Oi be Hemarai Tauna, A?
1 Natuna maragina ta be ita ia itaia neganai ena tamana eiava sinana ena murinai ia hunia ita hoalaia lasi. Hemarai be vaia ita maragi neganai ita mamia. Taunimanima badadia momo danu be hemarai taudia. Bema haroro gaukara dekenai hemarai karana ese oi ia koua, dahaka oi karaia diba?
2 Hemarai Karana Haheaukalaia Dalana: Gau badana be ‘emu hairai korikori emu lalona dekenai’ oi laloa bada. (1 Pet. 3:4) Emu lalokau Iehova bona emu dekena taudia totona oi hagoadaia. Namona be oi diba momokani, haroro gaukara ena hahegani oi hagugurua karana be dala hereadaena, sibona emu ura dadaraia lalokauna oi hahedinaraia totona. Sibona emu stadi bona hebou lao henia karana dekenai, sediual namona oi badinaia. Hanaihanai oi guriguri bona gau badana be Iehova ena heduru abia totona oi noinoi. Ia oi abidadama henia goadagoada karana ese oiemu gari ia haorea bena ‘gari oi laloa lasi, bona Sivarai Namona oi harorolaia goada noho.’—Fil. 1:14.
3 Oi be hegeregere lasi mamina oi tuari henia. Toana be Timoteo be unai bamona ia karaia be namo. Paulo ese Timoteo ia hagoadaia do ia naria ‘ta ese ia anina lasi gauna do ia gwauraia lasi,’ bona ia hadibaia “Dirava ese gari laumana ita dekenai ia henia lasi, to siahu” laumana ia henia. (1 Tim. 4:12; 2 Tim. 1:7) Timoteo be Iehova ese ia gaukaralaia badabada, bona oi danu do ia gaukaralaia bema lauma dalanai oi goada oi lao noho bona Ia oi abidadama henia momokani.—Sal. 56:11.
4 Taihu ta be ena hemarai karana dainai ena dagedage adavana ia gari henia, to Baibel ena hereva, Mataio 10:37 bamona herevadia, ia laloa dainai heduru ia abia. Ia haheauka dainai, haroro gaukara ia manadalaia, bona dokonai ena adavana, sinana, bona tadikaka be hereva momokani idia abia dae!
5 Hegaegae Karana be mai Anina Bada: Haroro gaukara totona oi hegaegae namonamo karana ese emu gari karana ia haorea. Herevalaia bukana eiava Iseda Basileia Gaukara pepadia gunadia amo, auka lasi kiki herevana ta oi abia hidi, oi stadilaia namonamo, bona oi gwauraia loulou. Lalo-hekwarahi gaudia oi laloa lasi, to namona be gau namodia oi laloa. Haida ida gaukara hebou karana amo goada do oi abia. Oi laloaboio lasi, ruma dekenai do oi davaria taudia momo be idia hemarai danu, oi hegeregerena. Taunimanima ibounai ese Basileia ena sivarai idia kamonai be namo.
6 Bema oi be hemarai tauna, oi lalohisihisi lasi. Oi hekwarahi neganai, Iehova ese oi do ia durua, sivarai namona harorolaia namonamo tauna ai do oi lao. Bena emu haroro gaukara lalonai moale do oi davaria.—Aon. 10:22.