Mai Goada ida Oi Haroro, A?

¹ Ena be inai taudia ese idia dogoatao bona idia hahisidia, to Petero bona Ioane be Dirava ena Basileia idia gwauraia mai goada ida. (Kara 4:​17, 21, 31) Hari inai negai, mai goada ida ita haroro ena anina ita dekenai be dahaka?

² Mai Goada ida Hereva Momokani Halasia: “Goada” bamona hereva ma ta be “gari lasi,” ena anina be “gari karana kokia, boga-auka, bona haheauka.” Keristani taudia momokanidia dekenai, mai goada ida haroro karana ena anina be mai gari lasi ida dala ia kehoa neganai, sivarai namona ma haida dekenai idia harorolaia. (Kara 4:​20; 1 Pet. 3:​15) Unai ena anina be sivarai namona dainai ita hemarai lasi. (Sal. 119:46; Roma 1:​16; 2 Tim. 1:8) Unai dainai, goada karana be mai anina, Basileia ena sivarai namona harorolaia gaukarana be nega dokonai ita hagugurua totona. Ita ia doria sivarai namona be taunimanima ita davaria gabudia dekenai ita harorolaia.​​—Kara 4:​29; 1 Kor. 9:​23.

³ Sikuli Dekenai Oi Goada: Gari mamina eiava gari karana ese sikuli turadia haroro henia dalana ia koua, a? Momokani, nega haida unai be auka bona mai ena hekwarahi bada danu. To, Iehova ese oi do ia hagoadaia bema haida haroro henia totona, ena heduru oi noia. (Sal. 138:3) Goada karana ese oi do ia durua bona do oi hahedinaraia oi be Iehova ena Witnes tauna ta bona edia hevaseha karana do oi haheaukalaia diba danu. Bena, oiemu haroro gaukara sikuli dekenai ese oi idia kamonai taudia do ia hamauria diba.​​—1 Tim. 4:​16.

⁴ Gaukara Gabuna Dekenai Oi Goada: Oiemu gaukara gabuna dekenai idia diba oi be Iehova ena Witnes tauna ta, a? Reana oiemu gaukara turadia ese sivarai namona do idia kamonai dalana tamona be do oi haroro henidia. Oiemu goada karana ese oi do ia durua, Keristani heboudia bona hebouhebou badadia totona gaukara amo livi do oi abia totona.

⁵ Hisihisi Ita Davaria Negadiai Ita Goada: Ita idia dagedage henia neganai, goada karana be gau badana. (1 Tes. 2:​1, 2) Ita ia durua, ita idia hagaria, kirikirilaia, eiava idia hahisia neganai iseda abidadama ita dogoatao auka totona. (Fil. 1:​27, 28) Ita ia hagoadaia, iseda Dirava, Iehova, ena taravatu utua totona ita idia veria neganai do ita gini goada. Ita ia hagoadaia iseda maino karadia ita dogoatao totona, haida ese ita idia habadua gauna idia hepapahuahulaia neganai.​​—Roma 12:18.

⁶ Herevana edena hekwakwanai idauidau ita davaria, mai goada ida sivarai namona ita harorolaia be namo.​​—Ef. 6:​18-​20.