stadi kosi ta lau herevalaia totona. Bema ia hegeregere, tano 200 bamona lalodiai ruma bese momo ese Baibel idia stadilaia dalana be miniti haida lalonai oi dekenai do lau hahedinaraia. Inai hereva ta ita herevalaia diba. [Diba bukana ena karoa edia lista oi hahedinaraia.] Oi ura edena hereva ita tahua?” Oi naria ia ese ta do ia abia hidi. Unai karoa dekenai buka oi kehoa, bona paragraf ginigunana amo stadi oi hamatamaia.

“Lau ese Baibel kosi lau karaia davana lasi, bona egu sediual ia hegeregere stiuden ma ta lau abia totona. Ai ese inai Baibel stadi bukana ai gaukaralaia. [Diba bukana oi hahedinaraia.] Unai kosi ena lata be hua haida sibona bona inai bamona henanadai edia haere ia henia: Dahaka dainai Dirava ese hisihisi ia koua lasi? Dahaka dainai ita buruka bona ita mase? Dahaka ia vara iseda lalokau mase taudia dekenai? Bona edena bamona Dirava kahirakahira ita lao diba? Kosi ai karaia dalana be oi dekenai lau hahedinaraia diba, a?”

Bema kiki herevana namona ta oi davaria bona taunimanima edia ura habadaia karana dekenai namo ia havaraia, unai oi gaukaralaia noho! Hua ta ta ena henia gauna hegeregerena, unai kiki herevana oi gaukaralaia.