Henanadai Mauana 1

◼ Haroro heboudia dekenai dahaka durua herevadia idia henia be namo?

Haroro hebouna ena badina be ita ia durua do ita karaia gaukarana​​—haroro gaukarana​—ita laloa totona. Unai dainai, namona be do ia naria tauna ia hegaegae namonamo hagoadaia herevadia, gau ta, bona idia badinaia dalana ta ia herevalaia. Bema dina ena siri be haroro gaukara ia herevalaia, ita duahia bona ita kikilaia. To, namona be unai hebou ese do ita karaia gaukarana ia hahedinaraia, bona haroro gaukara do idia karaia taudia ibounai ia durua idia hegaegae namonamo unai dina ena hesiai gaukara idia hagugurua totona.​—2 Tim. 4:5.

Iseda Basileia Gaukara pepana amo unai hua lalonai do ita henia gaudia bona hariharilaia dalana umui kikilaia ibounai idia diba totona. Magasin dinana ai “Magasin Do Ita Herevalaidia Dalana” amo magasin hariharilaia daladia umui haheitalaia. Haroro daladia ma haida totona, Herevalaia bukana amo emui teritori dekenai do umui gaukaralaia diba hamatamaia herevadia ta eiava rua umui herevalaia. Haroro gaukara ena kahana ta umui herevalaia eiava haheitalai amo umui karaia, hegeregere ruma ta dekenai Baibel gaukaralaia dalana, ura lasi herevadia haerelaia dalana, Baibel stadi hamatamaia dalana, eiava kamonai taudia lou henia dalana.

Namona be haroro heboudia edia lata be miniti 10 ia lao 15 sibona, bona grup haria, teritori abia hidi, bona guriguri gwauraia danu be unai nega lalonai. Haroro totona ibounai idia lao neganai, namona be idia mai taudia ibounai be, daika danu bona edeseniai do idia gaukara idia diba, bona teritori dekenai idia lao haraga be namo. Hebou negana be ia kwadogi dainai, ibounai be nega korikori ai idia ginidae be gau badana. Bema haroro hebouna be kongregesen hebouna ta, hegeregere Gima Kohorona Stadi murinai umui karaia, namona be unai hebou ia kwadogi. Dina siri umui herevalaia lasi be namo, badina Baibel ena hereva namodia haida umui moalelaia vadaeni.

Namona be idia hegeregere bapatiso tadikaka idia abia hidi guna haroro hebou ta ta idia naria totona. Bema idia hegeregere tadikakadia idia noho lasi, namona be elda taudia ese unai hebou do idia naria diba bapatiso taihudia idia abia hidi unai bamona nega ai grup idia naria. Idia helai noho lalonai, taihu ese dina siri eiava haroro ena kahana ta amo herevahereva ia hamatamaia diba, bona iena hereva ia hakwadogia. Namona be ena kwarana ia koua.

Haroro heboudia be dala namo hereana ia kehoa goada ita abia bona haroro gaukara totona ita hegaegae totona. Bema naria tauna ia hegaegae namonamo, ibounai be namo do idia abia.