Lauma Dikadia amo Idia Vara Sene Karadia Dadaraia
1 Reana guna ita be Dirava ena ura ita badinaia lasi, to sene karadia bona iseda gabu taudia edia kara ita badinaia. Namona be iseda kara ita tahua namonamo, demoni edia hereva koikoi—mase taudia ese mauri taudia idia durudia diba o idia hadikaia diba herevana—ita dadaraia momokani.—2 Kor. 13:5.
2 Satani bona ena demoni be dala idauidau momo amo ita idia hamanokaia toho. Reana eda varavara o eda turadia idia gaukaralaidia ita idia tuari henia totona. Iesu ia gwau: “Ruma taudia ese ruma ena biaguna do idia badu henia.” (Mat. 10:36) Bema taunimanima edia hereva oi laloa lasi, to dala oi tahua oi emu lalokau Dirava dekenai oi hamomokania bona ena taravatu oi badinaia, vadaeni, oi dekenai idia vara diba hahetoho haida oi lalodia be namo.—1 Ioa. 5:3; Kol. 2:8.
3 Mase Neganai: Papua New Guinea lalonai tau ta ia mase neganai, iena varavara bona ena turadia be ena ruma dekenai o ena bese taudia edia ruma ta dekenai idia hebou, bona idia “noga.” Idia taitai bada, tomadiho koikoi edia peroveta anedia idia abia, o sene anedia idia abia, gaba idia botaia, bona edia bese edia kara ma haida idia karaia danu. Nega haida, mase tauna idia hadigua, ena tauanina ai dabua namo herea idia atoa, bona geda ta dekenai idia atoa, ena varavara bona turadia ese idia itaia totona.
4 Taunimanima iboudiai idia lalo-hisihisi edia turana ta o varavara ta ia mase murinai. Iesu ia lalo-hisihisi bona ia tai ena turana Lasaro ia mase neganai. (Ioa. 11:33, 35) To lalo-hisihisi korikori dainai ia vara mata-ranuna be idau, bona gabu haida dekenai mase neganai idia taitai taudia momo edia taitai bada karadia be idau. Taunimanima edia kara korikori be idia taitai. Reana idia taitai bada, edia lalokau tauna ta ia mase neganai. To bema idia taitai bada, mase laumadia idia badu garina, eiava mase tauna ena varavara dekenai idia gari dainai, unai be kerere. Nega momo idia taitai negadiai o ane idia abia neganai, mase tauna idia hereva henia. Momokani, gabu haida lalodiai unai kara idauidau edia badina tamona be mase taudia garidia idia gari dainai. Mase tauna ta idia guria gwauraia neganai ita lao itaia be kerere lasi, to namona be Baibel ena sisiba ita laloatao bona “miro gaudia ibounai dekena amo do [ita] raka siri.” (2 Kor. 6:17) Ena be lauma tomadiho henidia karadia amo ita gini siri to dala idauna amo iena varavara dekenai hebogahisi ita hahedinaraia diba bona hagoadaia herevadia ita henidia diba. Danu namona be lalo-hisihisi ese Iehova ena taunimanima ia hamanokaia momokani lasi, badina be toreisi lou gwauhamatana idia diba. Unai dainai Baibel ia gwau: “Aiemai varavara taudia e, ai ura lasi mase dekenai idia mahuta noho taudia totona umui lalohisihisi. Ia namo lasi umui be lalohisihisi bada, Keristani lasi taudia bamona. Idia ese Dirava idia abidadama henia lasi, bona idia ese mase amo toreisi lou mauri totona idia naria lasi.”—1 Tes. 4:13.
5 Momokani, bese idauidau be mase neganai kara idauidau idia karaia, bona taravatu idauidau mase taudia edia varavara dekenai idia atoa. To unai kara momo edia badina be idia laloa mase taudia ese mauri taudia idia itaia diba; bona idia karaia neganai Dirava ena taravatu idia utua. Dirava ena hesiai tauna korikori ia ura lasi unai kara amo sibona ia hamiroa. Papua New Guinea ena gabu haida lalodiai mase tauna ena gau haida be mase mauana lalonai idia udaia. Ma gabu haida dekenai, mase varavara idia guria murinai, ruma maragina ta idia karaia bona idia mahuta gara gabuna dekenai pura tamona eiava hua ta bamona. Gabu haida lalodiai aria ta idia karaia ‘mase tauna ena lauma be lauma gabuna dekenai idia siaia totona.’ Idia laloa unai aria idia do karaia lasi lalonai mase tauna ena lauma be iena ruma kahirakahira dekenai ia do noho. Haida ese aniani edia mase varavarana totona daiutu ta lalonai idia atoa. Gabu haida lalodiai mase tauna ena varavara be ruma ta ai eiava kalaga ta dekenai idia noho ela bona unai aria “mase laumana bamahuta henia” totona idia karaia, bena kalaga idia kokia eiava varavara be ta ta ena ruma idia lao. Gabu haida dekenai hanua taudia edia bese ta ta be unai nega lalonai unai ruma dekenai idia noho taudia totona aniani idia mailaia danu. Haida idia laloa bema tau ta ese unai kara ia karadia lasi mase lauma ese do ia badu henia bena do ia gorere bona reana do ia mase. Kerisendom ena dubu taudia be nega momo unai bamona kara idia karaia. Ma haida ese mase aniani idia karaia dina 40 murinai mase tauna bamahuta henia totona. Idia gwau, Iesu bamona dina 40 murinai ia daekau guba dainai.
6 To gau badana be inai, Dirava ena Hereva be dahaka unai kara idauidau dekenai. Hegeregere, Salamo 106:28, 29 (NW ) ese Israela taudia haida ia gwauraidia, tomadiho koikoi idia abia dae bona “mase taudia edia boubou gaudia idia ania.” Edia kara amo “Lohiabada idia habadua” bena ia ese ia durudia lasi.
7 Namona be inai bamona negadiai ita naria namonamo: mase negadia, headava negadia, hahine idia rogorogo negadia bona natudia idia vara negadiai. Dirava ena Hereva ia gwau: “Do umui laloa maoromaoro, bona naria namonamo. Umui dekenai ia tuari henia tauna, Satani, be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” (1 Pet. 5:8) Reana ita idia veria babalau gauna maragina abia totona neganai ita dadaraia be auka. To namona be ita laloatao Iehova ia ura ita ese ia sibona ita tomadiho henia. (Eso. 20:4-6) Ia ese tomadiho koikoi ia dadaraia vaitani, bona bema iena hesiai taudia haida be “siahu lasi” dainai ena taravatu idia badinaia lasi, do ia hanamodia lasi.—Apok. 3:16.
8 Gorere Negadia: Taunimanima haida be idia gorere negadiai doketa taudia bona hospital dekenai idia lao, to edia gorere idia ore lasi. Nega momo idia laloa inai be hanua ena gorere. Reana haida idia laloa namona be babalau tauna idia boiria edia gorere ia hanamoa totona. Inai babalau taudia momo ese ava eiava muramura idauidau idia gaukaralaia, bona reana unai ava o muramura be dika lasi. To gau dikana be inai: Lauma edia siahu be unai ava o muramura danu idia gaukaralaia hebou. Baibel lalonai, Apokalupo 21:8 lalonai “babalau” idia gwauraia; unai hereva be Greek gado hereva phar·ma·kiʹa, anina be “muramura gaukaralaia karana.” Badina be idau negai babalau taudia bona meamea taudia ese muramura idia gaukaralaia edia meamea karadia lalodiai.
9 Gorere hanamoa totona babalau taudia haida ese boubou gauna, (manu ta eiava animal ta, gorere tauna ese ia henia gauna) idia bouboulaia, eiava meamea idia gaukaralaia. Africa ena gabu ta dekenai, tau ta ena isena ia hisihisi dainai babalau hahinena ta dekenai ia lao ia hanamoa totona. Hahine ese muramura ia henia neganai, ia hamaoroa namona be ia itaia lasi, ena siahu ia boio garina. To ava o muramura be edena bamona ia diba tau ta ese ‘ia itaia noho’? Ia be mai ena matana a? Lasi, ani? To unai ese ia hahedinaraia unai babalau hahine ia laloa lauma taudia ese unai muramura amo do idia gaukara, bena babalau siahuna do ia abia.
10 Babalau taudia haida idia gwau idia ese Dirava ena taravatu lauma edia siahu gaukaralaia karana dekenai idia matauraia, to idia ese meamea idia gaukaralaia. Reana idia ese raurau o kopukopu gorere tauna ena kopina dekenai idia atoa. To idia kokia neganai, gau ta idia hahedinaraia, reana nadi ta eiava dabua gunana ta bona idia gwau gorere havaraia gauna, mase tauna ena tau-anina ena amo idia kokia gauna, be unai.
11 Siahu Ibounai Diravana ena lalohadai meamea idia gaukaralaia taudia dekenai be ita diba vadaeni; idia ia ura henia lasi momokani. (Deu. 18:10-12) Nega momo babalau taudia ese kara haida idia karaia bona boubou gaudia idia henia, lauma idauidau idia noidia totona. Unai dainai bema meamea tauna ese oi ia hamaoroa kokoroku o boroma ta oi mailaia ia bouboulaia totona, anina be dahaka? Aposetolo Paulo ia gwau: “Bese idauidau ese idia bouboulaidia gaudia be lauma dikadia dekenai idia bouboulaidia, Dirava dekenai lasi; bona lau ura lasi umui be demoni ida umui hetura.”—1 Kor. 10:20-22.
12 Bema ita be demoni edia siahu amo ita siri vadaeni, namona be ita naria namonamo, koikoi bona sene karadia lalodiai ita idia veria vareai lou garina. To bema ita be dala maoromaoro iboudiai amo iseda gorere ita hanamoa toho vadaeni, to hegeregere lasi, edena bamona? Baibel ia gwau: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua.” (Sal. 55:22) Guriguri amo oi noia, hoa karana ta amo oi emu gorere ia hanamoa totona lasi, to gorere hanamoa dalana maoromaorona oi abia hidi totona aonega oi abia. Bona ena be emu gorere ia bada eiava ia noho nega daudau, to mai emu abidadama goadana bona mai emu moale danu lauma dalana ai oi goada noho. Iehova ese emu natudia danu do ia naridia. Edia mauri be Ia ena amo. Ia naridia diba, dika idia davaria garina, to “babalau muramurana” o varovaro o boubou gaudia, o babalau karadia amo ia karaia lasi.
13 Ita diba babalau taudia bona meamea taudia danu do idia gorere, bona badina idauidau dainai do idia mase. Ena be Dirava ena hesiai taudia bona edia natudia, meamea amo idia gini siri taudia unai, be hisihisi idia ania eiava gorere dainai idia mase gwauraia, to edia helaro namona ese ia hagoadadia. Idia diba Dirava ese nega ta ia gwauraia, gorere iboudiai bona mase ia haorea totona. Unai neganai Dirava idia badinaia taudia ese hamauria gaudia do idia abidia: “mauri ranuna ena sinavai” bona ena kahana kahana ai idia gini audia mai edia raurau bese idauidau hamauridia totona, ese idia laulaulaidia gaudia unai. (Apok. 22:1, 2) Unai dainai, ena be ita mase gwauraia, to Iesu ena hereva ita laloatao diba: “Sibona ena mauri do ia dogoatao noho tauna be iena mauri do ia halusia, to sibona ena mauri do ia halusia lau totona tauna, be iena mauri do ia davaria.” (Mat. 16:25) Namona be meamea karadia mirodia ita tahua lasi iseda mauri naria totona, to Siahu Ibounai Diravana ena siahu ita abidadama henia, bona ita abia dae mase amo ita do ia hatoreaisi lou, ena gorere lasi negana matamatana lalonai ita noho totona.
14 Demoni edia kara oi rakatania murinai, namona be oi hekwarahi bada oi idia abia lou garina. Iesu ia gwau “Iena lalona do ia goada noho ela bona dokona” tauna sibona do ia mauri. (Mat. 24:13) Namona be dina iboudiai ita hekwarahi bada, ita idia veria toho negadiai sene karadia bona demoni karadia lalodiai ita vareai lasi totona.
This article is unique to PNG.