Buklet Gaukaralaidia Kamonai Taudia Tahudia Totona
1 Buklet be mai edia siahu ita gaukaralaidia neganai. Rau 32 sibona lalonai, buklet be Baibel ena hereva momokani ia hahedinaraia, bona Dirava ena aonega herevadia bona hereva koikoi bona hahediba koikoi edia idau ia hahedinaraidia.—2 Kor. 10:5.
2 Tau ta ese Iehova ena Witness Taudia be Lalo-Tamona ai Dirava ena Ura Idia Karaia Tanobada Ibounai Dekenai buklet ia duahia murinai, leta amo ia gwau: “Inai bamona orea ma ta lau itaia lasi. . . . Hari inai negai, tomadiho kara dekenai koikoi be bada herea, bona Dirava ena ura idia laloa bada taudia idia noho be moale bada gauna.” Meamea tauna ta Africa dekenai be Mauri Hanaihanai Tanobada Dekenai Oi Abia! buklet ia stadilaia. Ena siahu ia dekenai be dahaka? Ena meamea karana ia rakatania bona ia danu idia noho hahine ia luludia, ena adavana ginigunana sibona ia dogoatao. Bena dala maoronai ia adavaia.
3 Toi Tamona Oi Abia Dae be Namo, Eiava? buklet lalonai tanobada taudia idia tahua aonega herevadia idia toredia, hereva edia anina idia hedinarai goevagoeva bona ia be namo herea hereva momokani hadibaia totona. Unai buklet ia herevalaia neganai, tomadiho edia sivarai ia torea tauna ta be Jamaica, West Indies, ena The Sunday Gleaner niuspepa dekenai ia gwau: “Unai buklet . . . be Witness taudia idia halasia buklet namona ta bona hari Toi Tamona idia abia dae taudia—eiava binatarian (unai be Tamana bona Natuna sibona idia abia dae) taudia—edia dala be lasi hereva idia dadaraia totona. Unai buklet dekenai, idaunegai ena sivarai bona tomadiho karana idia tahua aonega taudia momo edia hereva idia torea, bona unai amo idia hahedinaraia Toi Tamona ena hahediba herevana be Baibel dekena amo ia mai lasi. . . . Hari, tomadiho edia sivarai lau torea, to lau diba lasi nega haida dubu dekenai idia lao taudia—bona hanaihanai dubu dekenai idia lao taudia—be edena bamona unai buklet ena henanadai idia haerelaia diba, badina be Witness taudia ese idia torea herevadia amo idia hahedinaraia goevagoeva Iesu be Dirava lasi.”
4 Gaukaralaidia Namonamo: Namo do idia havaraia totona, inai hairai bona hereva namodia buklet be taunimanima dekenai ita hariharilaidia idia duahidia totona. Buklet idauidau idia noho, bona edia hereva be idauidau, unai dainai namona be ita haroro henia ruma tauna do ia durua bada gauna do ita henia toho. Buklet edia hereva ita diba neganai, bona ita dekenai idia noho neganai, ita gaukaralaidia namonamo be ia auka lasi, herevana ita be haroro gaukara dekenai, ruma dekenai, eiava ma gabu ta dekenai.
5 Inai bamona, bema oi hereva henia tauna be Kerisendom ena Toi Tamona hahediba herevana dainai ia daradara, eiava ia laloa Iesu be Dirava, edena buklet do oi gaukaralaia be namo? Bema tau ta ese dahaka dainai lalokau Diravana be hisihisi bada karana ia koua lasi ia henanadailaia neganai, edena buklet ia durua diba? Bema tau ta ia gwau namona be taunimanima durua gavamani idia abia, ia dekenai edena buklet do ia namo?
6 Edena buklet do ita gaukaralaia ita diba be namo, to unai sibona lasi, namona be ruma tauna ena lalona ita veria unai buklet ia ura duahia totona. Bema ia hegeregere neganai, buklet amo hereva badana ta eiava laulau ta oi hahedinaraia ena lalona veria totona bena reana do ia ura abia ia duahia totona. Eiava ia danu paragraf tamona eiava rua umui duahidia, Baibel siridia umui duahidia, bona unai sivarai edia anina umui kikilaia diba. Unai dala amo Baibel stadi namodia momo idia hamatamaia.
7 Iseda buklet be Baibel amo haere idia henia bona tanobada dekenai idia vara gau dikadia dainai idia lalohisihisi taudia dekenai helaro idia henia. (Esekiel 9:4 itaia danu.) Buklet dekenai idia noho sivaraidia idia itaia neganai, mamoe bamona taudia be do idia kamonai. Haroro gaukara lalonai kamonai taudia ita tahudia neganai, namona be mai moale danu unai buklet ita gaukaralaidia.
[Questions]
1. Dahaka dainai buklet be mai edia siahu ita gaukaralaidia neganai?
2. Taunimanima haida dekenai buklet edia siahu be dahaka?
3. Toi Tamona Oi Abia Dae be Namo, Eiava? buklet dekenai, toretore tauna ta be dahaka ia gwau?
4. Buklet idauidau ita abidia dainai, hariharilaidia totona dahaka ita laloa namonamo be namo?
5. Dahaka ese ita ia durua bena ita diba edena buklet ita gaukaralaia be namo?
6. Edena buklet do ita gaukaralaia ita diba be namo, to ma dahaka do ita karaia danu?
7. (a) Taunimanima be iseda buklet amo dahaka idia davaria? (b) Mai moale danu dahaka do ita karaia?