Duahia Taudia Edia Henanadai

Timoteo Ginigunana 5:21 ai, “Dirava ese ia abia hidi aneru” be daidia?

Aposetolo Paulo be elda tauna Timoteo ia tore henia, ia gwau: “Dirava bona Keriso Iesu bona Dirava ese ia abia hidi aneru vairanai oi lau oda henia, inai hadibaia hereva ibounai oi tahua namonamo, bena abia hidi oi karaia, bona maka tamona ai taunimanima ibounai oi kara henia.”—1 Tim. 5:21.

Ginigunana, “Dirava ese ia abia hidi aneru” orea ita diba totona, unai orea lalonai idia noho lasi aneru do ita herevalaia. Idia be 144,000 taudia lasi. Badina Paulo be Timoteo ia tore henia neganai, horoa Keristani taudia edia toreisi lou karana ia do vara lasi. Aposetolo taudia bona horoa taudia ma haida be lauma taudia ai idia do lao lasi, unai dainai “abia hidi aneru” be idia ia herevalaia lasi.—1 Kor. 15:50-54; 1 Tes. 4:13-17; 1 Ioa. 3:2.

Danu, “abia hidi aneru” be Abata ai idia gwau-edeede aneru ia herevalaia lasi. Unai aneru be Satani ena kahana ai idia gini bona demoni ai idia lao, Iesu ese idia ia inai henia. (Gen. 6:2; Luka 8:30, 31; 2 Pet. 2:4) Nega vaira ai, idia be lagani 1,000 lalonai guri dobu masemase lalonai do idia noho, unai murinai idia be Diabolo danu Dirava ese do ia hadikaia ore.—Iuda 6; Apok. 20:1-3, 10.

Paulo ese ia herevalaia “abia hidi aneru” be guba ai idia noho aneru ia herevalaia, idia be “Dirava bona Keriso Iesu” idia durua. Unai siri be Dirava bona Iesu ia gwauraia danu.

Guba ai kamonai aneru tausen momo idia noho. (Heb. 12:22, 23) Namona be ita diba idia ta ta ibounai be gaukara idauidau idia karaia. (Apok. 14:17, 18) Laloatao nega ta aneru tamona ese Asuria ena tuari taudia 185,000 ia hamasea. (2 Ki. 19:35) Aneru momo idia abia hidi danu, “Basileia amo idia ese taunimanima idia hahekwakwanaia gaudia ibounai bona taravatu idia utua taudia do idia kokia.” (Mat. 13:39-41) Ma haida edia gaukara be guba dekenai idia lao “abia hidi taudia do idia haboua.” (Mat. 24:31) Bona ma haida be ‘iseda raka daladia ibounai lalonai ita idia gimaia.’—Sal. 91:11; Mat. 18:10; Mataio 4:11 hahegeregerea; Luka 22:43.

Haroro ai, aneru ta ese ruma ta dekenai tadikaka bona taihu ia hakaua lao. Ruma lalonai ia noho tauna be ia guriguri noho.

Timoteo Ginigunana 5:21 ese ia gwauraia “abia hidi aneru” be reana Dirava ena taunimanima idia durua aneru. Unai karoa ai, Paulo be elda taudia dekenai sisiba namona ia henia, edena dala ai edia maduna idia huaia diba bona kongrigeisen taudia ese elda taudia idia matauraia be namo. Unai dainai elda taudia be edia maduna idia huaia neganai, ‘maka tamona ai taunimanima ibounai idia kara henia’ bona idia laloa namonamo guna bena abia hidi idia karaia. Paulo ena sisiba idia badinaia be mai anina bada, badina “Dirava bona Keriso Iesu bona Dirava ese ia abia hidi aneru” vairanai edia gaukara idia karaia noho. Unai ese ia hahedinaraia aneru haida edia gaukara be kongrigeisen idia durua, hegeregere idia gimaia, haroro gaukara idia naria, bona Iehova dekenai ripoti idia henia.—Mat. 18:10; Apok. 14:6.