Baibel Stiuden Durudia Edia Stadi Totona Idia Hegaegae
1 Wiki ta ta ai edia stadi idia hegaegaelaia Baibel stiuden taudia idia hahedinaraia edia stadi idia laloa bada bona lauma dalana do idia tubu haraga; stadi idia hegaegae lasi taudia do idia tubu haraga lasi. Nega haida stiuden ta ia hegaegae lasi ena badina be karaia dalana ia diba lasi. Reana hegaegaelaia dalana oi hadibaia be namo. Edena bamona unai oi karaia?
2 Stadi umui hamatamaia neganai, nega sisina lalonai namona be stiuden oi hadibaia hegaegae karana ena anina be nega do ia atoa sibona ena stadi totona. Ena be taunimanima momo idia duahiduahi diba, to stadi karana idia dibaia lasi. Reana unai stiuden tauna dekenai Haroro School Ena Buka rau 10-12 ena sisiba namodia haida oi gaukaralaia diba.
3 Stadi Karana Ena Namo Oi Hahedinaraia: Reana oi hegaegaelaia bona hereva badadia oi makaia vadaeni stadi bukana be emu stiuden tauna dekenai oi hahedinaraia. Do ia itaia, hereva badadia makaia karana amo, ia be sibona ena hereva amo haere do ia henia diba. Unai amo ena haere be buka amo kahana badana ta do ia duahia lasi. Bema haere henia dalana maorona be hari oi hadibaia, gabeai hebou dekenai mai anina bada haere do ia henia diba. Iena haere ese do idia hahedinaraia stadi gaudia ia laloa bada bona ia lalo-pararalaia.
4 Baibel Gaukaralaia Dalana Hadibaia: Namona be stiuden tauna be ia stadilaia bukana lalonai idia noho Baibel siridia ia davaria haraga diba. Unai ia karaia diba neganai, do ia laloa momokani ia be Baibel ia stadilaia stiuden ta. Ena be nega ginigunadia ai Baibel ena rau ginigunana ai ia noho Baibel bukadia edia ladana ena lista do ia gaukaralaia momo, to namona be ia oi hagoadaia Baibel bukadia 66, edena idia noho guna bona edena idia noho gabeai, ia hadibaia. Baibel sirina ia tahua bona duahia neganai, ia oi durua umui kikilaia paragraf ia hamomokania herevana ia itaia totona, bona siri lalonai, stadi idia hamomokania lasi herevadia ia laloa momo lasi.
5 Stiuden tauna be lauma dalanai ia goada ia lao neganai, oi hagoadaia Baibel ibounai ia duahia haorea. Oi gwau Baibel ibounai be Dirava ena Hereva bona Keristani korikori taudia be lauma dalanai ia ubudia.—Mat. 4:4; 2 Tim. 3:16, 17.
6 Baibel Ena Anina Hahedinaraia Gaudia Ma Haida Kikilaia: Stiuden be nega sisina daudau ia stadi noho murinai, tiokratik bukadia ma haida, hegeregere Herevalaia bukana, ia gaukaralaia matamaia diba. Mai emu lalo-parara ida oi hagoadaia ma hereva haida be Society ena buka bona magasin idauidau dekenai ia tahua; kongregesen heboudia ia lao henia lalonai do ia dibaia namonamo herevadia unai.
7 Bema ita ese iseda Baibel stiuden taudia ita durua edia Baibel stadi idia hegaegaelaia namonamo totona, edia Baibel stadi idia haorea murinai, edia Baibel stadilaia karana do ia ore lasi bona lauma dalanai do idia tubu noho.
This is a repeat of article in km 10/94 taken from km-E 11/93, “Help Bible Students Prepare for Their Study.”