Keristani Heboudia Laloa Bada

“Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi.”​—HEBERU 10:24, 25.

1, 2. (a) Dahaka dainai Keristani taudia momokanidia ida ita hebou be hahenamo ta? (b) Edena dala ai Iesu be ia murinai idia raka taudia edia hebou dekenai ia noho?

KERISTANI hebou dekenai ita lao be hahenamo badana, herevana unuseniai Iehova idia tomadiho henia taudia haida sibona eiava tausen momo idia hebou, badina Iesu ia gwau: “Bema lauegu ladanai tau rua o toi idia hebou gabu ta dekenai, lau danu be idia dekenai lau noho”! (Mataio 18:20) Momokani, Iesu ese unai gwauhamata ia henia neganai, ia be kongregesen idia gunalaia taudia edia kara, kongregesen lalonai hahemaoro gaudia be dala maorona ai idia karaia karana, ia herevalaia. (Mataio 18:15-​19) To ita gwau diba Iesu ena hereva be mai anina ena ladana ai guriguri amo idia kehoa bona idia koua Keristani heboudia ibounai dekenai, a? Oibe. Laloaboio lasi, Iesu ese ena murinai idia raka taudia dekenai hahediba taudia halaoa gaukarana do idia karaia ena oda ia henia neganai, ia gwauhamata: “Lau be hanaihanai umui danu ita noho ela bona tanobada dokona.”​—Mataio 28:20.

² Ita daradara lasi Keristani kongregesen ena Kwarana, Lohiabada Iesu Keriso, ese ena murinai idia raka kamonai taudia edia hebou ibounai ia laloa bada. Ma danu, ita diba momokani unai heboudia dekenai ia noho dalana ta be Dirava ena lauma helaga ia henia. (Kara 2:​33; Apokalupo 5:6) Iehova Dirava danu ese iseda hebou ia laloa bada. Unai hebou edia badina badana be Dirava ena ‘bese taudia edia hebou badana lalonai’ ia do ita hanamoa. (Salamo 26:12) Kongregesen heboudia dekenai ita lao ese iseda lalokau ia dekenai ia hamomokania.

3. Keristani heboudia ita laloa bada ena badina namodia be dahaka dahaka?

³ Keristani heboudia ita laloa bada ena badina namodia ma haida idia noho. Iesu Keriso be tanobada ia do rakatania lasi neganai, ena horoa hahediba taudia dekenai gaukara ia henia, idia be “hesiai tauna mai ena kamonai, bona mai ena kara maoromaoro” oreana ai idia lao bona ruma bese bamona idia noho abidadama taudia dekenai, nega korikori ai, lauma aniani do idia henia. (Mataio 24:45) Lauma aniani ita abia dalana badana be kongregesen heboudia bona ma hebou badadia​—sekit bona distrik hebouhebou. Lohiabada Iesu Keriso ese ena kamonai hesiai oreana ia durua, unai bamona hebou lalodiai, inai tanobada dikana ena dokona amo idia ura idia roho mauri bona Dirava ena kara maoromaoro tanobada matamatana ai mauri do idia abia taudia dekenai, diba mai anina bada idia henia totona.

4. Edena “kara” ta Baibel ese ia herevalaia be dika ia havaraia diba, bona dahaka ese ita do ia durua diba, unai “kara” ita dadaraia totona?

⁴ Unai dainai, bema Keristani tauna ese aposetolo Paulo ia herevalaia taudia haida edia kara ia karaia, dika do ia davaria. Paulo ia gwau: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.” (Heberu 10:24, 25) Keristani heboudia dekenai ita lao be hahenamo ta bona idia amo namo do ita abia. Bema unai gaudia ita lalohadailaia namonamo ita do ia durua, mai eda kamonai bona mai eda ura bada ida unai hebou idauidau dekenai do ita lao.

Lalona Idia Hagoadaia Heboudia

5. (a) Hebou dekenai ita gwauraia gaudia ese dahaka idia havaraia be namo? (b) Dahaka dainai kamonai matamata taudia ita boiria haraga, hebou dekenai idia mai totona?

⁵ Keristani taudia be Keristani heboudia dekenai Iehova ena lauma helaga do ia gaukara totona idia noinoi dainai, namona be hebou dekenai idia noho taudia ibounai idia hekwarahi, unai lauma ena hakaua hegeregerena do idia gaukara ‘bona Dirava ena lauma helaga ena lalona do idia hisihisi henia lasi.’ (Efeso 4:30) Aposetolo Paulo ese Dirava ena lauma amo unai hereva ia torea neganai, ia ese hereva dalana maorona ia herevalaia. Namona be nega ibounai ita gwauraia gaudia dainai ‘kamonai taudia ese heduru bona namo do idia davaria, bona iseda hereva dekena amo manoka taudia do ita hagoadaia.’ (Efeso 4:29) Keristani heboudia dekenai unai be mai anina bada. Paulo be Korinto taudia ia tore henia neganai, ia hahedinaraia namona be hebou be heduru, diba, bona goada idia abia negadia. (1 Korinto 14:​5, 12, 19, 26, 31) Unai bamona heboudia dekenai idia noho taudia ibounai ese namo do idia abia, kamonai matamata taudia danu, bona reana do idia gwau: “Momokani Dirava be umui emui huanai ia noho.” (1 Korinto 14:25) Unai dainai, namona be kamonai matamata taudia ita boiria haraga, hebou dekenai idia mai totona, badina unai dala amo lauma dalanai do idia tubu haraga.

6. Hebou dekenai goada ita abia totona dahaka heduru gaudia be mai anina?

⁶ Keristani hebou dekenai hereva idia henia taudia, idia henanadai henidia taudia, eiava haheitalai idia karaia taudia idia hegaegae namonamo be namo, unai amo edia hereva ese ma haida edia lalona do ia hagoadaia bona ia be Dirava ena Hereva, idia torea herevana Baibel, hegeregerena idia gwauraia. Iseda hereva sibona ia maoromaoro be hegeregere lasi, to namona be ita hahedinaraia lalohadai bona hemami danu be Dirava bona Keriso edia lalokau karadia hegeregerena. Bema hebou ena program lalonai hereva idia henia taudia ibounai idia hekwarahi, ‘lauma helaga ese ia havaraia karadia,’ hegeregere moale, hebogahisi, bona abidadama, idia hahedinaraia totona, idia noho taudia ibounai ese goada do idia abia.​—Galatia 5:​22, 23.

7. Edena dala ai ita hebou taudia ibounai ese heduru ita henia diba, hebou amo goada ita abia totona?

⁷ Ena be kongregesen heboudia edia program lalonai haida sibona ese hereva do idia henia, to ita ibounai ese heduru ita henia diba, hebou amo goada do ita abia totona. Nega momo dala ia kehoa helai taudia ese henanadai idia haerelaia totona. Unai be iseda uduna amo iseda abidadama ita gwauraia diba negadia. (Roma 10:9) Ita gaukaralaidia lasi, sibona eda lalohadai hahedinaraia, sibona eda kara ta ita heagilaia, eiava tadikaka ta ita gwau henia totona. Unai bamona kara ese Dirava ena lauma do ia hahisia, ani? Namona be tadikaka huanai idia vara hekwakwanai be idia sibona edia huanai do idia hamaoromaoroa mai lalokau ida. Baibel ia gwau: “Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.” (Efeso 4:32) Keristani heboudia be nega namo hereana unai sisiba namona do ita badinaia totona! Unai idia karaia totona, momo be hebou dekenai idia mai haraga bona ia ore murinai idia do noho sisina. Unai ese kamonai matamata taudia ia durua danu, badina be do idia itaia kongregesen taudia ese idia ura henidia be gau badana. Unai dainai, hebou amo goada ita abia totona, gwauhamata Keristani taudia ibounai edia maduna ta be ‘ta ta dekenai durua henia daladia do idia laloa noho, bona unai bamona lalokau dekena amo kara namodia do idia karaia.’

Hegaegae Namonamo

8. (a) Edena dala ai momo idia hekwarahi, hebou dekenai idia lao totona, bona unai dainai idia ita hanamoa be namo? (b) Iehova be mamoe naria tauna dainai, edena bamona kara ia hahedinaraia?

⁸ Reana haida be Keristani heboudia dekenai idia lao be ia auka lasi, to ma haida be unai totona hanaihanai idia hekwarahi. Hegeregere, bema Keristani sina ta ese ena ruma bese taudia edia mauri gaudia abia totona moni gaukara ia karaia, nega momo ruma dekenai ia giroa neganai ia hesiku. Bena reana aniani ia nadua bona ena natudia ia durua hebou dekenai idia lao totona. Ma Keristani taudia haida be reana gabu daudau amo idia mai hebou dekenai, eiava idia gorere o idia buruka dainai idia hekwarahi. Momokani, Iehova Dirava ese hebou dekenai idia mai taudia mai edia kamonai edia mauri ia diba namonamo, mamoe naria tauna mai ena lalokau ese ena mamoe oreana lalonai idia noho mamoe ta ta durua gaudia ibounai ia diba hegeregerena. Baibel ia gwau: “[Iehova] ese iena mamoe do ia ubua, mamoe naria tauna ia ubua noho bamona. Ia ese mamoe edia natudia do ia haboua, bona iena imana dekenai idia do ia rosia, idia do ia huaia lao. Bona edia sinadia bona rogorogo gaudia, be ia ese metairametaira do ia hakaudia lao.”​—Isaia 40:11.

9, 10. Dahaka ita karaia diba, hebou amo namo bada ita abia totona?

⁹ Hanaihanai hebou dekenai idia lao totona idia hekwarahi taudia be reana nega bada idia atoa be auka, hebou dekenai do idia herevalaia gaudia idia hegaegaelaia totona. Bema wiki ta ta ena Baibel duahiduahi sediual ita badinaia, Haroro Sikuli amo namo do ita davaria. Unai hegeregerena, bema hebou ma haida, hegeregere Gima Kohorona Stadi bona Kongregesen ena Buka Stadi totona ita hegaegae, idia amo namo bada do ita abia. Bema ruma bese maduna idauidau ese edia nega bada idia haorea taudia be stadi ena kahana idia duahia guna bona ia lalonai idia gwauraia Baibel siri haida idia laloa namonamo, Baibel herevalaia negadia namodia ai, anina namodia idia havaraia diba.

¹⁰ Ma haida, idia dekenai nega ia noho taudia, be hebou hegaegaelaia gaukarana dekenai nega sisina bada idia atoa diba. Hegeregere, buka lalonai idia torea hanai lasi to idia gwauraia siridia edia anina be buka ma haida amo idia tahua namonamo diba. Unai idia karaia dainai, idia ibounai be hebou amo namo bada do idia abia bona edia hereva bona edia haere amo kongregesen taudia edia lalona idia hagoadaia. Bema elda bona hesiai taudia idia hegaegae namonamo, haere kwadogidia bona anina idia hahedinaraia haeredia idia henia amo, haheitalai namona do idia henia. Iehova ena harihari gaudia idia laloa bada dainai, idia hebou taudia be hebou ia heau neganai, taunimanima edia kamonai dalana idia hadikaia karadia idia karaia lasi.​—1 Petero 5:3.

11. Dahaka dainai hebou gaudia ita hegaegaelaia totona sibona eda ura ita biagua be namo?

¹¹ Moale karadia bona kara ma haida, lauma dalanai ita idia durua lasi karadia, dekenai nega bada ita halusia diba. Bema unai ia vara, sibona eda kara ita tahua namonamo be namo bona iseda nega be “kavakava” dalanai ita gaukaralaia lasi. (Efeso 5:​17) Namona be anina lasi karadia amo “nega” ita hoia, sibona eda Baibel stadi, hebou hegaegaelaia, bona Basileia ena hesiai gaukara dekenai iseda nega bada ita henia totona. (Efeso 5:​16) Momokani, nega momo unai be auka bona sibona eda ura ita biagua be namo. Unai idia karaia matamata taudia ese badina namona idia atoa, lauma dalana ai do idia tubu namonamo totona. Paulo ese ia ia bamoa matamata tauna Timoteo ia tore henia, ia gwau: “Inai gaudia oi laloa namonamo [Paulo ena sisiba Timoteo dekenai], idia dekenai oiemu lalona ibounai oi henia, bena taunimanima iboudiai do idia itaia oiemu goada ia bada ia lao.”​—1 Timoteo 4:15.

Haheitalai Haida Dirava Ena Hereva Lalonai

¹² Samuela ena ruma bese taudia edia haheitalai namona mani oi laloa. Dirava ena palai dubuna be Silo dekenai ia noho neganai, hanaihanai tomadiho tamona taudia ida idia hebou. Lagani ta ta idia karaia aria badadia do idia lao haheganina be tatau sibodia dekenai. To Samuela ena tamana, Elikana, be ena ruma bese ibounai ida ia lao. “Lagani ibounai Elikana be ena hanua ia rakatania, Silo dekenai ia lao. Unuseni ia ese Siahu Ibounai Lohiabada dekenai ia tomadiho henia, bona boubou gaudia Lohiabada dekenai ia henia.” (1 Samuela 1:​3-5) Samuela ena hanua, Ramataimi Sopimi, be reana “Eparaima ena ororo dekenai,” kone kahirakahira ena gabu ta ai, hari ladana idia gwauraia Rentis. (1 Samuela 1:1) Unai dainai Silo dekenai idia lao neganai, edia laolao ena daudau be kilomita 30, bona unai negai unai dala dekenai taunimanima idia hesiku diba. Elikana ena ruma bese be unai idia karaia “lagani ibounai . . . Lohiabada ena Dubu dekenai idia lao neganai.”​—1 Samuela 1:7.

13. Iesu be tanobada dekenai ia noho negana lalonai, kamonai Iuda taudia ese edena haheitalai idia hahedinaraia?

¹³ Iesu be ruma bese badana lalonai ia tubu daekau danu. Lagani ta ta ena ruma bese be Nasareta amo kilomita 100 saut kahana dekenai idia lao, Ierusalema dekenai Pasova Ariana idia karaia totona. Idia be dala rua amo idia lao diba. Ia lao maoro dalana be Megido ena Koura dekenai idia diho guna bena mita 600 idia daekau Samaria taudia edia gabu lalona amo ela bona Ierusalema dekenai. Taunimanima momo idia gaukaralaia dalana ma ta be lagani 33 C.E. ai Iesu ia raka dalana, Ierusalema dekenai ia lao negana ginigabena ai. Unai dala amo Ioridane ena Koura dekenai ia raka diho davara ena maka henunai ela bona “Iudea kahanai, bona Ioridane Sinavai unai kahanai.” (Mareko 10:1) Unai gabu amo, “Ierusalema ia lao dala” ena lata be kilomita 30 bamona, bona ena anina be mita 1,100 ia raka daekau danu. (Mareko 10:32) Hanaihanai, aria badadia karaia totona idia lao kamonai taudia momo herea be unai Galilea ia lao Ierusalema ena laolao mai ena hekwarahi idia karaia. (Luka 2:​44) Idia ese haheitalai namona idia henia hari inai negai taga tanodia ai idia noho Iehova ena hesiai taudia dekenai, idia be trein, PMV, eiava motuka idia gaukaralaia diba dainai, Keristani heboudia dekenai idia lao karana be hekwarahi lasi!

14, 15. (a) Ana ese edena bamona haheitalai ia hahedinaraia? (b) Hebou dekenai idia mai kamonai matamata taudia haida edia lalohadai namona amo dahaka ita dibaia diba?

¹⁴ Haheitalai ma ta be mauri lagani 84 vabuna Ana. Baibel ia gwau “ia be Dubu Helaga ia rakatania lasi.” (Luka 2:37) Ma danu, Ana ese ma haida ia ura henia mai ena lalokau ida. Beibi Iesu ia itaia bona ia diba ia be gwauhamata Mesia neganai, dahaka ia karaia? Dirava ia hanamoa bona “Ierusalema hamauria totona idia naria noho taudia dekenai, inai mero ena sivarai be ia ese ia hamaoroa.” (Luka 2:38) Ena lalohadai be namo herea bona ia be haheitalai namona hari inai nega ena Keristani taudia dekenai!

¹⁵ Oibe, namona be iseda hebou dekenai ita lao bona haere ita henia karadia ita moalelaia bada dainai, Ana bamona ita kara, hanaihanai hebou dekenai ita lao. Kamonai matamata taudia momo edia hemami be unai bamona. Dibura amo Dirava ena diari namona dekenai idia mai dainai, idia ura gau ibounai do idia dibaia, bona idia momo idia hahedinaraia idia ese Keristani heboudia idia ura henia bada. To, namona be hereva momokani lalonai idia noho daudau taudia idia naria namonamo, dika idia be ‘guna Iesu idia lalokau henia bada, to hari be lasi.’ (Apokalupo 2:4) Reana ta ia gorere eiava ia koua diba lasi gaudia ma haida dainai, nega haida hebou dekenai ia lao lasi. To namo lasi bema kohu tahua karana, moale karadia, eiava hebou ita laloa bada lasi karana dainai, hebou totona ita hegaegae lasi, hebou dekenai ita helai kava, eiava nega momo hebou ita reaia.​—Luka 8:​14.

Haheitalai Hereadaena

16, 17. (a) Iesu ese lauma gaudia laloa totona idia karaia heboudia be edena bamona ia laloa? (b) Keristani taudia ibounai ese dahaka kara namona idia tohotohoa be namo?

¹⁶ Iesu ese lauma gaudia laloa totona idia karaia heboudia ia laloa bada, unai amo haheitalai namo hereana ia henia. Iena mauri lagani be 12 neganai, ia hahedinaraia Dirava ena ruma Ierusalema dekenai ia ura henia bada. Ena tamana bona sinana idia diba lasi ia be edeseniai to dokonai idia davaria, dubu helaga ai hadibaia taudia ida Dirava ena Hereva ia herevalaia. Ena tamana bona sinana ese idia nanadaia neganai, mai hemataurai ida ia haere: “Umui diba lasi egu Tamana ena ruma be lauegu noho ruma, a?” (Luka 2:49) Mai manau ida, mero matamata Iesu be ena tamana bona sinana ida Nasareta dekenai ia giroa. Unuseniai tomadiho hebou ura henia karana ia hahedinaraia noho bona hanaihanai dubu dekenai ia noho. Unai dainai, ena hesiai gaukara ia hamatamaia neganai, Baibel ia gwau: “Vadaeni Iesu be Nasareta, ia tubu daekau gabuna, dekenai ia lao, bona hanaihanai iena kara, Sabati Dina dekenai dubu lalonai ia raka vareai. Vadaeni Buka Helaga duahia totona ia toreisi.” Iesu ese Isaia 61:​1, 2 ia duahia bona ia gwauraia hedinarai murinai, helai taudia ese ia “idia hanamoa, hereva namodia iena uduna dekena amo idia kamonai dainai.”​—Luka 4:16, 22.

¹⁷ Hari inai negai, Keristani heboudia be unai dala tamona ai idia karaia. Hebou be Dirava hanamoa anena bona guriguri amo idia hamatamaia murinai, Baibel amo (eiava Baibel stadi bukadia amo) siri idia duahidia bona edia anina idia gwauraia hedinarai. Keristani taudia momokanidia edia maduna be Iesu Keriso ena kara namona idia tohotohoa. Edia noho hegeregerena, Keristani heboudia dekenai hanaihanai idia lao karana idia moalelaia.

Haheitalai Namodia Hari Inai Negai

18, 19. Ogogami tanodia ai, tadikaka bona taihu ese dahaka haheitalai namona idia hahedinaraia, hebou badadia bona maragidia laloa dalana dekenai?

¹⁸ Tanobada ena ogogami tanodia ai, iseda tadikaka bona taihu momo ese Keristani heboudia laloa bada karana ena haheitalai namona idia hahedinaraia. Mozambique dekenai, distrik naria tauna, Orlando, bona ena adavana, Amélia, be hora 45 lalonai kilomita 90 bamona ororo badana ta amo idia raka hanai, sekit hebouhebou dekenai edia gaukara idia karaia totona. Bena unai dala tamona amo idia giroa, sekit hebouhebou ma ta dekenai idia gaukara totona. Mai manau ida Orlando ia gwau: “Bawa Kongregesen amo idia mai tadikaka ida ai hedavari neganai, ai laloa ai hekwarahi bada lasi. Idia be sekit hebouhebou dekenai idia mai bona edia ruma dekenai idia giroa lou ena anina be dina 6 lalonai kilomita 400 bamona idia raka, bona idia ta be mauri lagani 60 tadikakana ta!”

¹⁹ Pura ta ta edia kongregesen heboudia laloa bada karana be edena bamona? Kashwashwa Njamba be tauanina ia manoka taihuna ta bona ena mauri lagani be 70 ia hanaia. Namibia dekenai, Rundu ena Kingdom Hall bona iena hanua maragina Kaisososi edia padana be kilomita 5 bamona. Hebou dekenai ia mai bona giroa totona, gunika gabuna ai kilomita 10 ia raka. Raskol taudia ese ma haida edia kohu idia abia unai dala dekenai, to Kashwashwa be hanaihanai ia mai. Hebou momo be ia diba lasi gadodia ai idia karaia. Hebou dekenai ia noho karana amo edena bamona namo ia abia? Kashwashwa ia gwau: “Idia gwauraia Baibel siridia amo idia herevalaia gauna lau lalo-pararalaia toho.” To ia duahiduahi diba lasi dainai, edena bamona unai siri ese ia idia durua? Ia haere: “Egu lalona ai lau diba siridia lau kamonai.” Bona lagani momo lalodiai, siri sisina momo be ia laloatao diba. Baibel gaukaralaia dalana ai ena diba ia habadaia totona, kongregesen lalonai duahiduahi idia hadibaia neganai, ia noho danu. Ia gwau: “Hebou lao henia karana lau ura henia bada. Hanaihanai gau matamatadia lau dibaia. Tadikaka bona taihu edia hebamo lau ura henia. Ena be idia ibounai ida lau herevahereva diba lasi, to hanaihanai idia mai bona lau idia hedavari henia. Bona gau badana be, lau diba hebou dekenai lau lao dainai, Iehova ena kudouna lau hamoalea.”

20. Dahaka dainai Keristani heboudia lao henia karana ita hadokoa lasi be namo?

²⁰ Kashwashwa bamona, tanobada hegegemadai Iehova idia tomadiho henia taudia milioni momo ese Keristani heboudia idia laloa bada. Satani ena tanobada ena dokona ia kahirakahira noho lalonai, hebou karana ita hadokoa be dika. To, namona be lauma dalanai ita noga noho bona hebou badadia bona maragidia ita laloa bada. Unai kara be Iehova ena kudouna ia hamoalea sibona lasi, to ita dekenai namo bada herea ia havaraia, badina Dirava ena amo mauri hanaihanai dekenai ita ia hakaua lao hahediba herevadia ita abia.​—Aonega Herevadia 27:11; Isaia 48:17, 18; Mareko 13:35-​37.

Riviu Henanadai

◻ Dahaka dainai Keristani heboudia dekenai ita lao be hahenamo badana?

◻ Edena dala ai ita hebou taudia ibounai ese heduru ita henia diba, hebou amo goada ita abia totona?

◻ Iesu Keriso ese edena haheitalai namona ia hahedinaraia?

◻ Ogogami tanodia ai idia noho tadikaka amo dahaka ita dibaia diba?

12. Samuela ena ruma bese taudia ese edena haheitalai namona idia hahedinaraia?

[Picture on page 18]

Inai Witness taudia Romania ai ese Keristani heboudia laloa bada karana dekenai haheitalai namona idia hahedinaraia