‘Ibounai ese Oi Idia Itaia’!
1 Aposetolo Paulo ia gwau: “Ibounai ese edia matana dekenai ai do idia itaia, taunimanima bona aneru danu.” (1 Kor. 4:9) Unai ena anina be dahaka, bona iseda hesiai gaukara lalonai ena anina be dahaka?
2 Korinto tauna be inai hereva “ibounai ese do idia itaia” dainai, reana Roma taudia edia heatu helulu ena dokonai, idia gwauraia dika taudia idia do hamasea ore lasi neganai, itaia taudia tausen momo vairanai idia haginia karana ia laloa. Unai hegeregerena, itaia taudia momo herea momokani—taunimanima bona aneru—ese aposetolo taudia edia negai idia noho Keristani taudia be Basileia idia harorolaia dainai idia hisihisi idia itaia. (Heb. 10:32, 33) Edia gini-auka karana ese itaia taudia momo edia lalona ia hamarerea, bona hari inai negai iseda haheauka dainai unai bamona ia vara. Daidia ese ita do idia itaia?
3 Taunimanima Ese: Nega haida nius halasia oreadia ese Iehova ena Witnes taudia edia gaukara sivaraidia idia halasia. Iseda gaukara ena sivarai namodia bona momokanidia ita moalelaia, to ita diba nega haida idia ura iseda gaukara idia hadikaia taudia ese sivarai dikadia idia gwauraia. To, ena be ‘haida idia gwau iseda kara be dika, haida idia gwau ita be kara namo taudia,’ namona be hanaihanai ita hahedinaraia ita be Dirava ena hesiai taudia. (2 Kor. 6:4, 8) Ita idia itaia kudou-maoro taudia dekenai, ia hedinarai goevagoeva ita be Iesu Keriso ena hahediba taudia korikoridia.
4 Aneru Ese: Lauma taudia ese ita idia itaia danu. Diabolo bona ena lauma dikadia ese ita idia itaia—to mai edia “badu dikadika” ida, dala idia tahua ‘Iesu ena hereva momokani ita gwauraia hedinarai’ karana idia koua totona. (Apok. 12:9, 12, 17) Dirava ena kamonai anerudia be dika tauna ta idia itaia ena lalona ia giroa neganai, idia moale. (Luka 15:10) Iseda lalona ia goada be namo badina ita diba aneru idia laloa iseda hesiai gaukara be gaukara badana, hari inai negai tanobada dekenai namo ia havaraia gaukarana!—Apok. 14:6, 7.
5 Dagedage oi davaria eiava oi laloa emu hesiai gaukara be anina ia havaraia lasi neganai, namona be oi laloatao tanobada bona guba taudia be oi idia itaia noho. Emu haheauka noho karana ese emu kara maoromaoro do ia hahedinaraia momokani. Gabeai, emu ‘abidadama ena heau helulu oi heaulaia’ karana ese oi do ia durua ‘mauri hanaihanai oi davaria’ totona.—1 Tim. 6:12.