July Ia Lao September Lalonai Daudau Teritori Do Ita Lao Henidia
1 Iesu ia gwau sivarai namona be do idia harorolaia “tanobada ena kahana ibounai” dekenai. Papua New Guinea lalonai iseda teritori momo be kongregesen ta ese ia do naria lasi, bona kongregesen haida edia teritori taoni murimurinai be idia karaia momo lasi. Unai dainai July, August, bona September huadia ai, kongregesen bona grup iboudiai idia hagoadaia mai edia goada ida idia karaia momo lasi teritori dekenai do idia haroro totona.
2 Edeseni Do Ita Lao? Lagani gunadia ai kongregesen momo be lagani ta ta ai idia karaia momo lasi teritori eiava daudau teritori gaukarana idia karaia. Namona be lagani ta ta ai kongregesen iboudiai ese guna idia karaia teritori do idia karaia lou. Bema kongregesen badana ta henunai grup maragidia bona gabu daudau pablisa taudia idia noho, namona be unai pablisa taudia bona kongregesen huanai ia noho teritori idia karaia danu be namo. Bema kongregesen ta ia daradara edena teritori idia karaia, namona be brens opesi ia tore henia heduru abia totona.
3 Kongregesen haida be reana nega ibounai edia daudau teritori ibounai idia karaia loulou. Bema unai bamona, namona be elda taudia ese sekit naria tauna idia hadibaia bena ia ese dala do ia karaia idia badinai ia noho kongregesen ta do idia durua totona. Eiava sekit tauna ese dala do ia karaia bena kongregesen ta ese ia do karaia lasi teritori do idia karaia diba.
4 Edena Bamona Do Lau Hegaegae? Palani namona oi karaia be mai anina bada gabu daudau dekenai haroro gaukara oi karaia namonamo totona. Dahaka buka do oi gaukaralaia diba? Bema oi dekenai magasin gunadia haida idia noho, unai oi hariharilaia diba. Bona danu, inai be nega namona Mauri Hanaihanai bukana oi hariharilaia ena davana maragina ai. Diba buka bona Dahaka Ita Karaia? buklet momo ita abia danu be namo, ita hariharilaia totona. Elda oreana ese nega do idia abia hidi edena teritori dekenai do idia gaukara totona bona inai be kongregesen dekenai do idia hadibaia be namo. Reana motuka momo do ita ura gaukaralaia danu. Haroro naria tauna ese inai hegaegae daladia ibounai do ia naria bona namona be ia ese pablisa taudia ia hadibaia davana hida do idia karaia, hegeregere PMV ena davana.
5 Iseda gabu be medu bona siahu gabuna dainai, reana kongregesen haida be do idia hegeregere lasi hua toi lalonai edia teritori do idia karaia haorea totona. Bema unai bamona ia vara, elda taudia ese dala namona do idia hegaegaelaia vaira hua haida lalonai unai teritori do idia karaia totona. Namona be ita moale noho inai hahenamo badana, ‘Iehova ena nega namona’ harorolaia gaukarana, ita abia bona iseda daudau teritori ibounai dekenai ita harorolaia danu.—Isa. 61:2.
This article is unique to PNG.