Iehova Ena Ladana Bona Ena Kara Badadia Ita Gwauraia Hedinarai
1 “Lohiabada do ita tanikiu henia, bona iena ladana badana do ita gwauraia hedinarai. Tanobada ena bese idauidau ibounai dekenai, Lohiabada ena kara badadia do ita hamaoroa. . . . Lohiabada idia tahua taudia edia lalona be do idia moale.” (Sal. 105:1, 3) Unai salamo herevana ia torea tauna ese Iehova bona ena “kara badadia” be ma haida dekenai ia herevalaia karana amo moale ia davaria. Dahaka kara badadia? Unai be Dirava ena lohia siahuna mai hairaina lalonai bona ‘hahemauri ena sivarai namona’ harorolaia gaukarana lalonai ia karaia kara badadia.—Sal. 96:2, 3; 145:11, 12.
2 Lagani 2001 ena Memorial negana ita lao henia kahirakahira lalonai, Iehova ena kara badadia ita dekenai be badina momo dainai do ita moalelaia diba. Edena dala ai? Lohiabada ena Anibou be lagani ta ta ai Keristani taudia momokanidia ibounai ese idia matauraia hebouna badana. Unai hebou ena anina, badina, bona karaia dalana ese hebou iboudiai ia hereaia. Unai nega ai Iehova bona Iesu ese iseda hahemauri totona idia karaia karana do ita laloa. Unai dainai Memorial negana lalonai, ‘hahemauri ena sivarai namona,’ ita gwauraia hedinarai neganai, ita ura ita itaia momo ese haroro gaukara idia habadaia!
3 Heduru Painia Gaukarana Do Oi Karaia, A? April gunanai 404 ese heduru painia idia karaia. Inai lagani ai, March bona April be hesiai gaukara ita habadaia huadia ai ita halaoa diba, a? March ai Saturday be ima bona April ai Sunday be ima. Ful-taim moni gaukara idia karaia pablisa taudia momo be pura dokodia ai hesiai gaukara badana idia palanilaia dainai, idia davaria heduru painia gaukarana do idia karaia diba. Heduru painia tauna ese hua ta lalonai hora 50 ia davaria totona, pura ta ta lalonai hora 12 do ia karaia be namo. Rau 4 dekenai ia noho mauana lalonai idia atoa sediual oi itaia namonamo. Unai ta ia hegeregere oi badinaia totona, a? Bema lasi, reana oi sibona emu sediual oi karaia diba March bona April lalonai heduru painia gaukarana oi karaia totona.
4 Namona be elda taudia ese hari ma haida edia ura haroro gaukara habadaia totona bona unai gaukara badana durua totona idia hagoadaia. Unai idia karaia dalana ta be elda bona hesiai taudia momo ese March bona April lalonai heduru painia gaukarana do idia karaia! March bona April be nega namona natudia bona kamonai matamata taudia ese elda taudia do idia nanadaia bema idia hegeregere haroro gaukara do idia karaia matamaia.
5 Hekwarahi ese Hahenamo Ia Mailaia: Tahua gaudia badadia idia atoa bona idia hekwarahi kongregesen ese hahenamo momo idia moalelaia. Kongregesen haida be reana haroro daladia idauidau do idia laloa, nega ta ta ai idia karaia teritori do idia karaia, bona guna idia davaria lasi taudia do idia davaria toho.
6 Ta ena tauanina ia goada lasi eiava ia buruka ese ta ia koua diba hesiai gaukara do ia karaia lasi totona, a? Nega haida ia koua lasi. Unai hekwakwanai idia davaria taudia haida be idia hegeregere heduru painia idia karaia totona. Unai taudia be hesiai gaukara idia goadalaia, bona edia hanamoa karana Iehova dekenai idia habadaia neganai, unai tauna bona kongregesen do ia durua bada diba.
7 Memorial Totona Hegaegae Namonamo: Inai lagani ena Memorial be April 8 ai. Unai be Sunday dainai taunimanima momo do idia mai diba. Reana taunimanima momo do idia mai diba bema iseda kahana ita karaia (1) ita sibona ita lao bona (2) ma haida ita boiria ita ida Memorial dekenai do idia mai. Daidia do ita boiria be namo?
8 Oiemu haroro gaukara ena rekodi dekenai hereva momokani idia ura henia sisina taudia edia ladadia oi itaia, ena be reana hanaihanai oi vadivadi henidia. Memorial negana be pura rua o toi do vairai, namona be idia ibounai oi vadivadi henia bona Memorial ena boiboi pepana oi henidia. Bema oi hegeregere, idia ura mai taudia totona dala oi karaia.
9 Kongregesen haida ai, idia printaia Memorial boiboi pepadia ibounai idia gaukaralaia lasi. Namona be kongregesen ena seketere taudia ese nega bada ia do noho neganai boiboi pepadia idia henia iboudiai idia hariharilaia totona. Reana oi ura boiboi pepana ena henuna kahanai Memorial negana bona gabuna oi taipia eiava oi printaia namonamo. Eiava bema Memorial be Kingdom Hall ai umui karaia, ena adres ia hahedinaraia boiboi pepana ta oi henia danu. Mani umui laloatao, namona be Memorial boiboi pepadia be ruma taudia dekenai ita henia.
10 Manoka Taudia Oi Laloa: Baibel stiuden tauna be Iehova dekenai ena mauri ia gwauhamatalaia bona bapatiso amo ia hamomokania neganai moale ia havaraia. To, lagani ta ta ai, ita huanai haida be hebou dekenai lao karana idia rakatania, bona ma haida dekenai Iehova ena ladana bona ena kara badadia idia do herevalaia lasi. Mai badina namona dainai idia ita laloa momo. Ena be idia manoka taudia momo be hereva momokani idia negea lasi, to reana lalo-manoka, hekwakwanai, eiava mauri ena metau idauidau dainai haroro gaukara idia hadokoa. (Mat. 13:20-22) Lauma dalanai idia manoka momokani taudia be kongregesen dekenai idia giroa lou totona heduru idia abia be namo, bena Satani ena nega dikana ese idia ia hakererea momokani lasi. (1 Pet. 5:8) Inai Memorial negana lalonai ita ura ita hekwarahi idia hegeregere manoka taudia be sivarai namona idia harorolaia lou totona.
11 Namona be kongregesen ena seketere ese buka stadi naria taudia ia hadibaia bema edia grup dekenai manoka taudia idia noho. Kongregesen Hesiai Komiti taudia ese dala idia hegaegaelaia manoka taudia do idia vadivadi henia bona durua totona. Bema hesiai komiti taudia idia davaria unai taudia be Baibel stadi amo namo do idia abia, idia ese stadi do ia karaia diba tauna idia abia hidi. Ena be unai stadi be nega daudau do idia karaia lasi, to stadi karaia tauna ese hora, lou henia, bona Baibel stadi do ia ripotilaia diba.
12 April gunana ai taihu ta be ruma-ta-ruma-ta gaukarana ia karaia bona ia ese dala ai tau matamata dekenai magasin ta ia henia. Unai tauna ese ia hahedinaraia iena adavana be Witnes taihu manokana ta. Ia ese Kingdom Hall gabuna ia henanadailaia bona taihu ia noia ia bona ena adavana do ia vadivadi henia. Unai dainai, idia ruaosi be hebou dekenai idia lao bona Baibel stadi idia abia dae.
13 Gaukara Habadaia Totona Hegaegae: Salamo ia torea tauna ia gwau, namona be ita ese Iehova ena ladana bona kara badadia ita gwauraia hedinarai be ma ia gwau: “Ane do ita abia, bona Lohiabada ena ladana do ita abia isi. Iena kara badadia bona namodia . . . do ita gwauraia hedinarai. [“Ena ladana helagana,” NW ] dainai do ita moale bada noho.” (Sal. 105:2, 3) Namona be ita ese Iehova ena ladana badana bona “kara badadia” ita laloa karana dainai iseda hesiai gaukara ita habadaia, unai amo inai Memorial negana ena anina ita habadaia!
[Box on page 4]
Heduru Painia Gaukarana Totona Pura ta Lalonai Hora 12 Abia Daladia Idauidau
Dina Hora
Monday 1 2 −
Tuesday 1 − 3
Wednesday 1 2 − 5
Thursday 1 − 3 −
Friday 1 2 −
Saturday 5 4 3 5
Sunday 2 2 3 2
Ibounai: 12 12 12 12
Inai sediual ta ia hegeregere oi totona, a? Bema lasi, sibona emu sediual oi karaia be namo, ani?