Oiemu Kongregesen Buka Stadi Naria Tauna Oi Durua
1 Ita ta ta ibounai ese kongregesen buka stadi dekenai gau namodia momo ita dibaia. Hua gunanai ita ese Kongregesen Buka Stadi naria tauna ena gaukara ia naria dalana ita herevalaia. To dahaka ita karaia diba ia ita durua unai dala ai haida bona ita ese namo ita davaria totona?
2 Pura Ibounai Oi Lao Henia: Buka stadi grup taudia be momo lasi dainai, oi mai be gau badana. Oiemu lalona oi hadaia pura ibounai buka stadi do oi lao henia totona. Nega korikori ai oi ginidae karana ese hebou ia durua diba, badina unai amo naria tauna ese dala namona ai hebou do ia matamaia.—1 Kor. 14:40.
3 Haere Namodia: Durua dalana ma ta be oi hegaegae namonamo bona hagoadaia herevadia oi henia. Nega momo haere namodia be hereva badana tamona idia hahedinaraia, bona unai ese ma haida ia hagoadaia idia haere totona. Haere amo paragraf ibounai oi herevalaia lasi. Bema stadi ena hereva ta ese oiemu kudouna ia hamarerea, oiemu lalohadai oi herevalaia amo herevahereva dalana oi hanamoa.—1 Pet. 4:10.
4 Bema oi be buka stadi taudia totona paragraf duahia ena hahenamo oi abia, unai maduna oi karaia namonamo. Duahiduahi namonamo ese stadi ia hanamoa.—1 Tim. 4:13.
5 Haroro Gaukara: Buka stadi idia karaia gabudia momo dekenai haroro gaukara totona idia hebou, bona naria tauna ese haroro gaukara ia hakaua lalonai oiemu heduru unai kahana dekenai be ia do ia durua bada. Namona be do oi laloa unai be nega namodia oiemu tadikaka oi tura henia namonamo bona idia oi hagoadaia totona.
6 Haroro Gaukara Ena Ripoti: Hua ta ta ena dokonai oiemu haroro gaukara ena ripoti oi henia haraga be naria tauna oi durua dalana ta. Maoromaoro ia dekenai oiemu ripoti oi henia diba eiava Kingdom Hall dekenai idia gaukaralaia mauana dekenai oi udaia diba. Seketere ese unai maua ia gaukaralaia diba buka stadi naria taudia ese idia gogoa haroro ripoti ia haboua totona.
7 Kongregesen Buka Stadi naria tauna ida oi gaukara hebou karana be ma haida ese do idia moalelaia. Bona mai anina bada gauna be, oi abia dae diba Iehova be oi danu “do ia noho.”—Fili. 4:23.