Tanobada Ibounai Dekenai Iehova Ena Ladana Hahedinaraia
1 Iesu ese ena hahediba taudia be “tanobada ena kahana ibounai” dekenai idia haroro totona ia siaia neganai, idia badinaia diba haheitalai namona ia hahedinaraia vadaeni. (Kara 1:8) Taunimanima ia davaria negadia bona gabudia ibounai, idia dekenai Dirava ena palani taunimanima totona ia harorolaia. Iesu ena haheitalai idia tohotohoa dainai, hesiai tauna mai ena kamonai oreana ese dala idauidau ia gaukaralaia Iehova ena ladana be “tanobada taudia ibounai dekenai” ia hahedinaraia totona.—Isa. 12:4, 5.
2 Nega Gunadia ai Idia Karaia Gaudia: Idia hanaia laganidia gunadia lalonai, haroro herevadia be niuspepa dekenai idia halasia; “Photo-Drama of Creation” be taunimanima milioni momo dekenai idia hahedinaraia; saun motuka idia gaukaralaia; rekodi masini idia gaukaralaia badabada bona nega sisina lalonai reidio danu—unai ibounai idia gaukaralaia sivarai namona idia harorolaia totona. To momokani, idia gaukaralaia momo dalana be taunimanima dekenai hereva henia dalana, unai amo kamonai taudia edia ura idia habadaia diba. Unai dainai, Iehova ena ladana be gabu ibounai dekenai idia hahedinaraia totona, ruma-ta-ruma-ta gaukarana be dala namo hereana.—Kara 5:42.
3 Iseda Nega Dekenai Idia Karaia Gaudia: Inai nega ia idau ia lao lalonai, tanobada taudia idia bisi bada herea, bona gabu momo dekenai taunimanima be nega momo edia ruma dekenai oi davaria diba lasi. Haida sibona ese edia nega idia gaukaralaia duahiduahi bona lauma gaudia laloa dobu karana dekenai. Unai dainai, edia noho daladia hegeregerena iseda haroro gaukara ita haidaua be namo. Ruma-ta-ruma-ta gaukarana lalonai teritori ita karaia sibona lasi, to ita idia hagoadaia taunimanima idia noho gabudia dekenai ita lao bona ‘nega ibounai do ita naria hegaegae’ eda helaro ita gwauraia hedinaraia totona. (1 Pet. 3:15) Unai ena anina be ita davaria taudia ibounai ita haroro henia, hegeregere gaukara bona sikuli turadia dekenai, dala ai bona loaloa uma gabudia ai eiava motuka idia atoa gabudia ai idia noho taudia dekenai, bona sitoa ta sitoa ta dekenai. Iehova ena heduru ita abia dainai, eda hekwarahi ese namo do ia havaraia. Taunimanima idia noho gabudia dekenai oi haroro, a?
4 Namona be dala namodia ibounai ita gaukaralaia, iseda teritori dekenai Iehova ena ladana ita hahedinaraia totona. Iseda haroro gaukara ita karaia namonamo neganai moale bada do ita davaria, bona ita diba Iehova ese kudou maoro taudia do ia veria.—Ioa. 6:44.