“Inai Bamona Do Umui Karaia, Lau Dekenai Do Umui Laloa Totona”
April 2 ai Iesu Ena Mase Do Ita Laloa
1 April 2, 2007 ai, tanobada hegegemadai taunimanima milioni momo be do idia hebou Iesu ena mase laloatao totona. Iesu ia mase badina ia ura ena guba Tamana ena lohia siahuna ia abia isi bona Satani Diabolo ena hereva, taunimanima be sibodia edia namo dainai Dirava idia hesiai henia herevana ia hakoikoia. (Iobu 2:1-5) Danu, Lohiabada Ena Anibou amo do ita laloatao, Iesu be goevadae, bona ia kara dika lasi ela bona ia mase dainai ‘iena mauri ia atoa diho, taunimanima momo edia dika davana karaia totona.’ (Mat. 20:28) Unai dainai, Iesu ese ena hahediba taudia ia hamaoroa: “Inai bamona do umui karaia, lau dekenai do umui laloa totona.” (Luka 22:19) Dirava ese ia henia harihari gauna namona oi laloa bada dainai, oi hegaegae unai lalokau hereadaena oi laloa lou totona, a?—Ioa. 3:16.
2 Emu Lalona Hegaegaelaia: Tanobada ai Iesu ena mauri dina oredia ta ta lalonai idia vara gaudia ita laloa lou karana amo, Memorial hebouna totona iseda lalona ita hegaegaelaia. (Esr. 7:10) Unai ita karaia totona, Memorial ena Baibel duahiduahi sediual be lagani 2007—Dina Iboudiai Buka Helaga Tahua buklet bona lagani 2007 Calendar dekenai ita davaria diba. Ai ese Iesu ena mase negana kahirakahira dinadia ai idia vara gaudia ena Baibel duahiduahi sediual be hari ita gaukaralaia kalenda hegeregerena ai karaia. Baibel lalonai ia noho dina bona deit be Iuda taudia edia kalenda hegeregerena. Iuda taudia edia kalenda dekenai dina ta ia matamaia be dina ia diho negana amo ela bona murina dinana ai ma dina ia diho neganai ia doko. Unai dina duahia dalana ai laloa bona Memorial ena Baibel duahiduahi sediual ai karaia. Iesu dekenai idia vara gaudia ita duahia lou bona mai guriguri ida Dirava ena lalokau bada karana taunimanima dekenai ita laloa dobu neganai, Memorial amo namo bada do ita abia.
3 Ma Haida Boiria Idia Mai Totona: February ena Iseda Basileia Gaukara lalonai idia udaia pepana ia hahedinaraia ita be gaukara badana do ita karaia, unai mai anina bada hebouna dekenai taunimanima ita boiria totona. Palani oi karaia vadaeni unai gaukara badana lalonai oi vareai totona, a? Oi ura boiria taudia edia ladana ena lista ta oi karaia bona idia oi hadibaia vadaeni, a? Namona be palani oi karaia Memorial hanuaboina ai oi ginidae haraga totona, unai amo oi boiria taudia bona kamonai taudia ma haida oi welkam henia diba. Idia ida oi helai bona oi itaia bema idia be mai edia Baibel bona ane buka. Idia oi hakaua kongrigeisen taudia ma haida ida idia hedavari totona. Program murinai, namona be idia danu oi noho bena edia henanadai oi haerelaia. Bona April 15 ai do idia henia spesel pablik tok dekenai idia oi boiria. Namona be elda taudia ese guna kongrigeisen idia bamona to hari idia haroro lasi pablisa dekenai Memorial bona spesel pablik tok ena boiboi pepana idia henia.
4 Kamonai Matamata Bona Haroro Lasi Taudia Hagoadaia: Memorial tok ia henia tadikaka ese Baibel stadilaia dalana be nega kwadogina lalonai do ia herevalaia, bona kamonai matamata taudia do ia hagoadaia, Iehova dekenai edia diba idia habadaia noho totona. Namona be tadikaka ese ia herevalaia gaudia amo oi boiria taudia oi durua edia diba Iehova dekenai idia habadaia totona. Bema idia be Baibel idia stadilaia lasi, namona be Memorial murinai idia oi vadivadi henia haraga bona davana lasi Baibel stadi karaia dalana oi herevalaia. Danu, Dirava dekenai edia diba bona abidadama idia habadaia totona, kongrigeisen hebou dekenai idia mai be namo. (Heb. 10:24, 25) Unai dainai idia ita hagoadaia be namo hebou idia mai hanaihanai totona. Namona be elda taudia ese dala idia karaia, haroro lasi pablisa taudia idia vadivadi henia bona Memorial dekenai idia kamonai herevana idia laloa totona. Unai ese idia ia hagoadaia diba kongrigeisen lalonai edia gaukara idia hamatamaia lou totona.
5 Memorial hebouna ese dala ia kehoa, Iehova bona Iesu be ita dainai idia karaia karana ita laloa dobu totona. Unai bamona laloa dobu karana ese iseda lalokau idia dekenai ia habadaia bona ita ia durua kara namodia ita hahedinaraia totona. (2 Kor. 5:14, 15; 1 Ioa. 4:11) Namona be hari ita hegaegae bona kamonai matamata taudia ita durua, badina unai mai anina bada negana ai ita be ‘Lohiabada ena mase do ita gwauraia hedinarai.’—1 Kor. 11:26.
[Study Questions]
1. Dahaka dainai April 2, 2007, be mai anina bada?
2. Edena dala ai Memorial totona iseda lalona ita hegaegaelaia diba?
3. Edena dala ai kamonai taudia bona haroro lasi pablisa ita durudia diba, Memorial hebouna amo namo idia davaria totona?
4. Edena dala ai, Memorial murinai taunimanima ita durudia diba lauma dalanai do idia goada idia lao noho totona?
5. Memorial hebouna be edena dala ai ita ia durua?