Ma Haida Boiridia Mai, Tau Hereadaena Murinai Do Idia Raka Totona
1 Mataio 5:14 lalonai, Iesu be ena hahediba taudia ia hamaoroa: “Umui be tanobada taudia ibounai edia diari.” Iesu murinai idia raka taudia edia maduna be taunimanima ibounai dekenai Iehova ena Basileia bona Ia ese Iesu amo ia karaia hahemauri abia dalana idia herevalaia. Unai maduna ita laloa noho dainai, December lalonai Tau Hereadaena bukana be mai moale ida do ita hariharilaia toho. Reana do oi ura inai dala haida oi tohoa.
2 Emu ladana oi gwauraia murinai, reana inai bamona oi hereva diba:
◼ “Iesu ena kara toana tanobada dekenai ia noho neganai, be taunimanima momo ese idia lalohadailaia vadaeni. Dahaka oi laloa, edena dala ai ia be ma haida hegeregerena lasi? [Haere naria.] Inai buka namona, Tau Hereadaena, ese iena mauri bona haroro gaukara lalonai idia vara gaudia haida, bona ena kara toana ia hahedinaraia. Idia duahia murinai, haida edia hemami be hegeregere Iesu idia bamoa, iena hisihisi idia mamia, bona ia haroro neganai ia ida idia noho.” Buka dekenai laulau ginigunana bona ena hereva kwarana oi hahedinaraia. Bena hamatamaia herevadia oi davaria, bona hereva kwarana “Ia Oi Dibaia be Namo” henunai paragraf iharuana oi duahia. Bema toana be idia ura henia, buka oi hariharilaia toho.
3 Eiava inai bamona oi hereva diba:
◼ “Kerisimasi dainai, taunimanima momo be Iesu idia laloa noho. To, tanobada lalonai gau dikadia momo idia vara dainai, haida idia daradara Iesu ese ita ia laloa bada eiava. Dahaka oi laloa?” Haere oi naria. Tau Hereadaena bukana ena karoa 24 oi kehoa, bona Iesu be tanobada dekenai ia mai ena badina oi kikilaia. Bena Ioane 15:13 oi duahia bona Iesu ese ia hahedinaraia lalokau ma haida dekenai oi gwauraia hedinaraia. Magasin matamatadia, buklet ta, eiava pepapepa namona ta oi abia mai danu, buka idia abia lasi neganai oi hariharilaia toho totona.
4 Hereva henia dalana ma ta be inai:
◼ “Matamata taudia momo be edia kara do idia tohotohoa diba taudia idia tahua, to tau namodia idia davaria be auka herea. Taunimanima iboudiai dekenai, Iesu Keriso be haheitalai goevadaena. [1 Petero 2:21 duahia.] Iena mauri ibounai lalonai, ena guba Tamana ia tomadiho henia be gau ginigunana. Oi laloa mauri be edena bamona bema taunimanima ma haida ese iena kara idia tohotohoa?” Haere oi naria. Karoa 133, paragraf 11 oi kehoa, unai karoa ese ena kara namodia ia herevalaia. Tau Hereadaena bukana ese ita ibounai ia durua Keristani taudia namodia ai ita lao diba dalana oi gwauraia hedinarai.
5 Namona be oi hariharilaia gaudia bona kamonai taudia edia ladana bona adres oi torea, lou henia oi karaia diba totona. Nega ia do noho lalonai, kudou-maoro taudia do ita tahua goadagoada, bona do ita durudia idia be iseda Hahemauri Tauna, Iesu Keriso, murinai idia raka taudia ai do idia lao totona.—Mat. 16:24.
This is a repeat of article in km 12/94 taken from km-E 12/94 “Invite Others to Follow the Greatest Man.” Also repeated in km 12/98.