Kongregesen Buka Stadi—Ita Abia Ena Badina
1 Lagani 1895 ai, Bible Student taudia, unai neganai Iehova ena Witnes taudia be unai ladana idia gaukaralaia, ese edia stadi grup idia gwauraia Dawn Circles for Bible Study. Unai stadi grup ai Millennial Dawn ena volium idia stadilaia. Gabeai, unai hebou idia gwauraia Berean Circles for Bible Study. (Kara 17:11) Nega momo, grup maragina ta be idia dekenai ia hegeregere adorahi ta ai ta ena ruma dekenai hebou idia karaia. Kongregesen Buka Stadi be unai dala amo ia matamaia.
2 Ita Ia Hagoadaia Bona Durua: Buka stadi grup be maragi dainai, dala ia noho idia hebou taudia ese edia abidadama idia hahedinaraia totona. Unai amo ‘edia abidadama dainai do idia hagoadaia heheni.’—Roma 1:12, Buka Helağa.
3 Buka stadi naria tauna ena hadibaia dalana ita itaia karana ese ita ia durua diba ‘hereva momokani do ita hadibaia maoromaoro’ totona. (2 Tim. 2:15) Ia ese Baibel amo umui stadilaia gauna ia herevalaia dalana oi itaia namonamo. Umui stadilaia gauna hegeregerena, Baibel sibona ia gaukaralaia diba stadi dokonai hereva badadia ia gwauraia totona. Iena haheitalai namona ese ita do ia durua Keristani haroro gaukara dekenai iseda hadibaia karana ita hanamoa totona.—1 Kor. 11:1.
4 Buka stadi naria tauna be wiki ta ta ai idia karaia stadi ia hakaua sibona lasi, to haroro gaukara ia gunalaia danu. Haroro naria tauna ida ia gaukara hebou neganai, haroro gaukara totona dala namona ia hegaegaelaia diba. Ia hekwarahi iena grup taudia ibounai ia durua edia Keristani maduna, sivarai namona harorolaia bona hahediba taudia halaoa gaukarana idia hagugurua totona.—Mat. 28:19, 20; 1 Kor. 9:16.
5 Buka stadi naria tauna be ena buka stadi grup dekenai idia noho taudia ta ta edia namo lauma dalanai ia laloa. Kongregesen heboudia bona haroro gaukara ai ma haida ia bamoa neganai, unai ura ia hahedinaraia be namo. Bona nega haida tadikaka be edia ruma dekenai ia vadivadi henidia, lauma dalanai ia hagoadadia totona. Namona be ibounai idia gari lasi bema idia ura lauma dalanai buka stadi naria tauna ena heduru idia abia.—Isa. 32:1, 2.
6 Ta Ta Ita Hagoadaia Heheni: Dirava ena taunimanima edia gaukara idia taravatua tanodia ai, nega momo tadikaka be grup maragidia dekenai idia hebou. Tadikaka ta ia gwau: “Ena be emai Keristani gaukarana idia taravatua, to dala ia noho neganai tadikaka bona taihu 10 eiava 15 ai hebou, emai pura ta ta hebouna ai karaia totona. Hebou amo ai be lauma dalanai goada ai abia, unai be emai Baibel stadilaia karana bona stadi murinai emai hebamo karana amo. Ai ta ta dekenai idia vara gaudia ai herevalaia, bona unai ese ai ia durua bena ai lalo-parara ai ta ta ibounai be ai hekwarahi bada.” (1 Pet. 5:9) Unai hegeregerena, Kongregesen Buka Stadi ita durua goadagoada karana amo ta ta ita hagoadaia heheni diba.—Efe. 4:16.
[Study Questions]
1. Kongregesen Buka Stadi be edena bamona ia matamaia?
2. Edena dala ai buka stadi ai ita hagoadaia heheni diba?
3, 4. Edena dala ai buka stadi ese ita ia durua iseda hesiai gaukara ita hagugurua totona?
5. Buka stadi dekenai edena bamona heduru ita abia diba?
6. (a) Tano haida dekenai, iseda tadikaka be grup maragidia ai idia hebou dainai, dahaka namo idia davaria? (b) Buka stadi amo dahaka namo oi abia vadaeni?