Edena Dala ai Keristani Hebamo be mai Anina Bada?
1 “Tau ta lasi be motumotu ta bamona.” Unai hereva be lagani 1600 murinai ane torea tauna ta ese ia gwauraia, bona unai be Baibel ese taunimanima do idia abia gauna badana ta—hebamo karana—ia gwauraia lou. (Aon. 18:1) Iseda Keristani hebamo karana ese unai ura ia hagugurua. Edena dala namodia ai?
2 Haroro Gaukara Ai: Hahenamo badana ta be iseda tadikaka ese haroro gaukara lalonai ita idia hagoadaia bona idia durua dalana. Iesu ese ena hahediba taudia be “rua rua” amo ia siaia do idia haroro totona. (Mar. 6:7; Luka 10:1) Unai hegeregerena, ma haida ida ita haroro neganai, ita davaria Hadibaia Tauna 4:9, 10 ena hereva be momokani. Hesiai gaukara ita karaia hebou neganai, ita bamoa taudia edia abidadama, kamonai karana, bona lalokau ese ita dekenai goada ia henia bona iseda ura ia habadaia lou.
3 Heduru Abia Totona: Iseda tadikaka be ita idia hagoadaia bona heduru herevadia idia henia danu lalo-hekwarahi haheaukalaia bona hedibagani dadaraia totona. Ita bamoa Keristani tadikaka ese ita laloa bada gaudia idia herevalaia Baibel siridia ita dekenai do idia gwauraia. Ita totona do idia guriguri danu, idia totona ita karaia bamona. (2 Kor. 1:11) Bona edia haheitalai namodia ese ita ia doria kara maorodia ita karaia bona ita ia hagoadaia.
4 Hebou Gabudia Dekenai: Kongregesen heboudia ita lao hanaihanai neganai Keristani hebamo ena hahenamo ita moalelaia. (Heb. 10:24, 25) Hebou ena program lalonai lauma gaudia momo idia hadibaia bona hebou dekenai ita lao neganai iseda abidadama tamona tadikaka kahirakahira ita noho. Unai hebou be nega namodia iseda tadikaka bona taihu ese platfom eiava edia helai gabuna amo edia abidadama idia gwauraia hedinarai ita kamonai. (Roma 1:12) Hebou vairanai bona murinai ita herevahereva neganai iseda hebamo karana ia goada. Unai bamona hebou karadia ese ita dekenai dala ia kehoa iseda abidadama hagoadaia gaudia ita herevalaia totona. Iehova, ena Hereva, ena gaukara, bona ena taunimanima idia lalokau henia taudia ita bamoa neganai, unai ese iseda kara ia hanamoa.—Fili. 2:1, 2.
5 Iseda Keristani tadikaka edia hebamo ita abia be namo. Bema idia be lasi, mai hekwarahi bada ida mauri ia lao henia dala aukana dekenai do ita raka. To, edia lalokau bona hagoadaia herevadia amo Iehova ena kara maoromaoro tanobada matamatana do ita raka henia noho diba.—Mat. 7:14.