Diba Bukana amo ma Haida Hahediba Taudia ai Halaoa
1 Keristani taudia ibounai dekenai, tahua gauna namona ta be ma haida dekenai hereva momokani idia hadibaia bona ‘mauri hanaihanai do idia abia diba taudia’ be hahediba taudia ai idia halaodia. (Kara 13:48; Mat. 28:19, 20) Iehova ena orea ese ita dekenai heduru gauna namona ta ia henia inai gaukara ita hagugurua totona—unai be Diba ese Mauri Dekenai Ita Ia Hakaua Lao bukana.
2 Hari, Diba bukana be Society ese ia gaukaralaia bukana, taunimanima edia ruma dekenai Baibel stadi karaia totona. Ita gaukaralaia neganai, hereva momokani be ia auka lasi herevadia, anina idia hahedinaraia goevagoeva herevadia, bona hereva momo lasi amo do ita hadibaia. Ita hadibaia taudia edia kudouna do ia hamarerea. (Luka 24:32) Momokani, stadi naria tauna be hadibaia daladia namodia ia gaukaralaia be gau badana.
3 Anina Bada Ia Havaraia Baibel Stadi Oi Karaia: Namona be emu stiuden tauna ena namo oi laloa badabada, oi laloa ia be gabeai Keristani hahediba tauna bona lauma dalanai emu tadikaka o taihu ai do ia lao. Namona be mai emu hebogahisi ida, ena turana bamona stadi oi hakaua mai emu ura bada ida. Iena hereva hakala henia namonamo karana amo ia do oi dibaia, unai amo do oi diba lauma dalanai edena bamona ia do oi durua. Namona be mai emu ura ida emu stiuden tauna durua totona oi hekwarahi.—1 Tes. 2:8.
4 Stadi umui hamomokania neganai, Diba bukana ena karoa 1 amo oi hamatamaia ia lao karoa 19 be dala namona. Namona be stadi ia auka lasi bona stiuden ena kamonai urana oi habadaia, unai amo stadi do umui moalelaia bona do ia heau namonamo. (Roma 12:11) Emu stiuden ena mauri dalana bona diba hegeregerena, reana karoa ta be hora tamona bamona lalonai, stadi negana tamona ai umui haorea diba, to umui karaia haragaharaga lasi. Bema wiki ta ta ai stiuden tauna bona tisa tauna ese stadi ena nega idia badinaia, stiuden do ia goada ia lao haraga.
5 Namona be stadi negadia ta ta ai, hamatamaia hereva kwadogidia oi gwauraia, idia amo stiuden ena lalona do oi veria stadi ia ura henia totona. Diba bukana lalonai idia torea gaudia oi badinaia. Hereva idauidau oi atoa kau neganai, hereva badadia oi reaia diba bona stadi negana do oi halataia. (Ioa. 16:12) Bema henanadai ta ia vara bona ia be umui stadilaia noho herevana hegeregerena lasi, stadi ia ore neganai umui kikilaia diba. Unai amo wiki ena stadi do umui haorea bona gau idaudia umui herevalaia lasi.
6 Bema stiuden tauna ese Toi Tamona, mase diba lasi souli, hel ena lahi, eiava unai bamona hahediba hereva koikoidia ia dogoatao auka, bona Diba bukana ena hereva be hegeregere lasi ia dekenai, Buka Helaga Herevalaia bukana eiava unai gauna ia herevalaia buka ma ta oi henia. Ia oi hamaoroa, ia duahia bona laloa murinai, do umui kikilaia.
7 Iehova ena hahekau bona hahenamo noia gurigurina amo stadi umui hamatamaia bona koua neganai, unai nega umui laloa bada, bona umui ura hemataurai umui hahedinaraia, bona unai amo Iehova umui laloa, ia be Hadibaia Tauna korikorina.— Ioa. 6:45.
8 Oi Hadibaia Namonamo: Baibel siridia oi gaukaralaia namonamo neganai, stiuden do ia lalo-parara ia be Buka Helaga ia stadilaia. (Kara 17:11) Diba bukana ena rau 14 ai “Emu Baibel Oi Gaukaralaia Namonamo” mauana oi gaukaralaia Baibel siri ia davaridia dalana hadibaia totona. Buka lalonai idia torea hanai Baibel siridia ia dibaia dalana oi hadibaia. Emui nega hegeregerena, idia torea hanai lasi to idia gwauraia siridia umui kehoa bona duahia. Stiuden oi hagoadaia siri ese paragraf ena hereva idia hamomokania eiava idia hahedinaraia dalana ia gwauraia. Siri edia hereva badadia oi hahedinaraia namonamo bena umui stadilaia kahana ena hereva badadia edia badina do ia lalo-pararalaia. (Neh. 8:8) Baibel bukadia edia ladana bona edeseniai idia noho do ia diba ena namo oi herevalaia.
9 Namona be Baibel idia stadilaia taudia be edia stadi ta ta dainai lauma dalanai idia goada idia lao. Unai badina dainai, karoa ibounai edia dokona ai “Emu Diba Oi Tohoa” mauana lalonai idia noho henanadai oi reaia lasi. Namona be haere maorona sibona oi tahua lasi. Unai henanadai haida idia torea dalana be ena kudouna amo ia haere totona. Hegeregere, rau 31 ai, stiuden dekenai henanadai ta be inai: “Dahaka kara, Iehova ena, be oi moalelaidia bada?”— 2 Kor. 13:5.
10 Stiuden Oi Hadibaia Edia Stadi Totona Idia Hegaegae: Stadi gauna ia duahia guna, haere ia makaia, bona sibona ena hereva amo do ia haere dalana ia laloa stiuden tauna be lauma dalanai do ia goada ia lao haraga. Oiemu haheitalai bona hagoadaia herevadia amo, ia oi hadibaia ena stadi totona ia hegaegae. Oi hadibaia edena dala ai henanadai edia haere maorodia ia davaria diba. Durua dalana ta be karoa ta umui hegaegaelaia hebou. Ia oi hagoadaia sibona ena hereva amo haere ia gwauraia.
11 Stiuden oi hagoadaia wiki ta ta ai iena stadi ia hegaegaelaia neganai, idia torea hanai lasi Baibel siridia ia duahia guna. Iena stadi dekenai ia karaia gaudia dainai oi hanamoa. (2 Pet. 1:5; August 15, 1993, Gima Kohorona, rau 13-14 ai, Baibel stadi ena namo habadaia totona heduru herevadia hadibaia tauna bona stiuden dekenai oi itaia.) Unai dala amo, stiuden oi hadibaia kongregesen hebou ai haere namodia ia hegaegaelaia bona henia totona. Sibona ena stadi karaia karana namona do ia dibaia dainai, Diba bukana ia stadilaia haorea murinai, unai kara ese do ia durua hereva momokani ai do ia goada noho.—1 Tim. 4:15; 1 Pet. 2:2.
This is a partial repeat of article in km 6/96 taken from km-E 6/96 “How to Make Disciples With the Knowledge Book.”