‘Iseda Uduna Ita Koua Diba Lasi’
1 Iesu Keriso ese haroro gaukara ia naria noho. (Mat. 28:20; Mar. 13:10) Ena be haroro taudia kahirakahira milioni 6 be tano 234 dekenai idia haroro, ita gwau lasi iseda haroro gaukara ia ore. Ela bona Dirava ia gwau gaukara ia ore, ‘iseda uduna ita koua diba lasi’ to ita dibaia gaudia ita harorolaia noho.—Kara 4:20.
2 Dirava Ena Lauma Helaga Tabekau Henia: Satani ese hekwakwanai momo ia henia ita dekenai, ita ia hamanokaia totona. (Apok. 12:17) Iseda goevadae lasi tauanina danu ese hekwakwanai momo amo ita ia hahisia. Unai bamona gaudia ese mai anina bada haroro gaukarana amo iseda lalona do ia veria oho diba. To, bema Iehova ita abidadama henia, iena lauma helaga ese ita do ia durua hekwakwanai do ita haheaukalaia totona.
3 Aposetolo edia nega lalonai ia noho Keristani kongregesen ese dagedage bada ia davaria neganai, tadikaka be heduru totona Dirava idia guriguri henia, mai gari lasi ida iena hereva do idia gwauraia noho totona. Iehova ese edia guriguri ia haerelaia, idia dekenai iena lauma helaga bona ura goadana ia henia sivarai namona idia harorolaia totona. Unai dainai, mai gari lasi ida sivarai namona harorolaia gaukarana idia hadokoa lasi.—Kara 4:29, 31; 5:42.
4 Lalona Hamanokaia Hereva Dainai Gari Lasi: Taunimanima momo ese idia abia dae lalohadai eiava iseda ladana idia hadikaia herevadia dainai reana ita gari diba. To, Petero bona aposetolo taudia ma haida be kaunsolo taudia dekenai idia gwauraia gari lasi herevana Kara 5:29-32 dekenai ita laloa be namo. Taravatu hadibaia tauna Gamaliela ese ia gwauraia hegeregerena, Dirava ena gaukara be ta ese ia koua diba lasi. Iseda siahu dekenai ita hagugurua lasi. Inai gaukara badana be Dirava ese ia durua, bona ia sibona ese ia hagugurua diba!—Sek. 4:6.
5 Namona be dina ta ta ibounai Iehova ita noia ena lauma helaga amo ita do ia durua sivarai namona ita harorolaia goadagoada totona. Namona be Ieremia bamona ita gwau Basileia ena sivarai be lahi bamona iseda turia lalonai ia araia noho. (Ier. 20:9) Iseda uduna ita koua diba lasi!