Emui Kara Ibounai Lalonai Umui Helaga
1 Ita be helaga Diravana, Iehova, ena hesiai taudia dainai, ita hekwarahi iseda kara ibounai lalonai ita helaga totona. (1 Pet. 1:15, 16) Unai ena anina be ita hekwarahi iseda mauri ibounai lalonai Iehova ena taravatu ita badinaia totona. Inai lagani ena distrik hebouhebou ese dala do ia kehoa helaga karana ita hahedinaraia totona.
2 Iseda Noho Gabuna Dekenai: Vanegai lagani lalonai, hebouhebou idia lao taudia ese idia gaukaralaia hotel ta ena biaguna ta ia gwau: “Iehova ena Witnes taudia be taunimanima namodia, iniseniai idia noho totona. . . . Ai be umui bamona taudia ai ura.” Henunai idia noho hadibaia herevadia ita badinaia neganai, unai ese ita do idia durua kara namodia ita hahedinaraia totona: (1) Bema mahuta gabudia oi ura abia, kongrigeisen seketere be Ruma Dipatmen amo fom ia abia neganai, karaharaga ia oi hadibaia. Daiutu momo oi noia kava lasi, to do idia noho taudia edia namba hegeregerena sibona oi noia. (2) Bema emu noho gabuna oi haidaua, Ruma Dipatmen oi hadibaia haraga be namo. (3) Aniani nadua lasi daiutu dekenai oi nanadu lasi. (4) Emu noho gabunai idia gaukara taudia be idia bisi negana lalonai oi hereva eiava kara henia neganai, lauma ena huahua oi hahedinaraia be namo.—Gal. 5:22, 23.
3 Iseda kara namodia ese haroro namona ia henia diba. Vanegai lagani lalonai, Witnes matamatana ta be mai hemataurai ida hotel dekenai ia gaukara hahinena ta ia noia toretore gaudia haida totona, bona ia tanikiu henia. Unai hahine ia hoa bada, bona haida idia kamonai unai hahine ia gwau: “Unai bamona hemataurai karana idia hahedinaraia matamata taudia oi davaria diba lasi.” To, nega haida, tama sina ese edia natudia idia rakatania, mahuta gabudia dekenai idia gadara totona. Tama sina ese edia natudia idia rakatania kava be namo lasi, to idia itaia edia natudia edia kara ese Iehova ia hanamoa be namo.—Aon. 29:15.
4 Aniani Bona PMV Abia Gabudia Dekenai: Hebouhebou gabuna badinai ia noho aniani gabuna dekenai ia gaukara hahine ta ia gwau: “Witnes taudia be idau. Ma haida idia matauraia.” Kara namodia be hereva bona kiri badabada lasi, badina unai kara ese ma haida ia hahekwakwanaia diba. Herevana ita aniani bona inuinu neganai danu, ita ura gau ibounai ita karaia Dirava ita hanamoa totona. (1 Kor. 10:31) Nega ma haida ai danu, hegeregere PMV eiava motuka ta dekenai ita ura guia neganai, ita ura Keristani karadia ita hahedinaraia.
5 Hebouhebou Dekenai: Hebouhebou gabuna ai iseda kara namodia ita hahedinaraia be gau badana. Motuka atoa gabudia bona Assembly Hall lalonai, mani atendan taudia edia hakaua hereva umui badinaia. (Heb. 13:17) Ruma bese taudia idia helai hebou be namo, to namo lasi edia natudia maragidia be matamata taudia ma haida danu idia helai. Nega haida, idia itaia hebouhebou gabuna ai tama sina ese edia natudia idia rakatania dainai, idia gadara, hereva badabada bona idia heau loaloa, herevana program ia heau noho lalonai danu. Tama sina e, mani emu kara emui natudia umui naria namonamo. Rekodi gaudia be Assembly Hall ena paua eiava saun gabudia dekenai umui gwadaia kau lasi, bona ma haida edia kamonai karana ia hadikaia lasi dalanai umui gaukaralaia be namo. Bema oi ura program lalonai laulau oi abia, diari halasia gaudia oi gaukaralaia lasi be namo. Pager bona mobael fon ita koua be namo, unai amo ma haida edia kamonai karana do idia hadikaia lasi. Bema hebouhebou gabunai aksiden ta oi itaia, mani emu kara ambalans lasi to atendan eiava First Aid Dipatmen oi hadibaia.
6 Iseda kara dainai ita be ma haida amo ita idau bona Dirava ita hanamoa. (1 Pet. 2:12) Hebouhebou ai, Iehova ena Witnes taudia edia kara do idia hedinarai. Unai dainai, emu lalona oi hadaia emu kara ibounai lalonai oi helaga totona.
[Study Questions]
1. Dahaka dainai iseda kara ibounai lalonai ita helaga be gau badana?
2. Iseda mahuta gabudia dekenai, edena dala ai kara namodia ita hahedinaraia diba?
3. Edena dala ai Witnes matamata taudia edia kara ese ma haida edia lalona idia veria diba?
4. Edena dala ai ma haida laloa bada karana ita hahedinaraia diba?
5. Hebouhebou gabunai kara namodia ma haida be dahaka?
6. Edena dala ai hebouhebou dekenai iseda kara ese Dirava ia hanamoa diba?
[Box on page 6]
Helaga Karadia Hahedinaraia
◼ Mahuta gabudia edia taravatu badinaia
◼ Natudia naria namonamo
◼ Ma haida laloa bada