Emu Hesiai Gaukarana Oi Hagugurua Namonamo Noho, A?
1 Kara bukana lalonai, ita ia hamaoroa Iesu ena hahediba taudia be taunimanima dekenai sivarai namona idia “gwauraia hedinarai” karana amo edia hesiai gaukarana idia hagugurua. (Kara 2:40; 8:25; 28:23) Momokani unai be aposetolo Paulo ena ura badana. (Kara 20:24) Oi be sivarai namona harorolaia tauna dainai unai be emu tahua gauna, a? Edena dala ai unai do oi hagugurua diba?
2 Emu Kiki Herevana Oi Hegaegaelaia: Haroro gaukara lalonai hereva namona oi henia totona, hegaegae karana be gau badana. Unai be momokani bema magasin ita hariharilaia, badina magasin be hanaihanai sivarai idauidau ia herevalaia. Do ita hegaegae namonamo totona, inai Iseda Basileia Gaukara pepana ese dala matamatana ta ia hahedinaraia—unai be lauri kahana dekenai, Gima Kohorona bona Awake! magasin matamatadia hariharilaia daladia haida ia hahedinaraia. Magasin ta ta amo taunimanima momo edia lalona do ia veria hereva namodia do idia hahedinaraia. Inai kiki hereva kwadogidia be edena bamona do oi habadaia?
3 Idia hahedinaraia gaudia amo emu teritori dekenai do oi gaukaralaia diba herevana oi abia hidi. Magasin lalonai unai sivarai oi duahia namonamo, bona taunimanima edia lalona do ia veria diba kahana badadia oi laloa. Magasin dekenai emu hereva do ia durua Baibel siri ta oi abia hidi bona reana ruma tauna dekenai do oi duahia. Hereva kwadogi amo kamonai tauna oi hagoadaia magasin ia duahia bona, bema ia hegeregere, ruma tauna dekenai Iehova ena Witnes taudia edia tanobada ibounai gaukarana durua totona kontribusen oi herevalaia. Vadaeni, emu magasin hariharilaia dalana oi karaia toho.
4 Oi Hegaegae Baibel Do Oi Gaukaralaia: Palani namonamo karana amo, Baibel siri ta be nega momo emu kiki herevana lalonai do oi gaukaralaia diba. Hegeregere, gabu momo dekenai idia manada pablisa taudia idia kwalimu dalana ta be edia imana dekenai Baibel idia abia bona ruma tauna idia hanamoa, bena idia gwau:
◼ “Taunimanima ai henanadai henidia bema inai hereva idia abia dae . . .” Genese 1:1 oi duahia, bena oi henanadai: “Inai hereva dekenai oi lalo-tamona, a?” Bema unai tauna ia lalo-tamona, oi gwau: “Lau danu. To, bema oi laloa Dirava ese gau ibounai ia havaraia, idia vara kara dikadia danu be iena kerere, a?” Unai tauna ena haere oi dibaia murinai, Hadibaia Tauna 7:29 oi duahia. Diba bukana ena rau 71 oi kehoa, bona paragraf 2 oi duahia. Unai tauna oi hagoadaia unai buka ia duahia totona. Bema ruma tauna be Genese 1:1 ena hereva dekenai ia lalo-tamona lasi, oi hagoadaia Bible Oi Abidadama Henia Diba pepapepa ia itaia namonamo.
5 Kamonai Taudia Ibounai Oi Lou Henia: Emu hesiai gaukara do oi hagugurua lasi bema oi davaria kamonai taudia oi lou henidia lasi. Bema umui herevahereva namonamo neganai, herevana magasin eiava ma buka ma ta oi rakatania eiava lasi, unai tauna ena ladana bona ena noho gabuna oi torea. Unai tauna ena ura oi habadaia namonamo totona oi lou henia haraga be namo. Namona be Baibel stadi oi herevalaia.
6 Aposetolo taudia edia negai idia noho hahediba taudia idia diba Iesu ese idia ia hagania sivarai namona do idia “gwauraia hedinarai” namonamo. (Kara 10:42) Unai hahegani tamona be ita totona danu, badina unai dala tamona amo taunimanima be hahediba taudia ai do ita halaoa. (Mat. 28:19, 20) Namona be ita hekwarahi iseda hesiai gaukara ita hagugurua namonamo totona.—2 Tim. 4:5.