Iehova Ena Lalokau Laloa Bada Karana Ena Hahenamo—Kahana 2
1 November ai inai kahana ita herevalaia neganai, ita ese hesiai gaukara lalonai Iehova ena lalokau laloa bada karana daladia ima ita herevalaia. (1 Ioa. 4:9-11) Inai kahana dekenai be unai do ita karaia diba daladia ma ima do ita herevalaia. Lauma dalanai ma haida ita durua neganai, hahenamo ita abia.
2 Nega Bona Dala Idauidau ai Haroro: Inai be dala namona kara maoromaoro totona idia hitolo bona ranu mase taudia ita davaria bona idia dekenai heduru bukadia bona magasin ita rakatania totona. Namona be ‘nega namona ita hoia’ bona nega idauidau ai ita davaria taudia ibounai ita haroro henidia. (Efe. 5:16, NW ) Unai dala ai ita haroro totona ita gari lasi be namo, to bema Dirava ena lalokau bona taunimanima idia abia be namo gaudia ita laloa bada, nega namodia ibounai lalonai do ita haroro.—2 Tim. 1:7, 8.
3 Misinari tadikaka ta be ia ida taksi ai ia guia tauna ta ia hereva henia matamaia dainai hahenamo bada ia abia. Unai tauna ia kamonai. Tadikaka ese ia lou henia, bona Baibel stadi idia hamatamaia. Unai tauna be hereva momokani lalonai ia vareai bona lauma dalanai ia goada ia lao bona ia be hegeregere kongregesen ena elda tauna ta ai ia lao diba!
4 Revareva amo Haroro: Reana ita be hegeregere lasi ruma ta amo ruma ta do ita lao badina tauanina gorerena eiava medu bada dainai. Revareva ita torea diba, revareva amo ita diba taudia ita haroro henidia, hegeregere mase lalonai edia lalokau taudia idia haboioa taudia, eiava taoni ai ita haroro henidia to hari edia gabu dekenai idia giroa lou taudia, reana gabu daudau dekenai. Unai revareva lalonai Baibel ese lalona ia veria sivaraina ta ia hahedinaraia pepapepana ta ita udaia bona revareva do ia abia tauna ita hagoadaia ita ia torea henia lou bema ia be mai ena henanadai. Sibona emu adres eiava Kingdom Hall ena oi gaukaralaia; mani emu kara brens opesi ena oi gaukaralaia lasi.
5 Telefon amo Haroro: Taoni ai idia noho bona mai edia telefon taudia haida totona, unai be dala namona ta varavara taudia bona ma haida ita haroro henidia totona. Bema mai aonega, hebogahisi, bona hemataurai ida ita karaia, haere namona do ita abia. Herevalaia bukana ena rau 10-17 dekenai idia noho hamatamaia herevadia momo be telefon amo ita haroro totona do ita gaukaralaia diba.
6 Diba Lasi Taudia Abia Dae: Bema iseda dekena taudia ita lalokau henidia, iseda hebou dekenai ita diba lasi tauna do ita itaia haraga bona ia dekenai heabidae karana do ita hahedinaraia. (Roma 15:7) Namona be ia itaia ia be ena lauma dalana idia laloa bada taudia edia huanai ia noho. Iseda laloa bada karana bona Baibel stadi totona ia ita noia ese ena lalona do veria iseda heduru ia abia dae totona.
7 Iseda Kara Namodia: Iseda kara namodia amo, hereva momokani ita hahairaia. (Tito 2:10) Tanobada taudia ese ita Iehova ena Witnes taudia dekenai hereva namodia idia gwauraia neganai, iseda Dirava idia hanamoa. (1 Pet. 2:12) Unai danu ese ma haida ia durua diba mauri dalana idia rakalaia matamaia totona.
8 Iehova ena lalokau bada ita dekenai dainai, ia dekenai iseda laloa bada karana ita hahedinaraia daladia ima ita riviulaia bona ita badinaia be namo, ani? (1 Ioa. 4:16) Unai bamona oi karaia neganai, hahenamo momo do oi abia.