Idia Oi Hagoadaia Iesu Murinai Idia Raka Taudia ai Idia Lao Totona
1 Ita be gwauhamata Keristani taudia dainai, taunimanima be Iesu murinai idia raka taudia ai idia lao totona ita durua be iseda maduna badana. (Kara 13:48) Bema Tau Hereadaena bukana oi gaukaralaia dainai taunimanima idia kamonai, oi lou henidia neganai dahaka do oi herevalaia?
2 Bema buka ia abia tauna oi vadivadi henia lou, inai bamona oi hereva diba:
◼ “Guna ita herevahereva hebou neganai, Iesu Keriso ena kara toana ita herevalaia. Oi dekenai Tau Hereadaena bukana lau henia diba dainai lau moale. Iesu ena hadibaia dalana bona ena kara oi laloa neganai, dahaka oi laloa bada?” Haere oi naria. Karoa 113 oi kehoa, bona Iesu ena haheitalai manau karana dekenai oi herevalaia. Paulo be Iesu ena manau karana ia laloa dalana oi hahedinaraia totona, Filipi 2:8 oi duahia. Bena wiki ta ta ena Baibel stadi karana amo diba ma haida ia abia dalana oi gwauraia hedinarai.
3 Reana inai hamatamaia hereva oi ura gaukaralaia:
◼ “Tanobada ai ia noho neganai Iesu be ita ia laloa bada dainai ia karaia gaudia be vanegai ita herevalaia. Dahaka oi laloa, hisihisi bada idia ania taudia be edena bamona do ia durua?” Haere oi naria. Karoa 133 kehoa, bona paragraf 5 oi kikilaia. Rau gabena ena laulau oi hahedinaraia, bona Dirava ena ura be tanobada dekenai do idia karaia guba dekenai idia karaia bamona neganai, mauri be edena bamona oi herevalaia. Diba ita habadaia ena namo oi kikilaia.
4 Bema nega ginigunana oi vadivadi henia tauna be ia ura momokani lasi dainai buka oi hariharilaia toho lasi, reana inai bamona oi hereva matamaia diba:
◼ “Lau laloa ita ruaosi be ita laloa hari taunimanima momo be tau ta idia abia hidi bona iena kara idia tohotohoa. Iesu Keriso be ita ese ita tohotohoa be namo tau hereadaena. Iesu ena kara lau stadilaia neganai mai anina bada gauna ta lau dibaia, bona lau ura oi ida unai lau kikilaia. [Tau Hereadaena bukana karoa 40 kehoa, bona Iesu be hebogahisi karana dekenai dahaka ia hadibaia oi herevalaia.] Unai ese lau ia hadibaia ma haida be unai bamona lau kara henidia be gau badana.” Mataio 5:7 duahia. Bema hari ia kamonai namonamo, Tau Hereadaena bukana eiava Dirava Ia Ura Dahaka Ita Karaia? buklet oi hariharilaia toho.
5 Eiava reana oi ura maoromaoro inai bamona do oi hereva:
◼ “Guna lau mai neganai, Iesu dekenai diba ita abia be gau badana ita kikilaia. Ioane 17:3 ese ia hahedinaraia, unai bamona diba ita abia ena anina be ‘mauri hanaihanai.’ Unai diba be edena bamona ita abia diba?” Haere oi naria. Iseda Baibel stadi karaia dalana bona ia amo namo ita abia diba dalana oi herevalaia.
6 Paulo ia gwau gogoa gaukarana idia karaia taudia dekenai “Dirava ese ta ta edia gaukara davana do ia henia, edia hekwarahi hegeregerena.” (1 Kor. 3:8) Bema ita hekwarahi bada taunimanima be Iesu murinai idia raka taudia ai idia lao totona, momokani iseda ahuna be do ia bada.
This is a repeat of article in km 12/94 taken from km-E 12/94 “Urge Them to Become His Followers.”