Hua Ta Ta Ibounai Haroro Ripoti Oi Henia, A?
1 Baibel ena sivarai momo lalodiai taunimanima edia namba idia ripotilaia, unai amo idia vara gaudia idia hahedinaraia goevagoeva. Hegeregere, Gideona bona ena tatau 300 sibona ese Midiana taudia edia kamepa idia hadikaia ore. (Gun. 7:7) Iehova ena aneru ese Asuria ena tuari taudia 185,000 ia aladia mase. (2 Kin. 19:35) Pentekoste 33 C.E. ai, taunimanima 3,000 bamona be bapatiso idia abia, bona daudau lasi murinai abidadama taudia edia namba ia bada daekau 5,000 bamona. (Kara 2:41; 4:4) Unai sivarai ese idia hahedinaraia goevagoeva, Dirava ena idaunegai hesiai taudia idia hekwarahi bada ripoti maorona idia haboua totona.
2 Hari inai negai, Iehova ena orea ese ita idia hadibaia hua ta ta ibounai iseda haroro gaukara ita ripotilaia totona. Mai kamonai ida ita gaukara hebou karana ese haroro gaukara naria karana ia durua. Ripoti ese idia hahedinaraia bema haroro gaukara ena kahana ta do ita hanamoa be namo eiava tadikaka be momo lasi gabuna dekenai gaukara taudia ma haida idia siaia be namo. Kongregesen lalonai, haroro ripoti ese elda taudia ia durua, edia hesiai gaukara idia habadaia diba taudia bona heduru idia ura abia taudia idia diba totona. Basileia harorolaia gaukarana ena ripoti ese Keristani tadikaka oreana ibounai idia hagoadaia. Hua ta ta ibounai haroro ripoti oi henia, a?
3 Oiemu Maduna: Hua ena dokonai, haroro gaukara ai oi karaia vadaeni gaudia oi laloa lou be auka, a? Bema oibe, haroro gaukara ena rekodi oi torea be namo, ani? Haida be kalenda eiava buka maragina ta idia gaukaralaia. Ma haida be haroro gaukara ena ripoti pepana ta idia loalaia. Hua ena dokonai, emu ripoti be emu buka stadi naria tauna dekenai oi henia haraga. Eiava, bema oi ura, Kingdom Hall dekenai idia makaia vadaeni mauana lalonai oiemu ripoti oi udaia diba. Bema emu ripoti oi laloaboio bena oi henia lasi, namona be emu buka stadi naria tauna oi hadibaia haraga, oi naria lasi ela bona oi dekenai ia mai. Hanaihanai emu gaukara oi ripotilaia karana ese ia hahedinaraia, Iehova ese ia abia hidi dalana oi matauraia bona ripoti idia gogoa bona edia namba idia haboua tadikakadia edia gaukara be mai lalokau ida oi laloa bada.—Luka 16:10.
4 Buka Stadi Naria Tauna Ena Gaukara: Ia kamonai namonamo bona ia laloa namonamo mamoe naria tauna bamona, buka stadi naria tauna be hua ta lalonai ena grup taudia ese idia karaia gaukara ia laloa bada. (Aon. 27:23) Ia diba bema pablisa ta ta be hanaihanai mai moale ida haroro gaukara idia karaia namonamo eiava lasi, bona bema hua ta lalonai ta ia haroro lasi, heduru ia henia haraga. Hagoadaia herevana ta, eiava heduru dalana ta ia gwauraia, eiava ia hamaoroa ia danu do ia lao haroro hebou ese reana ia do ia durua bada.
5 Hua ena dokonai, buka stadi naria tauna ese dala ia karaia ena grup taudia ibounai ese edia gaukara idia ripotilaia totona, unai amo seketere ese hua vaira ena dina namba siks ai kongregesen ena ripoti maorona be brens opesi dekenai ia siaia diba. Hua ena dokona ia kahirakahira neganai, namona be ena grup taudia ia hadibaia lou bona buka stadi gabuna ai ripoti pepa haida ia abia lao be namo. Bema ta be ena gaukara ia ripotilaia totona ia laloaboio momo, namona be dala namona ai ia hadibaia lou bona ia hagoadaia.
6 Hanaihanai iseda haroro gaukara ripoti ita henia karana ese iseda haroro gaukara lalonai ita hagugurua gaukara namona ena ripoti maorona do ia hahedinaraia goevagoeva. Emu maduna do oi huaia bona hanaihanai hua ta ta ai emu gaukara ena ripoti do oi henia, a?