Lagani 2001 Ena Tiokratik Haroro Sikuli
1 Baibel siri momo ese Tiokratik Haroro Sikuli ena gaukara idauidau ita karaia namonamo ena badina idia hahedinaraia.—Aon. 15:23; Mat. 28:19, 20; Kara 15:32; 1 Tim. 4:12, 13; 2 Tim. 2:2; 1 Pet. 3:15.
2 Pura ta ta ena Baibel duahiduahi be sikuli dekenai lagani momo lalonai ita karaia vadaeni. Oi badinaia neganai dina ta lalonai Baibel ena rau ta bamona do oi duahia. Inai lagani ena matamana amo, Baibel duahiduahi be sikuli ena henanadai ena pura totona idia atoa danu. Baibel duahiduahi sediual iharuana, lagani toi lalonai ia noho, be ia ore. To, bema oi ura Baibel duahiduahi sediual oi hanaia, oi sibona ena sediual oi karaia diba.
3 Hereva Namba 2 ese tadikaka ia hadibadia Dirava ena Hereva be ‘taunimanima dekenai do idia duahia.’ (1 Tim. 4:13) Duahiduahi ena kahana oi abia neganai, namona be oi duahiduahi badabada loulou. Oiemu duahiduahi karana oi hanamoa totona, namona be Haroro Sikuli Ena Buka dekenai inai Stadi 13, 19 bona 22 edia kahana badadia oi itaia namonamo. Duahiduahi namonamo totona, unai stadi ese laga-ani sisina, hereva gwauraia maoro, bona gado ena rege haidaua daladia idia hahedinaraia.
4 Hereva Namba 3 bona 4 be Buka Helaga Herevalaia buka amo idia abia, unai buka be haroro gaukara totona idia hegaegaelaia. Bema idia abia hidi kahana be oi idia henia ena nega lalonai oi herevalaia diba lasi, namona be emui teritori dekenai do umui gaukaralaia gaudia sibona oi abia hidi. Emui teritori dekenai do umui gaukaralaia diba dalana ai emu hereva do oi henia.
5 Namona be oi hekwarahi sikuli dekenai oiemu gaukara ibounai oi karaia totona. Nega oi atoa oi hegaegae namonamo totona, bona mai emu kudouna ibounai ida oiemu hereva oi henia. Oi ese kongregesen do oi hagoadaia diba, bona hahenamo do oi abia bema mai emu kudouna ibounai ida lagani 2001 lalonai Tiokratik Haroro Sikuli ena gaukara idauidau oi karaia.