“Inai Bamona Do Umui Karaia, Lau Do Umui Laloa Totona”
1 Nega ia heau lao neganai, taunimanima be mai anina bada gaudia edia anina badadia idia laloaboio. Unai dainai, Iesu be “Lohiabada ena Anibou” ia hamatamaia neganai, ia ese iena hahediba taudia ia hagania, ia gwau: “Inai bamona do umui karaia, lau do umui laloa totona.” Unai nega amo, Iesu ena mase laloatao dinana ai, Keristani taudia be mai edia kamonai ida ‘Lohiabada ena mase idia gwauraia hedinarai, ela bona do ia giroa mai.’—1 Kor. 11:20, 23-26.
2 Kahirakahira, Iesu ese ia maragi ia lao noho “orea maragi” taudia ginigabedia do ia abia daekau guba ai, ia noho gabuna dekenai. (Luka 12:32; Ioa. 14:2, 3) Inai lagani ai, horoa orena taudia bona hutuma bada herea ai ia lao noho “mamoe idaudia” be April 11 ai, Lohiabada ena Anibou do idia karaia lou. (Ioa. 10:16; Apok. 7:9, 10) Iehova ena lalokau badana dainai taunimanima totona Ia sibona ia havaraia Natuna tamona ia siaia karana ita laloa bada hemamina do ia hagoadaia. Iesu ena haheitalai, ena lalokau, mauri davana ia karaia totona ena abidadama ia hahedinaraia ela bona ia mase karana, hari ia be Dirava ena Basileia ena King bamona ia lohia karana, bona danu unai Basileia ese taunimanima dekenai ia mailaia hahenamo gaudia, do idia herevalaia. Momokani, unai dina be do ita laloatao dinana ta!
3 Hari Hegaegae: Namona be ita ibounai ita hekwarahi inai Memorial negana be moale bada bona tanikiu bada negana ai ita halaoa, ita bona ita ida idia hebou taudia totona. Iesu ena haroro gaukara ena dina ginigabedia bona ia mase gwauraia negana ai idia vara gaudia edia sivarai Baibel dekenai ita duahia lou neganai, unai ese Iesu ena mase ita laloa bada karana ia habadaia diba. Pura haida Memorial vairanai, reana iseda ruma bese stadi lalonai ita be Tau Hereadaena bukana ena karoa 112-16 ita duahia lou.
4 Oi laloa oi diba taudia hida be Memorial dekenai do idia mai diba, bema nega oi atoa unai dina idia laloa bada karana oi hagoadaia, idia oi boiria mai, bona idia oi hanamoa? Hari lista oi karaia, bona oi karaia diba gaudia ibounai oi tohoa idia oi durua idia mai totona. Memorial murinai, oi durudia lauma dalanai idia tubu noho totona, idia oi hagoadaia hebou iboudiai dekenai do idia mai.
5 Memorial negana lalonai, dala do idia karaia ita ibounai be iseda haroro gaukara ita habadaia totona. Sediual namona oi karaia dainai, April lalonai heduru painia oi karaia diba, a? eiava May lalonai, a? Iesu ena boubou gauna be mai anina bada dalanai ita laloa karana ita hahedinaraia dalana namona ta be iseda Dirava, Iehova, bona iena Natuna ena Basileia lohiana ese do ia mailaia hahenamodia ita herevalaia.—Sal. 79:13; 147:1.