Keristani Karana Sikuli Lalonai
1 Bema oi be Keristani mero o kekeni ta bona oi sikuli noho, oiemu kara maoromaoro oi dogoatao totona, gau badana be emu abidadama ia goada. Hebamo dikana bona idia vara gaudia ese oiemu abidadama do idia tohoa. Unai dainai Petero ena sisiba oi badinaia be mai anina bada, ia gwau: “Dirava idia diba lasi taudia edia vairanai, kara namodia do umui karaia. . . . Emui kara namodia idia itaia neganai, idia ese Dirava do idia hanamoa.” (1 Pet. 2:12) Oi kwalimu totona, oi lalo-goada bona oi gari lasi.
2 Sikuli lalonai bona sikuli ia ore murinai, sihari karana, hereva dikadia, kuku ania karana, bona drag ania kava karana do oi itaia. Dina ta ta ai, hedibagani idauidau do oi davaria bona idia ese oiemu ladana namona idia hadikaia diba. Idia lo taudia hegeregerena, namona be “Sivarai Namona idia hadikaia taudia edia hereva do [oi] negea” bema oi ura unai bamona hahetoho idauidau dekenai oi kwalimu.—Iuda 3; July 15, 1991, Watchtower, rau 23-6 itaia.
3 Oiemu sikuli lalonai, oi diba edena bamona bese abia isi karadia eiava gavamani o tomadiho ena dina helaga edia holide idia karaia, a? Bema hekwakwanai ia havaraia diba karana ta idia ura oi karaia, ‘mai emu laloa maoromaoro ida do oi noho diba, a?’ Bona ‘idia hemarai ena badina be, emu kara namodia idia itaia dainai’, a?—1 Pet. 3:16.
4 Reana oi ia dibagania gauna be spot gadara o sikuli murinai idia karaia moale karadia. Namona be oi diba edena dala ai unai moale karadia ese oiemu abidadama idia hadikaia diba. Namona be emu bamodia oi abia hidi namonamo, bona oi gwau diba ‘edia abidadama ese oi ia durua bona emu abidadama ese idia ia durua.’—Roma 1:12.
5 Iehova Ena Heduru Dainai, Oi Haheauka Diba: Hanaihanai Satani ese oiemu abidadama ia tohoa. Oi haheaukalaia hetohodia haida be idia auka, to do oi abia ahuna dainai emu haheauka be mai ena anina. (1 Pet. 1:6, 7) Sibona emu goada amo do oi haheaukalaia diba lasi; namona be Iehova ena heduru oi tahua. Iesu be ena hahediba taudia ia hagoadaia, ia gwau: “Umui naria, bona umui guriguri, Satani ena laloa dekenai do umui vareai garina.” (Mat. 26:41) Sibona emu ura biagua bona boga auka be gau badadia.—1 Kor. 9:27.
6 Laloaboio lasi, Iehova vairanai oiemu kara ena anina do oi gwauraia. (Had. 11:9) Ena be taunimanima idia itaia lasi, to Iehova ia itaia diba bona emu kara do ia kota henia. (Heb. 4:13) Bema oi ura ia oi hamoalea, ‘mai gari bona mai heudeheude danu emu hamauria do oi tahua noho.’ (Fil. 2:12) Dina ta ta ai Baibel duahiduahi karana be oi do ia durua bada. Sisiba namo hereadia bona oi tohotohoa diba haheitalai namodia amo ia honu.—Heb. 12:1-3.
7 Tama sina e, emui gaukara be mai anina bada. Namona be emui natudia umui biagua namonamo, edia hekwakwanai umui dibaia, bona heduru maorona umui henia haraga. Emui natudia ida herevahereva dalana namona ia noho, a? Emui hadibaia dalana dainai, edia lalona ai Dirava ena taravatu bona hahegani laloa bada hemamina umui atoa, a? Hedibagani bona hekwakwanai idia davaria neganai, emui natudia be idia gini goada, eiava idia lalo-manoka? Idia lalohisihisi badina edia turadia amo idia idau, a? Umui be edia tama sina dainai, durudia ena maduna be umui emui. (Deut. 6:6, 7) Bema emui gaukara umui karaia namonamo, edia abidadama ia tohoa tuarina lalonai do idia kwalimu.—Aon. 22:6.