Iehova Ita Tabekau Henia, Hadoa Gaudia Ia Hatubua Totona
1 Ena lalona ena hemami ia badinaia painia tauna ta ia dibaia namona be Iehova ia tabekau henia, gau ta ia tubu totona. Ia gwau: “Kongregesen matamata haginia totona lau henia heduruna ena moale be nega ginigunana lau mamia. Lagani rua bona ma haida lalonai mai goada ida unai gaukara lau karaia, nega ibounai lau guriguri bona ‘hadoa gauna hatubua tauna’ Iehova lau tabekau henia.” (1 Kor. 3:5-9) Lauma gaudia idia laloa bada taudia ita tahua noho lalonai, ita danu be Dirava ena heduru ita abia be namo, iseda hesiai gaukara ese anina ia havaraia totona.—Aon. 3:5, 6.
2 Ia Tubu Totona Gaukara Goada: Hereva momokani ena uhe ia tubu totona namona be ita gaukara goada. Bema dina tamona eiava rua murinai lou henia ita karaia, anina namona ia havaraia diba. Moale toana hahedinaraia bona oi gado namo henia. Ta ena lalona oi veria. Oi sibona oi hereva be namo lasi. Nega oi henia oi ia diba totona, bona oi hahedinaraia iena namo oi laloa.
3 July hua lalonai ela bona August, ita davaria taudia dekenai buklet idauidau do ita hariharilaia. To, idia kamonai namonamo taudia bona buklet idia abia taudia ita durua noho be namo. Lou henia bona Baibel stadi ita karaia toho karana amo unai do ita karaia. (Mat. 28:19, 20) Dahaka Ita Karaia? buklet ita gaukaralaia diba stadi hamatamaia totona. Reana inai kiki daladia hani ese oi idia durua.
4 Bema guna tanobada ia dika ia lao karana ia laloa bada tauna ida oi kiki, reana emui herevahereva hamatamaia lou dalana be inai:
◼ “Lau laloa oi be lau bamona, taunimanim edia kara ia dika ia lao ita lalo-hekwarahilaia. Ruma bese lalonai natudia, tama sina, bona adavana dagedage henia karadia edia sivarai ita kamonai. Bona momo idia laloa koikoi bona henaohenao karadia, sibodia edia ura hagugurua totona be gau ta lasi. Oi laloa taunimanima edia noho dalana be anina lasi Dirava dekenai, a? [Haere naria.] Dirava ese taravatu ia haginidia taunimanima ese edia mauri lalonai idia badinaia totona, bona idia be metau lasi ita dekenai.” Ioane Ginigunana 5:3 duahia. Bena Dahaka Ita Karaia? buklet oi hahedinaraia, bona kahana 10 dekenai oi kehoa. Paragraf ginigunana duahia. Paragraf 2-6 ai toretore idaudia dekenai idia torea hamatamaia herevadia oi herevalaia, bona ruma tauna oi nanadaia edena kara ia laloa be dika momokani taunimanima edia mauri dekenai. Unai gauna ia herevalaia paragraf oi duahia bona bema ia hegeregere, siri tamona eiava rua duahia. Emu hereva oi hadokoa paragraf 7 duahia amo, bona nega umui hegaegaelaia do oi giroa umui kiki hebou lou totona.
5 Ruma bese idia laloa momo taudia oi davaria neganai, inai bamona oi hereva diba:
◼ “Oi laloa ita ia Havaraia Tauna ese tulu namodia ia henia be maoro, ruma bese namona ita haginia totona, a?” Haere naria. Dahaka Ita Karaia? buklet oi hahedinaraia, kahana 8 oi kehoa, bona oi hamaoroa ia lalonai be hahegani Baibel amo, ruma bese taudia ta ta totona. Buklet be Baibel ida ia gaukaralaia dalana namona oi hahedinaraia totona oi noia. Namona be inai buklet gaukaralaia dalana, rau 2 dekenai oi badinaia. Dala oi hegaegaelaia do oi giroa unai kahana umui stadilaia noho totona, eiava bema umui haorea vadaeni, ruma tauna ia abia hidi kahana ma ta buklet amo umui stadilaia diba.
6 Reana Baibel stadi kosina herevalaia maoromaoro dalana be inai. “Dahaka Ita Karaia?” buklet oi hahedinaraia, bona oi gwau:
◼ “Inai buklet lalonai be Baibel dibaia namonamo stadi kosina, Baibel ena hahediba hereva badadia ia herevalaia. Ena rau ta ta ai, lagani handred momo lalonai taunimanima ese idia lalo-hekwarahilaia henanadai edia haere oi davaria diba. Haheitalai ta be, Dirava ena ura tanobada dekenai be dahaka?” Kahana 5 kehoa, bona hamatamaia kahana ai idia noho henanadai oi duahia. Ruma tauna oi nanadaia edena henanadai ena haere ia ura ia abia, bona unai henanadai edia paragraf oi duahia, siri namodia oi itaia danu. Oi hahedinaraia henanadai ma haida edia haere maorodia ia davaria haraga diba danu. Oi hamaoroa do oi giroa lou, henanadai ma ta bona ena haere herevalaia totona.
7 Eiava reana inai Baibel stadi hamatamaia haraga dalana oi ura tohoa, oi gwau:
◼ “Guna oi diba oi be miniti haida sibona lalonai, Baibel ena mai anina bada henanadai ta ena haere oi davaria diba, a? Haheitalai be, . . .” Bena buklet ena kahana ta ena hamatamaia henanadai amo henanadai ta oi gwauraia, oi laloa ruma tauna ena lalona do ia veria henanadai ta oi abia hidi. Oi gaukaralaia diba henanadai ma haida be March 1997 ena Iseda Basileia Gaukara pepana lalonai idia udaia gauna ena paragraf 15 bona 16 ai oi itaia, ena hereva kwarana be “Mai Gari Lasi ida Lou Henia Oi Karaia!”
8 Mai moale ida lou henia bona Baibel stadi karaia gaukara ita abia dae, badina unai be ‘Dirava danu ita gaukara’ ena kahana ta. (1 Kor. 3:9) Bema ita gaukara goada ita davaria kamonai taudia durua totona bona Iehova dekenai ita tabekau ia hatubua totona, do ita mamia gaukara ma ta ena moale ese unai gaukara ia havaraia moalena ia hanaia lasi.