Buklet—Gaukara Gaudia Namodia Haroro Totona
1 Mai ena diba gaukara tauna be ena gaukara gaudia ia abidia, bona idia ta ta be gaukara ta ta totona. Ita be Basileia harorolaia taudia, bona ita idia durua buklet idauidau idia noho dainai, taunimanima dekenai ita haroro neganai, lauma dalanai ita durudia namonamo diba. (Her. 22:29) Iduara ta dekenai oi ginidae neganai, reana lalo-metau tauna ta do oi davaria. Iduara ma ta dekenai ruma tauna ia gwau ia ura henaohenao lasi gavamani idia haginia, bona ma haida ese mauri ena badina idia daradaralaia. Unai taudia ita durudia totona, iseda buklet badadia be edena bamona ita gaukaralaidia diba?
2 “Mase Taudia Edia Lauma” buklet ita hariharilaia neganai, reana inai bamona ita hereva diba:
◼ “Taunimanima momo be edia mase varavara taudia edia lauma garina idia gari, bona bema unai mase taudia idia do mauri negana lalonai edia varavara ese idia kara dika henidia, bena idia mase neganai unai varavara taudia idia gari dikadika. Unai kara dekenai oiemu lalohadai be dahaka? [Naria ruma tauna do ia hereva totona.] Inai buklet [Oi kehoa rau 2 dekenai.] ese ita ia durua bena ita lalo-parara unai hereva be ia maoro eiava. Mase taudia be momokani idia mauri noho, a? Bema lasi, sibodia be mase taudia edia lauma idia gwauraia taudia be daidia? Unai henanadai edia haere maorodia ita diba be mai anina bada.” Reana umui kiki noho totona, rau 13, paragraf 1 dekenai ia noho sivaraina oi kikilaia diba.
3 Bema oi ese “Mauri ena Anina” buklet oi gaukaralaia, reana inai bamona do oi hereva diba:
◼ “Taunimanima momo ese mauri ena anina idia henanadailaia. Anina be lagani 70 eiava 80 ita mauri bena murinai do ita mase, a? Eiava mauri ena anina ma ta ia noho? Dahaka oi laloa? [Naria do ia haere totona.] Salamo 37:29 dekenai, Dirava ena ura namona taunimanima bona tanobada totona ia gwauraia.” Unai siri oi duahia murinai, buklet oi kehoa rau 31 dekenai, bona Paradaiso lalonai do ita noho diba ena sivarai oi kikilaia.
4 “Itaia!” buklet oi gaukaralaia neganai, namona be oi kehoa ena vairana bona murina raudia idia itaia totona, bona inai henanadai oi henidia:
◼ “Tanobada be inai laulau bamona do ia noho totona dahaka idia karaia be namo? [Naria do ia haere totona.] Inai laulau dekenai taunimanima iboudiai be mai edia ruma bona mai edia gaukara. Maino ia noho bona aniani be bada, bona gau ta lasi ese tanobada ia hamiroa. Ena be taunimanima edia gavamani idia hekwarahi bada, to idia be dala lasi inai bamona tanobada namona idia havaraia totona. To, Baibel ese ita ia hadibaia Dirava ese ‘gau iboudiai do ia hamatamataia.’ [Buklet oi kehoa rau 30 dekenai, bona Apokalupo 21:3, 4 oi duahia.] Inai buklet ese oi ia durua bena do oi lalo-parara dahaka do oi karaia inai tanobada matamatana lalonai do oi mauri noho totona.” Bema ia ura kamonai noho, buklet oi kehoa rau 3 dekenai, bona ia dekenai Baibel stadi karaia dalana oi hahedinaraia.
5 “Mauri Hanaihanai” buklet oi gaukaralaia neganai reana inai bamona oi hereva diba:
◼ “Taunimanima momo idia laloa mauri hanaihanai do idia abia totona guba dekenai do idia lao, to dahaka oi laloa bema oi diba tanobada dekenai do oi mauri hanaihanai diba? [Naria do ia haere totona.] Baibel ese ita ia hadibaia mauri hanaihanai do ita abia diba, bona ita davaria diba dalana ita ia hadibaia danu.” Ioane 17:3 oi duahia. Bena murinai buklet oi kehoa laulau namba 49 dekenai, bona oi nanadaia: “Oi ura inai bamona tanobadana lalonai do oi noho, a?” Buklet oi henia toho, bona do oi giroa lou negana umui hegaegaelaia.
6 Buklet idauidau lalodiai, hari inai nega totona sivarai idauidau idia torea, taunimanima edia henanadai momo idia haerelaidia, bona idia durudia. Unai gaukara gaudia be aonega dalana amo ita gaukaralaidia neganai, kudou-maoro taudia ita durudia diba, bena “hereva momokani do idia diba.”—1 Tim. 2:4.