Basileia Sivaraina Harorolaia
1 “Lau be Dirava ena Basileia ena Sivarai Namona . . . do lau harorolaia, Dirava ese lau ia siaia ena badina be unai.” (Luka 4:43) Unai hereva amo, Iesu ese ena haroro gaukara ena sinado ia hahedinaraia—Dirava ena Basileia. Hari ita harorolaia sivaraina badana be Basileia danu, Mataio 24:14 ia perovetalaia hegeregerena, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” Dirava ena Basileia dekenai taunimanima ese dahaka hereva momokani idia kamonaia be namo?
2 Dirava ena Basileia be guba dekenai hari ia lohia noho bona daudau lasi taunimanima edia lohia edia gabu do ia abia. Demoni be guba amo idia negea diho vadaeni, bona hari ia noho tanobada dikana be ena dina dokodia dekenai ia ginidae vadaeni. (Apok. 12:10, 12) Satani ena tanobada dikana be do idia haorea momokani, to Dirava ena Basileia be do ia marere lasi. Do ia noho hanaihanai.—Dan. 2:44; Heb. 12:28.
3 Basileia ese kamonai taudia iboudiai edia ura gaudia namodia do ia henia. Unai Basileia ese tuari, taravatu utua karadia, dagedage, bona ogogami dainai idia vara hisihisi do ia haorea. (Sal. 46:8, 9; 72:12-14) Iboudiai totona aniani momo do idia noho. (Sal. 72:16; Isa. 25:6) Gorere bona tauanina ena dika idauidau do idia ore. (Isa. 33:24; 35:5, 6) Taunimanima idia goevadae idia lao neganai, tanobada be paradaiso ai do idia halaoa, bona taunimanima be maino dekenai do idia noho.—Isa. 11:6-9.
4 Hari ita noho dalana amo ita hahedinaraia ita ura Dirava ena Basileia henunai ita noho. Basileia ena sivarai ese iseda mauri ena dala ibounai lalonai, iseda tahua gaudia bona mai anina gaudia dekenai danu, ita ia hakaua be namo. Hegeregere, ena be mai eda maduna tauanina dalanai iseda ruma bese taudia ita naria totona, to namona be tauanina gaudia ese Basileia ena gaukara ia koua lasi. (Mat. 13:22; 1 Tim. 5:8) To, ita ese Iesu ena sisiba ita badinaia be namo, ia gwau: “Umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.”—Mat. 6:33.
5 Nega ia noho lalonai taunimanima ese Basileia sivaraina idia kamonai bona kara ta idia karaia haraga be namo. Unai bamona idia karaia totona, ‘Dirava ena Basileia ita hadibaia goada’ amo idia ita durua.—Kara 19:8.