‘Idia Danu Do Umui Turana Karaia Lasi’
1 Iehova ia kara momokani bona ia kara maoromaoro. Idau negai bona hari ena taunimanima dekenai ia henia taravatudia ese iena hahemaoro maoromaoro ia hahedinaraia goevagoeva. Iehova be kara gagevagageva bona kara dika idia karaia taudia ibounai ia inai henidia. Kara dika tauna be Dirava ena Basileia lalonai do ia vareai lasi. Iehova ena kara maoromaoro hegeregerena idia noho taudia sibona be do idia mauri hanaihanai.—Deut. 32:4; 1 Kor. 6:9, 10.
2 Bema Iehova ena Witnes tauna ta be mai ena ura ida Dirava ena kara maoromaoro taravatudia ia utua bona ia helalo-kerehai lasi, ia be Keristani kongregesen murimurina ai do idia atoa. (1 Kor. 5:11-13) Kongregesen do ia goeva bona ia helaga totona unai be mai anina bada. Bema kara dika idia kokia lasi, do ia bada bona kongregesen taudia ibounai do ia hadikaia diba.
3 Kongregesen taudia ese orea murimurina ai idia atoa taudia be edena bamona do idia kara henidia? Iehova ia ura do ita karaia karadia be ena Hereva amo ia hahedinaraia. Mani inai Baibel siridia ita laloa:
◼ 1 Korinto 5:11: “Iseda Keristani varavara tauna ta, bema ia be heudahanai tauna, o mataganigani tauna, o kaivakuku tomadiho henia tauna, o hereva dika tauna, o kekero tauna, o henaoa tauna, umui be ia danu do umui turana karaia lasi. Bona ia danu do umui aniani hebou lasi.”
◼ 2 Ioane 10, 11: “Bema tau ta . . . inai Keriso ena hadibaia hereva ia gwauraia lasi neganai, emui ruma dekenai do umui abia dae lasi. Bona hanamoa hereva do umui henia lasi. Badina be unai tau do ia hanamoa tauna ese unai tau ena kara dika do ia durua.”
◼ 2 Korinto 6:14, 15: “Badina be edena bamona kara maoromaoro bona kara kerere idia turana diba? . . . Abidadama tauna bona abidadama lasi tauna ruaosi be idia hegeregere diba, a?”
4 Inai Baibel siridia be kara dika rohorohodia idia karaia bona Keristani kongregesen murimuri ai idia atoa taudia idia herevalaia. Ena be elda taudia ese unai taudia idia durua edia kara idia haidaua totona, to Iehova ena kara maoromaoro daladia idia dadaraia. Unai dainai, abidadama Keristani tauna ese unai bamona tauna ta ia hanamoa, ia hereva henia, eiava ia bamoa be maoro lasi.—Sal. 139:21, 22.
5 Bema orea murimuri ai idia atoa tauna be ruma bese tauna ta, unai be edena bamona? Bema ia be adavana, natuna maragina ta, eiava kakana eiava tadina ta, bona ia be unai ruma tamona dekenai ia noho, edia ruma bese mauri daladia idia karaia noho diba, badina ia be unai ruma bese tauna, murimuri ai idia atoa karana ese unai ia haorea lasi. To bema murimuri ai idia atoa tauna eiava sibona ia gini siri tauna be ena ruma bese taudia ida ruma tamona ai ia noho lasi, unai be do ia idau. Reana dala ia noho unai ruma bese tauna ida do idia herevahereva lasi. Bema ruma bese gaudia haida do idia herevalaia, unai kara do ia bada lasi, ataiai idia noho Baibel siridia edia hereva hegeregerena.
6 Unai sisiba ita badinaia karana amo, Iehova ese ita dekenai kara maoromaoro daladia idia rakatania taudia ita kara henidia dalana ia hahedinaraia. To eda ura be idia lalo-parara, idia helalo-kerehai, bona Keristani kongregesen goevana dekenai idia giroa lou. (Heb. 12:11) Keristani kongregesen amo ta idia atoa siri karana be unai tauna ena lalona ia hamarerea diba do ia laloa namonamo totona. Unai ese danu kongregesen taudia ibounai ia gimaia, unai tauna ena kara dika amo.—w77-E rau 348.
This article is unique to PNG.