Uiti Gogoa Gaukarana Karaia Goadagoada
1 Iehova ena peroveta taudia gunadia bona Iesu Keriso ese gogoa gaukarana idia herevalaia. (Isa. 56:8; Ese. 34:11; Ioa. 10:16) Hari unai gaukara ia guguru badina Basileia sivaraina namona be tanobada ibounai dekenai ita harorolaia vadaeni. (Mat. 24:14) Dirava ena hesiai gaukara idia karaia bona idia karaia lasi taudia edia idau ia hedinarai goevagoeva. (Mal. 3:18) Unai ena anina ita dekenai be dahaka?
2 Ita Ta Ta Eda Maduna: Mai goada ida Keristani hesiai gaukara ia gunalaia tauna Paulo ena haheitalai amo diba do ita abia. Taunimanima haroro henia ena maduna ia laloa bada, unai dala amo taunimanima ese sivarai namona do idia kamonai diba bona mauri do idia abia diba. Unai ese Paulo ia doria idia totona ia gaukara goada. (Roma 1:14-17) Hari inai negai, taunimanima dekenai dika idia havaraia gaudia ita itaia neganai, iseda teritori dekenai idia noho taudia ita haroro henidia ena maduna ia bada, ani?—1 Kor. 9:16.
3 Karaharaga Negana: Haroro gaukara be taunimanima tahua bona hamauria gaukarana ida ita hahegeregerea diba. Namona be nega ia do noho lalonai taunimanima ita davaria, bona ita durua, bona mauri gabuna dekenai ita hakaua. Nega be ia bada lasi. Taunimanima be edia mauri idia haboioa diba! Unai dainai ita hoa lasi Iesu ese ena hahediba taudia ia hagoadaia, “uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.”—Mat. 9:38.
4 Basileia gaukara taudia momo idia diba hari be karaharaga negana dainai, hahemauri gaukarana dekenai edia gaukara idia habadaia. Matamata tauna ladana Hirohisa be ena sinana bona ena tadidia bona taihudia hani ida ia noho. Ia be ena ruma bese moni dalanai ia durua totona 3 a.m. dabai ia toreisi bona ruma ta ruma ta dekenai niuspepa ia abidia lao. Ena be unai ia karaia, to Hirohisa ia ura ena hesiai gaukara ia habadaia, unai dainai regula painia gaukara ia karaia matamaia. Dala idia noho emu gaukara be hari ita karaia diba gaukarana ai oi habadaia totona, a?
5 “Nega be kwadogi.” (1 Kor. 7:29) Unai dainai, namona be hari inai tanobada dekenai idia karaia mai anina bada gaukarana ita karaia namonamo—Basileia sivaraina namona ita harorolaia bona taunimanima be hahediba taudia ai ita halaoa. Iesu ese inai hesiai gaukara be uiti gogoa gaukarana ida ia hahegeregerea. (Mat. 9:35-38) Uiti gogoa gaukarana ita karaia goadagoada amo, iseda gaukara ena huahua be reana ta do ita durua bona Apokalupo 7:9, 10 ese ia herevalaia tomadiho taudia hutuma bada edia kahana ai ia lao diba.