Lagani 2000 Ena Haroro Sikuli
1 Haroro Sikuli be hahenamo badana ta Iehova ena taunimanima totona. Idia hanaia lagani 50 lalodiai, taunimanima milioni momo ia durudia vadaeni, taunimanima vairanai idia hereva dalana bona Baibel ena hereva momokani hadibaia dalana ia hanamoa. (Sal. 145:10-12; Mat. 28:19, 20) Unai sikuli ese oi ia durua dalana oi itaia, a? Lagani 2000 lalonai oi do ia durua noho bema unai sikuli lalonai oi vareai momokani bona idia henia sisiba oi badinaia.
2 Sikuli ena hereva idauidau edia hakaua herevadia bona do ita gaukaralaia bukadia be lagani 2000 sikuli sediual ena rau ginigunana ai idia noho. Kahana ta ta totona idia henia nega, hereva oi abia bukana, oi henia dalana, bona hereva ma haida idia noho. Mani emu kara nega oi atoa unai hadibaia herevadia oi duahia namonamo bona do oi badinaia.
3 Pura Ta Ta Ena Baibel Duahiduahi: Pura ta ta ena Baibel duahiduahi ena sediual idaudia rua be sikuli ena sediual pepana lalonai idia torea. Ta be hanaihanai ita badinaia Baibel duahiduahi sediual, Baibel ena rau ima ita duahia totona. Baibel ena hereva badadia be unai duahiduahi amo idia karaia. Baibel duahiduahi sediual iharuana ai rau momo do oi duahia. Bema unai sediual oi badinaia, lagani toi lalonai Baibel do oi duahia ore diba. Haida be reana idia ura Baibel duahiduahi sediual iharuana ena duahiduahi makana idia hanaia, bona reana haida idia hegeregere lasi idia badinaia namonamo totona. Oi karaia diba gauna dekenai oi moale, ma haida ida sibona oi hahegeregerea lasi. (Gal. 6:4) Gau badana be dina ta ta iboudiai Dirava ena Hereva oi duahia.—Sal. 1:1-3.
4 Haroro Sikuli dekenai oi vareai totona, namona be sikuli naria tauna oi hereva henia. Mani emu kara bema kahana ta oi abia, unai oi laloa bada, bona bema badina namona ia noho lasi, oi dadaraia lasi. Unai sikuli oi laloa bada ia be Iehova ena amo ia mai gauna ta hegeregerena. Oi hegaegae namonamo, oi henia herevana oi dibaia namonamo, bona mai emu kudouna ibounai ida oi henia, vadaeni unai sikuli idauna amo namo bada do oi davaria diba.