Unai be Haroro Gaukara Ia Koua Gauna, A?
1 Taunimanima momo idia bisi bada. Iehova ena Witnes taudia danu idia bisi bada—Dirava ena Hereva idia stadilaia, kongregesen heboudia idia lao, bona haroro gaukara idia karaia. Danu, moni gaukara, ruma gaukara eiava sikuli gaukara, bona maduna momo dainai ita bisi, bona unai ibounai be nega bada ia haorea. Ruma bese kwaradia dekenai unai be auka.
2 Gabu idauidau dekenai moni davaria dalana be ia auka dainai, ruma bese kwaradia be edia mauri durua gaudia idia abia totona hora momo lalodiai idia gaukara bona idia hekwarahi bada. Moni gaukara mai edia hekwarahi bada ese edia nega bona goada bada ia haorea neganai, haroro gaukara totona edia nega bona goada be ia bada lasi. Edia maduna be tauanina dalanai edia ruma bese do idia naria dainai, reana haida be do idia laloa nega sisina sibona do idia haroro be ia hegeregere. (1 Tim. 5:8) Momokani, hari inai negai, mauri durua gaudia ita abia be mai ena hekwarahi. To, ta ena moni gaukara ese ena sivarai namona harorolaia gaukarana ia koua lasi be namo. (Mar. 13:10) Unai dainai, namona be iseda hekwakwanai korikori ita tahua namonamo.
3 Tanobada ena toana be ia idau hanaihanai dainai, reana ruma bese kwarana ta be do ia ura ena nega bada be moni gaukara dekenai do ia haorea, idia vara kava hekwakwanai dainai ia haboua monina do ia habadaia totona. (1 Kor. 7:31) Toana be moni gaukara habadaia karana amo tauanina gaudia ma haida do ita abia eiava laga-ani bona moale karadia totona dala ma haida do ia kehoa, to unai ese ruma bese do ia hamoalea bona edia lalona do ia hanamoa bema lauma gaudia do idia tahua bona hebou idia lao henia negana be unai kara dekenai idia gaukaralaia, a? Ita ura iseda lauma dalana do idia hadikaia gaudia ita dadaraia. Iesu ena sisiba ita badinaia, ‘kohu be guba dekenai ita haboua’ bona ‘Dirava dekenai gau momo ita henia,’ be aonega karana.—Mat. 6:19-21; Luka 12:15-21.
4 Basileia Gaudia Tahua Guna: Iesu ese ia murinai idia raka taudia ia hadibaia gau iboudiai amo lauma gaudia do idia atoa guna. Ia hagoadadia, ia gwau: “Emui lalona idia hekwarahi lasi. Umui hereva lasi, ‘Dahaka do ai ania?’ O, ‘Dahaka do ai inua?’ O, ‘Dahaka dabua do ai atoa?’ ” Dahaka dainai unai bamona ia hereva? Ia hahedinaraia, ia gwau: “To emui Tamana guba dekenai ia noho be ia diba, umui ura gaudia ibounai be unai.” Bema unai gauna ita abia dae momokani, gau ta lasi ese Iesu ia gwauraia herevana amo ita do ia koua, ia gwau: “To umui ese Dirava ena Basileia bona iena kara maoromaoro do umui tahua guna, vadaeni unai [mauri durua gaudia] ibounai danu umui dekenai dohore ia henia.” Dirava ese unai mauri durua gaudia do ia henia! (Mat. 6:31-33) Hari inai nega be tauanina gaudia ita abia totona ita lalo-hekwarahi bada herea eiava do ia ore tanobadana lalonai noho namo ena ura ese ita ia veria negana lasi.—1 Pet. 5:7; 1 Ioa. 2:15-17.
5 Moni gaukara ena badina badana ta be ta ena mauri durua gaudia ia abia totona. To dahaka dahaka do ita abia be namo? Aposetolo Paulo ia gwau: “Bema ita be mai iseda aniani bona dabua neganai, moni dekenai ita laloa momo lasi be namo.” Gau momo ita tahua, a? Bema oibe, reana Paulo ia sisibalaia davana dikana do ita davaria, ia gwau: “Kohu momo idia ura henia taudia be dibagani dekenai idia moru diba. . . . Ura dikadia bona ura kavakava ese unai kohu ura henia taudia do idia koia, bona hadikaia.” (1 Tim. 6:8, 9; Mat. 6:24; Luka 14:33) Edena bamona do ita diba ita ura momo gaudia ese ita idia koua?
6 Bema iseda moni gaukara dainai haroro gaukara sisina sibona ita karaia eiava sivarai namona totona sibona eda ura haida ita dadaraia lasi, ita atoa guna gaudia ita haidaua be namo. (Heb. 13:15, 16) Mauri dalana namona ese ita do ia durua iseda haroro gaukara idia koua gaudia do ita kokia. Bema iseda nega bona goada ita gaukaralaia gwauraia neganai, hanaihanai Basileia gaudia ita atoa guna be namo.
7 Iseda Hekwarahi be Hekwarahi Kava Lasi: Paulo ena hereva ese ita ia hagoadaia nega ibounai “Lohiabada ena gaukara do [ita] karaia goadagoada. Badina be [ita] diba Lohiabada ena gaukara lalonai, [iseda] hekwarahi be hekwarahi kava lasi momokani.” (1 Kor. 15:58) “Lohiabada ena gaukara” badana be Basileia harorolaia bona hahediba taudia halaoa gaukarana. (Mat. 24:14; 28:19, 20) Bema ita ura nega bada ita atoa haroro totona, namona be wiki ta ta ena haroro gaukara ena nega ita haria bona ita hekwarahi unai nega be gau ma haida totona ita gaukaralaia lasi. (Efe. 5:15-17) Bena, moni gaukara eiava ma gau ta ese iseda hesiai gaukara do ia koua lasi.
8 Bema mai eda ura ida ma haida dekenai Baibel ena hereva momokani ita herevalaia, ita ese henia karana ena moale do ita abia. (Kara 20:35) Basileia harorolaia gaukarana amo, ita be mai eda lalo-goada ida vaira negana do ita naria, badina ‘Dirava ena kara be gagevagageva lasi, ia be maoromaoro momokani. Unai dainai ia ese iseda kara namodia do ia laloaboio lasi. Ita ese Dirava ita lalokau henia.’—Heb. 6:10.